Read Sangtam Naga 2 YANGTHSARÜTI 5 Bible Online

2 YANGTHSARÜTI 5 - Sangtam Naga bible

2 YANGTHSARÜTI 5

¹Naman tsü Syria rothsarü michah anüchiba ko dee jengreng jüba ko Yangthsabanü mii dee khichicho, tunüo Naman khu ABÜDONGBAnü Syriarü khyang akoh amülah jücho. Abi athrungrü khüdu, ta abi mübhira kehcho.

²Arühnü Israelrü mahde, Syriarünü Israel-larü azarü khüdu rang rocho ko abükyü tsü Naman nitpü kulilarü kangcho.

³Nyümong khüdu azatpü tsünü abüdongtpü te yocho, “I büdongba hi Samaria la azikehrü yang wüsohnyüle. Abinü abi dhsara lanü kyangjüchehnung.”

⁴Khode Naman-nü hütsü yuchicho, abinü Yangthsaba yanglang wünü azatpünü yoba tsü abi te yocho.

⁵Yangthsabanü yocho, “Vathrah hi bipü Israel Yangthsaba yang wüng.” Achotsü Naman-nü taripi hajar sangre, hon hajar dhüroh ko shü atsauba dhürepi mülihnung hijüpü shemüsucho.

⁶Abinü hiba vathrah la tsü hita thrah zehcho: “Hiba vathrahnü I pohki adirü nü khyang müdhesohre. Nühnü abi dhsara lanü kyangjüsohnyüre.”

⁷Khode Israel Yangthsabanü vathrah tsü khicho, abinü awahchonü ajengki rehnah yocho, “Syria Yangthsabanü Ihnü khüta hivi kyangjüsohnung longdiro? Abi I akang asü zii kehba Tsingrangepü lümrü mah-o? Hi I te khata chüronung münyehchirüba lile!”

⁸Khode azikehrü Elishanü hütsü yuchicho, abinü Yangthsaba yang yu jücho: “Nüh tuepü hidoi mükünyangro? Nyitsarüba tsü Ih yang rosohng ko Ihnü Israel la azikehrü khüdu lilepü ngusohnung!”

⁹Achotsü Naman-nü abi kuri kari nüpü wücho ko Elisha trahtri te nyehlicho.

¹⁰Elishanü akuliba chüdunü hita yosohcho, “Wüng ko apu jangjang Jordan Yongkhi la dhünyehpili mütsahpehng ko nü dhsara lanü kyangnung.”

¹¹Ta Naman-nü zichüro hita cho tsicho, “Abinü chüro I te shiro, abi ABÜDONGBA Tsingrang te dangkhidangnangjo, mathsa ade akheh dhimüsu Ih kyangjünung thsaepü Ihnü lümcho.

¹²Ko Damaskas la Abana yongkhi ko Farpar yongkhi tsü Israel la yongkhi tenü atsauba mahrü do? Ihnü hütsüri la mütsah kyangnung kohle!”

¹³Abi kulirütinü wü abi te yocho, “Adirü, azikehba tsünü nü te nguchi athsah khüdu nguchinung yolanglü, nühnü nguchi pehpü linung. Ade abinü yocho kyo tsü nüpu jangjang mütsahdung ko kyangsohng.”

¹⁴Achotsü Naman-nü Jordan lang tsü züducho ko Elishanü yocho kyo dhünyehpili dhsangcho ko abi kyangpehcho. Abi fü akhunga fü kyo tsa kyangpehcho.

¹⁵Abinü Elisha yanglang abi nyitsarü apüm nüpü thali wü yocho, “Adelü Israel Tsingrang chah khu apa Tsingrang mülepü Ihnü müdheko; hütsüeko yanglilüm I jiyü hi khyüchojüng, adirü.”

¹⁶Elishanü yocho, “Ihnü dikehba ABÜDONGBA nengla Ihnü jiyü mükhyünung yuchümre.” Naman-nü khyüjüng pü dee kihchicho ta abinü mükhyücho.

¹⁷Achotsü Naman-nü yocho, “Nühnü I jiyü mükhyüchokhang, I khyang gadu anyünü I kuh lang alih hiwüsohnung mülajüng, tunüo ade tinü ABÜDONGBA chah khu tu tsingrang khyangsü Ihnü kangmübü mahkhang trüp mübü müjünung.

¹⁸Hütsünü Ihnü khode Yangthsaba müyang Syria tsingrang Rimon amübükuh lang mübünung Ih wonang, ABÜDONGBAnü I khyang mülangpehjünung Ihnü longdire. ABÜDONGBAnü yuje I khyang mülangpehjünung.”

¹⁹Elishanü yocho, “Tsa wüng.” Ko Naman tsicho. Abi azachah tsipü,

²⁰Elisha kulibong Gehazinü lümcho, “I abüdongbanü Naman chahnü tusü mükhyüpü tsisohko. Syriabanü jüba tsü abinü khyüba thsako. ABÜDONGBA nengla Ihnü shangwü lango dusü khyünung.”

²¹Achotsü abinü Naman khanglang iiwücho. Khode Naman-nü arüh khanglang nyüh khüdu shang roya ngucho, abinü apu kuri kari lanü tsohcho wü abi shiro abi te yocho, “Tunang thsamehcho mah-o?”

²²Gehazinü yocho, “Mah.” “Ta ade Efraim azong lih langnü azikehrü anyüh roko ko arüh khyang jünung taripi hajar asang ko shü anyüpi mülihnung jüngpü nü te yosohnung Ih rosohre.”

²³Naman-nü yocho, “Yanglilüm taripi hajar dhüroh khyüng.” Abinü emüthsa taripi tsü shibha anyüh la tüm jücho ko anyüpi mülihnung jengki abi kulirü nyüh anyüh khyang hisohpü Gehazi belang mütheh arüh thalisohcho.

²⁴Arühnü Elisha liba akhang tsü chihde, Gehazinü shibha anyüh tsü khyo akuh la hizüducho. Hütsüpü abinü Naman kulirü anyüh tsü thali tsisohcho.

²⁵Abinü kuh lang tsü thali züducho ko Elishanü abi te tsingdhengcho, “Nüh khüde wücho?” Abinü yocho, “Adirü, Ih khüdesü müwü.”

²⁶Ta Elishanü yocho, “Nü mütohnung nyitsarüba tsü kuri kari lanü jürodesü Ih anbü la hütsüla mülicho do? Hiba bekhyah hi thsi, jengki, olive tuji, tbü, shükusiluh, san, misü mahkhang kulirü khyünung bekhyah mah!

²⁷Hütsüeko ade Naman dhsara tsü nü chah küronung ko hütsü nüh ko nü shümtsurü chah müchangkapü linung.” Gehazi hütsü lanü tsidunü, abi chah mübhira tsü chürocho ko abi küp tsü shurü kyo thrucho.