Read Sangtam Naga 1 ROHTHAP 10 Bible Online

1 ROHTHAP 10 - Sangtam Naga bible

1 ROHTHAP 10

¹Filistinrünü Israel te Gilboa zong chah chitacho. Hütsüla Israelrü khütang kyüsehcho ko anyingcho tsü Yangthsaba ko atsurüti zeh rang tsicho.

²Ta Filistinrünü arüh iiwü Saul tsurü Jonathan, Abinadab ko Malkishua arüh asangding kyüsehcho.

³Saul mükang khata tsü diracho ko arorüh tbüdengnü abi chah kyacho ko dee mütsa thsakehcho.

⁴Abinü abi thsunohrü biba dhrezaba te yocho, “Hiri Filistinrü I michah mümüthsehsohnung nengdang, nü noh tohcheh Ih kyüsehng.” Ta dhrezaba tsünü hütsüta nguchinung tsü drücho. Achotsü Saul apunü apu nohsheng tohcheh hütsü chah thraseh sücho.

⁵Saul sücho ngu dhrezaba tsüsü apu nohsheng tohcheh apu jangjang thraseh sücho.

⁶Hütsüta Saul ko atsurü asang khüdupinü sücho ko abi yanglih changkacho.

⁷Khode Jezrel Ngah la lirü Israelrünü rothsarüti dro tsicho ko Saul ko atsurüti sücho yuchicho, arühnü arüh yangditi pehjüpü tsicho. Hütsüde Filistinrünü ro hütsüri khyopehcho.

⁸Khatapü nyümong khüu tsü, Filistinrünü me rohchonung wücho ko arühnü Gilboa zong chah Saul ko atsurüti me jo ngucho.

⁹Arühnü Saul ku dengcho ko abi thsunohrü müzüb khyüjücho ko Filistia lih apümlang arüh tsingrang ko arüh müyurü te hiba yusi atsa tsü yosohnung müthehcho.

¹⁰Arühnü abi thsunohrü tsü amübükuh khüdu la yohpücho ko athah tsü arüh tsingrang Dagon amübükuh la tbengpücho.

¹¹Khode Gilead la Jabeshrünü Filistinrünü Saul chah nguchicho tsü yuchicho,

¹²akurahrütinü wü Saul ko atsurüti me tsü khyo Jabesh lang hirocho. Arühnü hütsüri langsing khüdu pohki dhrürangcho ko nyümong dhünyeh meshücho.

¹³Saulnü ABÜDONGBA te yuje müchocho khu abi sücho. Abinü ABÜDONGBA yuzeng mübichi; abinü ABÜDONGBA te mahpü asürü nbü te mücheh arüku khyünung müküpcho.

¹⁴Hütsünü ABÜDONGBAnü abi kyüsehcho ko yanglih tsü Jesse tsurü David khehla jücho.