Read Sangtam Naga 2 YANGTHSARÜTI 25 Bible Online

2 YANGTHSARÜTI 25 - Sangtam Naga bible

2 YANGTHSARÜTI 25

¹Zedekianü Babylon Yangthsaba Nebukadnezar nyüm yacho, achotsü Nebukadnezarnü Zedekia yangthsacho kang düku, choo dhüre ko nyümong dhüreu la, abi rothsarü nüpü ro Jerusalem mahcho. Arühnü yangdi jüp müdongcho, hütsü mükang tbünü tbüticho

²ko Zedekia yangthsacho kang dhüre-kheh chii beti yohpücho.

³Hütsüba kang choo müyü ko nyümong düku-u la, yangkong tsü diracho ko nyitsarü tu atsunung mülichonü,

⁴yangdi tbü tsü müp-phohcho. Babylonrünü yangdi tsü mükangtipü linye, aromangnü rothsarü apüm tsikhangpehcho. Arühnü Yangthsaba tbü khu jingnü wü züdi anyüh müchikehta la tsü trahtri khu Jordan Ngah lang rang tsicho.

⁵Ta Babylonrünü Yangthsaba Zedekia tsü iiwü Jeriko ngah la rangcho ko abi rothsarü apümnü abi pehjücho.

⁶Zedekia tsü Ripla yangdi la Yangthsaba Nebukadnezar yang nowücho ko hütsüla Nebukadnezarnü abi yu khacho.

⁷Zedekia apunü dhengya, atsurüti süsohcho; hütsüpü Zadekia nah hehchehpehjücho ko ixilihnü rahpü Babylon lang nowücho.

⁸Babylon Yangthsaba Nebukadnezar kang dhüre düku-u, choo münga ko nyümong dhünyeh-u la, abi khyang lümlong jürü ko rothsarü anüchirü Nebuzaradan-nü Jerusalem la zürocho.

⁹Abinü Amübükuh, Yangthsaba kuh ko Jerusalem la atungte nyitsarüti kuh trüp-pehjücho,

¹⁰ko abi rothsarütinü yangdi tbü mapnahjücho.

¹¹Hütsüpü yangdi la nying liba nyitsarüti, sihthsa nguchirüti ko Babylon pehjürüti apüm Nebuzaradan-nü Babylon lang kümtsicho.

¹²Ta abinü Juda la ailüm-ifürü, alih mülirüti du shükusiluh la nguchinung pehjücho.

¹³Ko Babylonrünü, Amübükuh la imüyengnü külüpcho dongditi, amüdongkehji, imüyeng kihbong mapnahnü apüm tsü Babylon lang hitsicho.

¹⁴Arühnü bholu chah bichiba michüthsohlung, tavi yohsing, dsi külüpba kohro, ashüh yohba mütpah-tbhü, müchiji tahba mütpah-tbhü ko bichiba imüyeng kohro lüpcho hitsicho.

¹⁵Hon ko taripinü külüpcho lüpcho, michüh biji mütpah-tbhü azangzang apüm hitsicho.

¹⁶Yangthsaba Solomon-nü külüpcho imüyeng kohroti-dongdi anyüh, amüdongkehji ko kihbong hiri ho-dhengnunglü mülingracho.

¹⁷Dongdi anyüh tsü akyota, athsenglang khehap dhüre-keh ko abemi la imüyeng yahthri khehap asang licho. Ko abemong mükang tsü imüyengnü tsanümsih yah yoh külüpcho.

¹⁸Hütsü chah lahkeh, Nebuzaradan-nü Amungthriba bebüba Seraia, chitungba Zefania ko amübükuh la atungte adirü asang, arangyoh lang notsicho.

¹⁹Yangdi la tsünü abinü rothsarü yola anüchiba, yangdi la mütsie liba Yangthsaba khyang lümlong jürü arüh münga, rothsarü athrahba anüchiba chitung ko apa atungte nyüh rohre abinü nücho.

²⁰Nebuzaradan-nü arüh tsü Hamath lih Ripla la liyaba Babylon Yangthsaba yang norocho.

²¹Hütsüla Yangthsabanü arüh xüpsehsohcho. Hütsüta Judarü tsü yangtsi lang kümtsicho.

²²Babylon Yangthsaba Nebukadnezarnü Shafan shümtsurü ko Ahikam tsurü Gedalia tsü Juda la governor kangsohcho ko Babylon lang münotsirü apüm xükümnung yohpüjücho.

²³Khode nying lirü Judarü adirü ko rothsarütinü hütsü yuchicho, arühnü Mizpa la Gedalia yola zehcho. Hiri adirüti tsü Nethania tsurü Ishmael, Karea tsurü Johanan, Netofa yangdi lanü Tanhumeth tsurü Seraia ko Maka lanü Jezania.

²⁴Gedalianü arüh te yocho, “Nührünü Babylonrü thsazirüti drünung tu müdhsüdah pü Ihnü nührü te yore. Hiba lih la lieng, Babylon Yangthsaba dikehng ko nührü nengdang lüpcho tsa linung.”

²⁵Ta hütsüba kang choo dhünyeh-u la Elishama shümtsurü, Nethania tsurü Ishmaelnü nyüh dhüre nüpü Mizpa lang wücho ko Gedalia kyüsehcho. Abinü hütsüla abi yola liba Israelrü ko Babylonrüsü kyüsehcho.

²⁶Hütsünü Israelrü alirü ko ailümrü apüm rothsarü anüchirü yola tsü Ijip lang rang tsicho, tunüo arühnü Babylonrü drücho.

²⁷Babylon la Evilmerodak tsü Yangthsaba kangba kang la, abinü Jehoiakhin akhangti lanü mütheh abi te amüi ngusohcho. Hütsü Jehoiakhin rang tsipü kang sangrepü dhünyeh choo dhüre anyüu nyümong mükyüpü dhünyeh-u la tikehcho.

²⁸Evilmerodaknü abi te tsa bichicho ko Babylon la abi yola aparü yangtsirü Yangthsarüti tenü abi khyang alaa adhichi jücho.

²⁹Hütsüta Jehoiakhin tsü akhangti la khyüba jengki mülihpü abi akang ayung Yangthsaba tsingthsang chah tsuyongnung mülajücho.

³⁰Abi akangli ayung, nyümong mükhu abi thsütah la bichinung thsi jücho.