Read Sangtam Naga 2 YANGTHSARÜTI 7 Bible Online

2 YANGTHSARÜTI 7 - Sangtam Naga bible

2 YANGTHSARÜTI 7

¹Elishanü lalingcho, “ABÜDONGBAnü tu yoro nyidheng. Atu hitadelü Samaria la nührünü litoh atsauba tsü süreh asang mahkhang lüdi süreh dhüroh la taripi shekel khüdunü lihnung ngunung.”

²Yangthsaba dikehbanü Elisha te yocho, “Ade tsatsa ABÜDONGBA apunü tsing mütheh nye, hütsüta tikehnung mükoh.” Elishanü yocho, “Hütsü tikehcho nühnü ngunung, ta nühnülü hütsüri mütsuchehnung.”

³Ade hütsüla mübhira kehrü arüh nyüh müyü Samaria tbükhüm mihlang licho ko arühnü chota yocho, “Tuepü Ihsa müsüde hila pümnung?

⁴Yangdi la züdunungsü müdhsüdah, tunüo hütsülasü kongseh sünung; mahkhang Ihsanü hila püm nye sünung. Hütsüeko Ihsanü Syriarü müdongchah züdunung; amütsa nguchiekhang arühnü Ihsa süsohnung, ta kümüdeo arühnü Ihsa müsüsohnungsü kohle.”

⁵Achotsü, maa rode, arühnü Syriarü müdongchah tsü züducho, ta arühnü hütsü chihde, hütsüla süsü mülicho.

⁶ABÜDONGBAnü Syriarü khyang arorüh mülung amülah kuri ko kuri kari nüpü rocho yuva yuchisohcho ko hütsü Israel Yangthsabanü arüh mahnung Hit-rü ko Ijiprü Yangthsarüti ko arüh rothsarüti mülih nüpü rolepü lümcho.

⁷Achotsü hütsü romangnü Syriarü tsü arüh shükuh, kuri ko gadu ko amüdongchah abübü pehjüpü arüh akang nengdang rang tsicho.

⁸Khode arüh müyü tsü amüdongchah müdsu-o lang ro chihcho, arühnü shükuh khüdu la züducho ko hütsüla licho tsü tsuyongcho, hon, taripi ko jengki khyücho ko hichüdu rang yohpücho; hütsüpü thali shükuh apa khüdu la züducho ko hütsüta nguchicho.

⁹Hütsüde arühnü hita chotacho, “Ihsanü athsalang münguchire. Hi yusi atsa nyümonge ko Ihsanü rang müyohpübae. Ihsanü hütsü tsingse müchochikhang, Ihsa khingchiriri. Ihsanü ade tsatsa wü Yangthsaba pohki thsazirüti te yonung!”

¹⁰Hütsüta arühnü Syriarü müdongchah tsü pehjüpü Samaria lang thali wücho ko tbükhüm la anyahrüti dsicheh yocho: “Ihrünü Syriarü müdongchah tsü wüdhengko ko hütsüla süsü müngu ko tu yuvasü müyuchi; gadu ko kuriti xohchingpüle ko shükuhti tsü Syriarünü apehjü shüshü lile.”

¹¹Anyahrütinü yusi tsü sobhocho ko Yangthsaba kuhla müdhesohcho.

¹²Hütsü amala thsacho ta Yangthsabanü suro abi pohki thsazirüti te yocho, “Syriarü lümchung tsü Ihnü nührü te yonung! Hila yangkongcho tsü arühnü müdhele, hütsünü arüh müdongchah pehjüpü wü rangmülang tsü jüm-pümle. Ko tsuyongba yangchi Ihsa yangdi pehjüpü wüde, arühnü Ihsa yangdi khyünung ko Ihsa akangnü rangnung lümle.”

¹³Abi thsazirüti yola nyüh khüdunü yocho, “Ta hiba yangdi la lirüti asürüti kyo alongdi müle. Hütsüeko, tu tikehchonang müdhenung Ihsanü nyüh münga kuri nüpü müthehnung.”

¹⁴Achotsü arühnü nyitsarü khürü throcheh Yangthsabanü arüh te Syriarü rothsarüti chah tsü tu tikehchonang müdhenung kuri kari anyüh la müthehcho.

¹⁵Arühnü Jordan chii wücho ko lang ayung tsü Syriarünü arüh rang tside pehjo tsicho jengkiti ngucho. Achotsü arühnü thali ro Yangthsaba te yocho.

¹⁶Hütsüpü Samaria la lirütinü tsohkhuta wü Syriarü müdongchah tsünü kohro tsü zang khyücho. Ko ABÜDONGBAnü yocho kyo, litoh atsauba süreh asang mahkhang lüdi süreh dhüroh la taripi shekel khüdu ngang du icho.

¹⁷Ade yangdi tbükhüm tsü, Israel Yangthsaba apu dikehba khyang nyahsohcho. Hütsü Yangthsabanü Elisha shirünung wüde Elishanü choyohcho kyo, müyurünü Yangthsaba dikehba tsü dhrümseh licho.

¹⁸Hütsü Elishanü Yangthsaba te hütsütadelü Samaria la litoh atsauba süreh asang mahkhang lüdi süreh dhüroh ngang taripi shekel khüdu ngang du inungepü yode,

¹⁹adiba tsünü, “ABÜDONGBAnü hütsütadenü tsing mütheh nye, hütsüta mütikehcheh pü lalingcho. Ko Elishanü lalingcho, Hütsü tikehcho nühnü ngunung, ta nüpunülü hütsü mütsutpahnung.”

²⁰Ko hütsüta abi chah tikehcho, abi yangdi tbükhüm la tsü müyurünü dhrümseh sücho.