Read Sangtam Naga 2 YANGTHSARÜTI 23 Bible Online

2 YANGTHSARÜTI 23 - Sangtam Naga bible

2 YANGTHSARÜTI 23

¹Yangthsaba Josianü Juda ko Jerusalem la azirüti apüm dsibülungcho,

²ko bebürü, azikehrü ko alirü ailümrü apüm zeh, arüh atümungnü Amübükuh lang müjang wücho. Arüh atümung bete, Yangthsabanü amübükuh lanü nguba azengtacho vakha apüm tsü yuva chüro khicho.

³Abinü Yangthsaba kekhüm la dongdi te yapü ABÜDONGBA te yocho nyinung, lasih ko anbü apümnü abi yuzeng bichinung ko vakha la thrah zehcho kyo, azengtacho apüm tsü bichinung nyengchocho. Ko müyurü apümnü azengchotacho tsü bichinung nyengchocho.

⁴Hütsünü Josianü Amungthriba Bebüba Hilkia, abi chitung bebürüti ko Amübükuh trahtri nyahrüti te, Baal Ashera tsingranglatpü ko chenghiti mübüba la bichiba kohro apüm zangcheh pehnung yuzeng jücho. Hiri apüm Kedron Ngah la yangdi münyeh tsü trüp-pehcho ko mihtru tsü Bethel lang hiwüsohcho.

⁵Hütsüpü Juda yangthsarütinü Juda ko Jerusalem la müyudsirü bholu chah kangmübü mübüsohnung thro yohpürüti apüm ko Baal, nyü, chonu, chenghiti khyang kangmübü jürüti bebürü apüm arüh nguchi lanü zahsohcho.

⁶Amübükuh lanü Ashera tsingranglatpü kyothriti khyo yangdi khu hichüdu Kedron ngah la trüpcho ko asongsong kang dongnahpü kongyo la shuh pehcho.

⁷Amübükuh la shutsa-irüti lisohba kuh tsü thsangnyangjücho. (Ashera tsingranglatpü mübüla bichiba fükhüm tsü hütsü lanü kyahcho.)

⁸Juda la yangditi la liba bebürüti tsü Jerusalem lang norocho ko yanglih apüm la arühnü kangmübü mübüba bholu tsü abinü münyipehjücho. Ko yangdi lang züdude tungte tbükhüm fülilangthring, yangdi governor Joshuanü külüpba tbükhüm shündhün miza-tsingrang khyang müsachehjüba bholu tsü mapnahpehjücho.

⁹Hütsüri bebürüti tsü Amübükuh la müdikehsohcho, ta arühnü aparü bebürü khyang jücho bhüpza müyohba hümthse tsü tsusohcho.

¹⁰Sünüsü palu tsurü mahkhang tsularüti Molek tsingrang khyang trüp kangmübü müjüsohnung nengdang, Yangthsaba Josianü Hinnom Ngah la müyudsirü mübü chah Tofet tsü münyijücho.

¹¹Juda Yangthsarütinü nyü mübü shulüm kuri müsacheh yohpücho, hütsürisü abinü pehjücho ko hiba mübü la bichicho kuri karisü trüp-pehjücho. (Hiri tsü Amübükuh Kekhüm, adirü khüdu Nathan Melek kuh amünyeh tbükhüm te yohpücho.)

¹²Yangthsaba Ahaz kuhmung chah Juda Yangthsarütinü külüpcho bholu tsü Yangthsaba Josianü Amübükuh kekhüm anyüh la Yangthsaba Manasenü külüpba bholu zeh tphünah pehjücho; abinü bholu tsü zangzang mapnahpü Kedron ngah la zangyohchü pehjücho.

¹³Solomon-nü Jerusalem nyüchürolang, olive zong kihjing lahpi, Sidon tsingrang Astarte, Moab tsingrang Khemosh ko Amon tsingrang molek, hiri mübünung külüpcho bholuti tsü Josianü münyijücho.

¹⁴Yangthsaba Josianü lung-dongdi zangzang mapnahpehjücho, tsingranglatpü Ashera kyothri thsangnyangjücho ko hütsüri yaba müdüm tsü nyitsarü rühlungrünü bhümtijücho.

¹⁵Josianü Israelrü münyi shitpahsohba Nebat tsurü Yangthsaba Jeroboamnü thsaba Bethel la mübüji tsü thsangnyangjücho. Josianü bholu thsangnyangjücho, lung zangzang mapnahjücho ko asongsong kang kengnah pehjücho; ko Ashera kyothri trüp-pehjücho.

¹⁶Hütsüpü azong la tsü kong khürü ngucho; abinü hütsüri lanü arühlungrü throchehsohcho ko bholu chah trüpsohcho. Hütsüta azikehrünü papade Yangthsaba Jeroboam thsüti nyümong bholu te yade azikehrünü choyohba tikehsoh abinü münyijücho. Yangthsaba Josianü mükangmüla dhengcho ko hiba choyohba azikehba kong tsü ngucho.

