Read Sangtam Naga 2 YANGTHSARÜTI 24 Bible Online

2 YANGTHSARÜTI 24 - Sangtam Naga bible

2 YANGTHSARÜTI 24

¹Jehoiakim Yangthsade Babylon Yangthsaba Nebukadnezarnü Juda mahcho ko kang asang Jehoiakim tsü khingnü abi müpuhsohcho; ta akhanglang abi nyüm yacho.

²ABÜDONGBA azikehrü khu choyohcho kyo, Juda changsohnung Babylonrü, Syriarü, Moabrü ko Amonrü rothsarüti müthehcho.

³Yangthsaba Manasenü amünyi shitpahcho ngang Abi tenü Judarü apüm iipehnung ABÜDONGBAnü yuzeng jücho roh-i tikehcho,

⁴Ko alathsa abinü achomükeh nyitsarü müpsehcho ngang ABÜDONGBAnü Manase khyang mülang müpehjüchehcho.

⁵Jehoiakimnü nguchicho lüpcho, Juda Yangthsarü Yukheh la thrah lile.

⁶Jehoiakim sücho ko Jehoiakhin tsü abi mülih Yangthsaba kangcho.

⁷Ijip Yangthsaba ko abi rothsarütinü hütsütinü khodesü Ijip lanü apalang müshehmüicho, tunüo Babylon Yangthsabanü adelü Ijiprü lih apüm Eufrates Yongkhi lanü Ijip kihku lahpi lurüh chii khyüpü licho.

⁸Jehoiakhin tsü Juda la Yangthsaba kangde, abi kang dhüre-keh azirü thsacho ko abinü Jerusalem la choo asang yangthsacho. Atpa tsü Jerusalem lanü Elnathan tsulatpü Nehushta licho.

⁹Au kyo, abinüsü ABÜDONGBA nyüm amünyi shitpahcho.

¹⁰Abi yangthsathsa bekhyah Babylon rothsarü Yangthsaba Nebukadnezar pohki adirünü nüpü ro Jerusalem mahcho.

¹¹Hütsü betiyade, Nebukadnezar apu Jerusalem lang rocho,

¹²ko Yangthsaba Jehoiakhin-nü atpa, atsurü, abi thsazirüti ko Yangthsaba kuhla dikehrüti zeh noro Babylonrü müpuhcho.

¹³Nebukadnezar yangthsathsaba kang keh-u la, abinü Jehoiakhin rangnü Amübükuh ko Yangthsaba kuhla licho kuthsi apüm zeh Babylon lang hitsicho. ABÜDONGBAnü yocho kyo, Amübükuh la bichinung Yangthsaba Solomon-nü külüpcho hon shingtbhürü apüm Nebukadnezarnü thsangnyangjücho.

¹⁴Nebukadnezarnü Jerusalem lanü, Yangthsaba tsurüti apüm, azirüti apüm, atümungnü hajar dhüre rang tsicho. Abinü Juda la iilüm-ifürü chah khu ikengrü mii zeh sihthsa nguchirü apüm kümtsicho.

¹⁵Nebukadnezarnü Babylon lang Jehoiakhin yola atpa, anitpü, thsazirüti ko Juda la azirüti apüm rang notsicho.

¹⁶Nebukadnezarnü athsütah nyitsarü apüm notsicho, atümungnü hajar dhünyeh ko ikengrü mii zeh sihthsa nguchirü hajar khüdu, arüh apüm tase zeh ko khatanung adekheng amüthsi thsacho.

¹⁷Nebukadnezarnü Juda la tsü Jehoiakhin au azaba Matania tsü Yangthsaba kangsohcho ko aneng Zedekia mülihjücho.

¹⁸Zedekia tsü Juda la Yangthsaba kangde, abi kang mükyüpü kheh azirü thsacho ko abinü Jerusalem la kang dhüre-kheh yangthsacho. Atpa tsü Libna yangdi lanü Jeremia tsulatpü Hamutal licho.

¹⁹Yangthsaba Jehoiakimnü nguchicho kyo, Yangthsaba Zedekianüsü ABÜDONGBA nyüm amünyi shitpahcho.

²⁰ABÜDONGBAnü Jerusalemrü ko Judarü te khütang rihlong chürocho, hütsünü abi betenü arüh iipehcho.