Read Sangtam Naga 2 YANGTHSARÜTI 9 Bible Online

2 YANGTHSARÜTI 9 - Sangtam Naga bible

2 YANGTHSARÜTI 9

¹Hütsütade azikehrü Elishanü azikehrü azabarü yola nyüh khüdu dsinü abi te yocho, “Rungnüm ko Gilead la Ramoth yang wüng.

²olive tuji füh hi hieng ko khode hütsü chihnang, Nimshi shümtsurü ko Jehoshafat tsurü Jehu yangching. Abi arüh müyangrü yolanü nükhu pathsa nowüng,

³ko tuji hi athahchah tungkehjo young, ‘ABÜDONGBAnü nüh Israel la Yangthsaba throre pü mishako.’ Ko hütsü lanü dhsüthsa tsieng.”

⁴Achotsü dhrezaba azikehba tsü Ramoth lang wücho,

⁵hütsüla abinü rothsarü anüchirüti shibülung li ngucho. Abinü yocho, “Adirü, nü nengdang yusi khüdu lile.” Jehunü tsingdhengcho, “Ihrü yola süte yoro?” Abinü lalingcho, “Adirü, nü te yore.”

⁶Hütsüpü anyüh tsü kuh yonglang züducho ko dhrezaba azikehba tsünü Jehu thah chah tuji tsü tungkehjo yocho, “ABÜDONGBA, Israel Tsingrangnü hita mishako: ‘Ihnü nüh I müyurü Israel michah Yangthsaba throchehre.

⁷I azikehrüti ko I dikehrü aparü mapsehcho ngang Ihnü Jezebel khingchinungthsa, nühnü nü abüdongba Yangthsaba, Ahab tsurü tsü kyüsehng.

⁸Ahab kukhirü ko tsutpu apüm changsohnung; ko Israel lih la Ahab kukhilanü adhrerü, ayurü ko nyüje apüm Ihnü kyopehnung.

⁹Ihnü Israel Yangthsaba Jeroboam ko Israel Yangthsaba Baasha kukhiti te nguchicho kyo, Ihnü abi kukhi te nguchinung.

¹⁰Jezebel me tsü dhrürang müpehnung; ta hütsü Jezrel lurüh la füzanü tsunung. Hütsüta yopü khanglang, dhrezaba azikehba tsü hütsü lanü rang tsipehcho.’ ”

¹¹Jehunü arüh müyangrü thsazirüti yanglang thali wücho ko arühnü abi te tsingdhengcho, “Tu yusi amütsa mülimado ang? Amükyang tsünü nü te tu yocho?” Jehunü lalingcho, “Abinü tu yonyüro hütsü nührünü müdhele.”

¹²Arühnü lalingcho, “Ihrünü mümüdhe. Abinü tochonang ihrü te young.” ABÜDONGBAnü yore, “Ih Israel la Yangthsaba müyühjo throre pü I te yoko.”

¹³Hütsütade, Jehu müyangrü thsazirüti tsünü Jehu yasohnung phaqu amichahba chah tsü arüh fükhüm khyangcho ko rühti mehnü züdecho, “Jehu Yangthsaba kangko.”

¹⁴Hütsüpü Jehunü Yangthsaba Joram, sü Syria Yangthsaba Hazael te Ramoth la khatade lerohpehcho mathsa kyangsohnung Jezrel la licho abi nyüm yacho.

¹⁵Achotsü Jehunü abi shangrü thsazirüti te yocho, “Nührü I yola zehkhang, sünüsü Ramoth lanü chüdu Jezrel la lirü khyang yuva tüjü.”

¹⁶Hütsüpü abinü kuri kari la pümpü Jezrel lang shemüsucho. Hütsü yingcheh Joram tsü mükyangecho ko Juda Yangthsaba Ahazia tsü hütsüla abi xodheng licho.

¹⁷Jezrel la roshengvi lanü anyahrü khüdunü Jehu ko abi nyitsarüti roya ngucho. Abinü züdecho, “Nyitsarü khürü ro ngule.” Joramnü lalingcho, “Arüh tsü abürü a arorühnang dhengnung kuri nyitsarü khüdu müthehng.”

¹⁸Yuhiba tsünü Jehu yanglang wünü abi te yocho, “Nüh shangrü kang rorüh a mahnang Yangthsabanü müdhenyüre.” Jehunü lalingcho, “Hütsü nü nguchi mah. I khanglang shehkhung.” Roshengvi la liba anyahba tsünü yocho, yuhiba tsünü amülung tsü chihko ta thali rocho müngu.