¹⁷Abinü tsingdhengcho, “Hütsü sü kongo?” Bethelrünü lalingcho, “Hütsü Juda lanü azikehrü khüdu sünü nühnü chünye nguchiba hi tikehnung choyohcho, abi kong lile.”

¹⁸Josianü yocho, “Hütsüta pehjüng. Abi rüh tsü tüthahbü.” Hütsünü abi rüh ko Samaria lanü rocho azikehrüti rühsü müthahpücho.

¹⁹Israel yangdi apüm la, yangthsarütinü müyudsirü mübüji thsanü ABÜDONGBA rihlong chürosohcho, hiri apüm tsü Yangthsaba Josianü thsangnyangjücho. Abinü Bethel la khüta nguchicho hütsü kyo bholu apüm chah nguchicho.

²⁰Abinü müyudsirü bebürüti apüm arüh palu bholu michahnü kyüsehcho ko abinü bholu müipi chah nyitsarü rüh tahcho. Hütsüpü abinü Jerusalem lang thalicho.

²¹Yangthsaba Josianü yuzeng vakha la thrah licho kyo, ABÜDONGBA arüh Tsingrang neng dhichi Phungkhu Thsüti müzeh mungnung müyurü khyang yuzeng jücho.

²²Yukharünü yangthsathsaba shikhe tinü Israel ko Judarü yangthsarü sünüsü Phungkhu Thsüti hiroh-i mükhyodheng.

²³Ade achangka la, Josia yangthsathsaba kang dhüre-keh-u la, Phungkhu Thsüti tsü Jerusalem la müzeh mungcho.

²⁴Amungthriba Bebüba Hilkianü Amübükuh la nguba vakha la thrah zehba tsü bichinung nengdang, Jerusalem ko Juda lih apüm lanü azi-amongrü, kuh tsingrang, kyothri ko müyudsirü mübüba kohroti apüm Yangthsaba Josianü pehcho.

²⁵Lasih, thoh ko tase apümnü Mosa yuzeng apüm bichi ABÜDONGBA dikehrü abi belang Yangthsarü süsü mülicho; ko abi khanglangsü hütsü kyo yangthsarü süsü mülicho.

²⁶Ta Yangthsaba Manase nguchi khu Juda michah ABÜDONGBA rihlong chürocho ade yingcheh müchangkhoh.

²⁷ABÜDONGBAnü yocho, “Ihnü Israel te nguchicho kyo Juda chahsü nguchinung: Ihnü I nahtse tenü Judarü khingchinung ko Ihnü throchehba Jerusalem yangdi ko Ih mübüsohnung müdüm Amübükuh tsü mükhyüchonung.”

²⁸Yangthsaba Josianü nguchicho lüpcho tsü Juda yangthsarü Yukheh la thrah lile.

²⁹Josia Yangthsaba lide, Assyria Yangthsaba tronung Ijiprü Yangthsaba Neko Eufrates Yongkhi chii rothsarü mülung khüdu nüpü jowücho. Hütsüde Yangthsaba Josianü Ijiprü rothsarü tsü Megido la yatinung müküpcho ko khata la tsü abi kyüsehcho.

³⁰Abi pohki adirütinü ame tsü kuri kari la Jerusalem lang thali hirocho ko yangthsarü kongyo la dhrürangcho. Judarünü Josia tsurü Joahaz tsü Yangthsaba kangsohcho.

³¹Joahaz tsü Juda la Yangthsaba kangde kang mükyüpü asang azirü thsacho ko abinü Jerusalem la choo asang yangthsacho. Atpa tsü Libna yangdi lanü Jeremia tsurü Hamutal licho.

³²Abi jümürü kyo, abinü ABÜDONGBA nyüm amünyi shitpahcho.

³³Ijiprü Yangthsaba Nekonü abi Hamath lih la abi rangnü Ripla la nowücho ko Judarü khyang akhüm taripi shekel süreh hajar asang thsih müyü, ko hon süreh sangrepü müyü jüsohcho ko hütsüta Joahaz yangthsathsaba tsü changkacho.

³⁴Yangthsaba Nekonü Juda la tsü Josia tsurü Eliakim Yangthsaba kangsohcho ko aneng Jehoiakim mülih jücho. Joahaz tsü Yangthsaba Nekonü Ijip lang nowücho ko abi hütsüla sücho.

³⁵Ijip Yangthsaba khyang akhüm jünung shulüm, Yangthsaba Jehoiakimnü müyurü chahnü arüh kuthsi aichi amüthsüh khyücho.

³⁶Jehoakim tsü Juda la Yangthsaba kangde, abi kang mükyüpü münga azirü thsacho ko abinü Jerusalem la kang dhüre-kheh yangthsacho. Atpa tsü Rumah lanü Pedaia tsulatpü Zebida licho.

³⁷Abi jümürü kyo, Jehoiakim nüsü ABÜDONGBA nyüm amünyi shitpahcho.