Read Sangtam Naga 2 YANGTHSARÜTI 8 Bible Online

2 YANGTHSARÜTI 8 - Sangtam Naga bible

2 YANGTHSARÜTI 8

¹Ade Elishanü Shunemlatpü, sü tsurü abinü kanglisohcho abükyü te, ABÜDONGBAnü kang dhünyeh nengdang yangkongthsükong müthehre, hütsüeko müdüm palang arüh kukhi wü linung yocho.

²Abükyünü abi yu nyi akukhi nüpü wü Filistia la kang dhünyeh licho.

³Kang dhünyeh changkade, abükyünü Israel lang thali rocho ko abükyü kuh ko alih chinglinung Yangthsaba yanglang wücho.

⁴Abükyünü Yangthsaba tsü Elisha kulirü Gehazi te chotachi ya ngucho; Yangthsabanü Elishanü thsayahiya nguchiba nengdang chota licho.

⁵Elishanü asücho khüdu kanglisohcho nengdang, Gehazinü Yangthsaba te yo yade, khingkutpünü Yangthsaba te abükyü thsütah kihchicho. Gehazinü abi te yocho, “Adibong, Elishanü kanglisohba dhrezaba ko atpa nyüh tsü hila lile.”

⁶Yangthsaba atsingdhengba lalingnü, abükyünüsü Gehazinü yoba tsü yuzi jücho, achotsü Yangthsabanü abi adirü khüdu dsi abükyü khyang tsü abükyü yo lüpcho ko abükyü mülide kang dhünyeh chisichehcho amii jünung yocho.

⁷Syriarü Yangthsaba Benhadad füthsa lide Elishanü Damaskas lang wücho. Khode Elisha hütsüla lile pü Yangthsaba te yocho,

⁸abinü abi pohki adirü khüdu Hazael te yocho, “Azikehba khyang tsü jiyü hijüng ko wünü abi te Ih kyangnung mükyangnung ABÜDONGBA te tsingdhengjüngpü young.”

⁹Achotsü Hazaelnü Damaskas lanü chürocho adhangpi ut yüre khyang zang mühehpü Elisha yanglang wücho. Khode Hazaelnü abi shirücho, abinü yocho, “Nü dikehrü Yangthsaba Benhadadnü abi kyangnung mükyangnung tsingdhengsohnung nü yanglang Ih rosohre.”

¹⁰Elishanü yocho, “ABÜDONGBAnü abi sünungepü I te mishako; ta wüng ko abi telü kyangnungepü young.”

¹¹Hütsüpü Elishanü Hazael romih chah nahmüdri dhengcho ko hütsünü abi füthsa kangcho. Dhrongyengnü Elisha nahshükih sho tracho.

¹²Hazaelnü yocho, “Adirü, nüh tuepü traro?” Elishanü yocho, “Tunüo nühnü Israelrü nyüm adrünung nguchi nguchinung Ihnü müdhele. Nühnü arüh roshengvi la michang thsürangjünung, arüh dhrezarü nyükheh atsauti kyüsehnung, arüh tsuzarüti xüpsehnung ko atsuzehrü khingkurü mibong xaphohjünung.”

¹³Hazaelnü yocho, “Ih tu mah! Ko khütapü Ih hütsüdoi tase linung.” Elishanü yocho, “Nüh Syria Yangthsaba kangnung ABÜDONGBAnü I te ngusohko.”

¹⁴Hazael thali wüde Benhadadnü abi te tsingdhengcho, “Elishanü tu yocho?” Hazaelnü yocho, “Nüh kyangnungepü abinü I te yoko.”

¹⁵Ta nyümong khüu Hazaelnü alangchi shü khüdu hiro hütsü kih la thsangpü Yangthsaba chah phakehjo sahmüro süsohcho. Ko Benhadad mülih Syria la Hazael Yangthsaba kangcho.

¹⁶Israel Yangthsaba Ahab tsurü Joram Yangthsathsaba kang müngau la,

¹⁷Jehoshafat tsurü Jehoram tsü kang sangrepü anyüh thsade, Juda Yangthsaba kangcho ko abinü Jerusalem la kang keh yangthsathsacho.

¹⁸Anitpü tsü Ahab tsulatpü ko Ahab kukhi kyo abinü Israelrü Yangthsarü amünyi lang la iiwücho.

¹⁹Abinü ABÜDONGBA nyüm amünyi shitpahcho, ta ABÜDONGBAnü Juda müchangjünyücho, tunüo Abinü David te abi trah lanü lede yangthsasohnung nyengcho licho.

²⁰Jehoram chichah Edomnü Juda nyüm yacho ko pathsa yanglih kangcho.

²¹Achotsü Jehoramnü Edomrünü arüh bete liba Zair lang tsü abi kuri kariti nüpü shemüsucho. Aromang tsü abi ko abi kuri kariti anüchiba nyüh tsü tsicheh tsicho ko abi rothsarüti palu kuh yangchi tsipitsizacho.

²²Hütsütinü Edom tsü Juda tenü pathsa yanglih kang lirocho. Hütsü bekhyah tsü Libna yangdi nüsü nyüm yacho.

²³Jehoramnü nguchicho lüpcho Juda Yangthsarüti Yukheh la thrahyoh lile.

²⁴Jehoram sücho ko David yangdi la yangthsarü kong la dhrürangcho ko atsurü Ahazia tsü Yangthsaba kangcho.

²⁵Israel Yangthsaba Ahab tsurü Joram yangthsathsaba kang dhüre anyüu la,

²⁶Jehoram tsurü Ahazia tsü abi kang mükyüpü anyüh thsade Juda la Yangthsaba kangcho ko abinü Jerusalem la kang khüdu yangthsathsacho. Atpa tsü Israel Yangthsaba Omri shümtsurü ko Yangthsaba Ahab tsulatpü Athalia licho.

²⁷Ahazia tsü Yangthsaba Ahab tsunyahrü thsachonü, Ahab kukhi kyo, abinü ABÜDONGBA nyüm amünyi shitpahcho.

²⁸Yangthsaba Ahazianü Syriarü Yangthsaba Hazael te khatanung nengdang Yangthsaba Joram yola zehcho. Rothsarüti tsü Ramoth-gilead la chitade khata la Joram lerohpehcho.

²⁹Abinü abi mathsa kyangsohnung Jezrel yangdi lang thali rocho ko Ahazianü abi xodhengnung hütsülang wücho.