¹⁹Apa yuhirü khüdu müthehcho ko abinüsü Jehu te akyokyo tsü tsingdhengcho. Anyüpiusü Jehunü lalingcho, “Hütsü nü nguchi mah! I khanglang shehkhung.”

²⁰Adesü anyahba tsünü yocho, “Yuhiba tsü wü amülung tsü chihko ta thalicholü müngure. Amülung la anüba tsü amükyangrü kyo abi kuri nole, Jehu kyo ngule.”

²¹Yangthsaba Joramnü yuzeng jücho, “I khyang kuri kari rungnümjüng.” Hütsüta rungnümjücho ko abi ko Yangthsaba Ahazia nyühnü palu kuri kari chah pümpü Jehu shirünung shemüsucho. Arühnü Naboth lih la shirütacho.

²²Joramnü tsingdhengcho, “Nüh yangtsa la rorüh mah-o?” Jehunü lalingcho, “Nü tpanü dikehcho amonglarü ko kyothri hiri ihrü te linü, khütapü yangtsa linung?”

²³Joramnü Ahazia te, “Hi kihyochürüe,” ko yo ximüla rang tsicho.

²⁴Jehunü singthsalu dhimüsucho ko abi tase apümnü tbüdeng khüdu kyakehjücho ko hütsünü Joram khangtung lanü alasih la khakhu kyacho.

²⁵Joram tsü apu kuri kari la khülutsu sücho ko Jehunü abi trorü Bidkar te yocho, “Ame tsü throrung ko Naboth luh la tsü dhiyohchüpehng. Ihjü Joram au Ahab khanglang rachide, ABÜDONGBAnü Ahab nyüm hita chocho lümkehng:

²⁶‘Ihnü atü Naboth ko atsurü kyüsehcho nguko. Ko Ihnü nühsü hiba lih müdüm la rühyangnung yuchümre.’ Jehunü apu troba te tsü yocho, Hütsüeko Joram me tsü throung ko ABÜDONGBA yu tikehnungthsa, hütsü Naboth lih la tsü pehng.”

²⁷Yangthsaba Ahazianü atikehcho tsü ngucho ko abinü abi kuri kari lanü Beth Hagan yangdi lang rang tsicho ko Jehunü abi iiwücho. Jehunü abi nyitsarü te yuzeng jo yocho, “Abisü kyüsehng!” ko abinü Ibleam yangdi shündhün Gur langlang tside, arühnü abi thsakehjücho. Ta abinü Megido yangdi müchide tsidu tsicho ko abi hütsüla sücho.

²⁸Abi pohki adirütinü ame tsü thali Jerusalem lang kuri kari lanü hiwücho ko David yangdi la yangthsarü kong la dhrürangcho.

²⁹Israel la Ahab tsurü Joram yangthsathsaba kang dhüre-kheh-u la, Juda la Ahazia tsü Yangthsaba kangcho.

³⁰Jehu tsü ro Jezrel chihcho. Ko atikehcho tsü Jezebelnü yuchi, abükyünü anah tücho ko akuva sühpü nyübongkhi khüdu te yapü tungte lang tsü chahchü dheng yacho.

³¹Jehu tbükhüm tsü khu zürode, abükyünü dsi yocho, “Nüh Zimri! Nüh akyüsehrü! Nü tuthsanung hila rocho?”

³²Jehunü kehchü dhengcho ko züdecho, “I lahpi sü liro?” Yangthsaba kuhla adirü nyüh anyüh asangnü nyübongkhi khu chahchü abi chah dhengcho,

³³ko Jehunü arüh te yocho, “Abükyü tsü dhichahchüng!” Arühnü abükyü tsü rang dhichahchücho ko abükyü shühnü züdi ko kuriti kyazicho.

³⁴Jehunü abükyü fü michah abi kuri ko kuri karinü dhrümchinü Yangthsaba kuh lang züducho ko tsuyongcho. Hütsüpü du abinü yocho, “Khingkutpü me tsü hiwü dhrürangpehng; tunüo, abükyü tsü Yangthsaba tsulatpü lile.”

³⁵Ta abükyü me rangnung würütinü athahrü ko ajingkhehrü rüh chah khu apa tu nying müngucho.

³⁶Khode arühnü Jehu te hütsü nengdang yocho, abinü yocho, “Hi tikehnung ABÜDONGBAnü abi dikehrü Elija khu choyoh lile: ‘Jezebel fü tsü Jezereel la füzanü tsunung.

³⁷Sünüsü mütsüpnungthsa, abükyü fü tsü chüh roh-i lahtpahpehnung.’ ”