Read Sangtam Naga 1 ROHTHAP 11 Bible Online

1 ROHTHAP 11 - Sangtam Naga bible

1 ROHTHAP 11

¹Israelrü atümungnü David yang Hebron lang wü abi te yocho, “Ihrü nüpu shüshuh khung lile.

²Atsichola Saul ihrü Yangthsaba linye, nühnü Israelrü khata lang nücho ko ABÜDONGBA nü Tsingrangnü nü te nühnü abi müyurü nünung ko arüh Yangthsarü kangnungepü nyengchocho.”

³Hütsüta Israelrü azirü atümungnü David yang Hebron la rocho. Abinü arüh te Amüsa azengchotaba külüpcho, arühnü abi chah tuji müyühjo throchehcho ko ABÜDONGBAnü Samuel khu nyengchocho kyo abi Israel la Yangthsaba kangcho.

⁴Yangthsaba David ko Israelrü apümnü wü Jerusalem yangdi tsü mahcho. Hi bekhyah hütsü te Jebus pü dsicho ko athridirü tsü hütsüla licho.

⁵Jebusrünü David te abinü khodesü yangdila tsü müzüduchehnungepü yocho, ta Davidnü arüh Zion roshengvi khyücho ko hütsü te “David Yangdi” pü dsicho.

⁶Davidnü yocho, “Sünü akhu Jebusrü kyüsehnang abi rothsarü michah anüchiba kangsohnung.” Joab, sü atpa Zeruia licho abinü nüpü mahcho ko abi anüchiba kangcho.

⁷Davidnü roshengvi la tsü züdu lichonü hütsü te “David Yangdi” pü dsicho.

⁸Abinü yangdi tsü akhang nyüchürolang lahpi dikeh alih sonü yangdi tsü külüpchicho ko Joabnü anyingcho yanglih tsü khyücho.

⁹David re azeh-u azeh-u kangcho, tunüo Akohba ABÜDONGBA abi te zeh licho.

¹⁰David akurahrü rothsarüti tsü hiri licho. Arühnü Israelrü aparü te müjang, ABÜDONGBAnü nyengchocho kyo, arühnü dro abi yangthsaba kangsohcho ko abi yanglih drengdreng yohpücho.

¹¹Akhudiba tsü Hakmon hung lanü Jashobeam, “Asang” michah langnüba. Abinü nyüh thsih asang te abi thsuh khüdu du bipü chita khüdu lanü arüh atümung kyüsehcho.

¹²Akurahrü asang yola anyüuba tsü Aho hung ko Dodo tsurü Eleazar licho.

¹³Abinü David lahpi thsapü Filistinrü te Pas Damim la chitacho. Israelrü tsisho tside, abisü lüdi luh la yacho,

¹⁴achotsü abi ko abi nyitsarünü luh longla tsü yapü Filistinrü te chitacho. ABÜDONGBAnü abi khyang akoh amülah jücho.

¹⁵Nyümong khüdu rothsarü anüchirü sangre yola arüh asangnü David liba Adulam lungkhi shündhün lung khüdu yang wücho, hütsüde Filistinrü mülung khüdu Refaim Ngah la müdong licho.

¹⁶Hütsütade David tsü atbüticho khang khüdu chah licho ko Filistinrü mülung khüdunü Bethlehem betipü licho.

¹⁷Davidnü kuh longmi yocho, “Bethlehem la tbükhüm te kihkong la tsünü khürünü I khyang kih ayongnung hirosohnyüle!”

¹⁸Akurahrü rothsarü asang tsünü Filistinrü müdong liba tsü lahsah wü kihkong la tsünü kih aza kha hiro David khyang jücho. Ta abinü hütsü müyongcho; ko hütsü ABÜDONGBA khyang amübüthsa tungkehjonü yocho,

¹⁹“Ihnü hi khodesü müyongnung! Tunüo hütsü hiri asang shüh yongrü kyo linung!” Hütsüta abinü hütsü müyongcho. Nguchi hiri tsü akurahrü asang nguchi licho.

²⁰Joab ani Abishai tsü “Anengkhong sangre” michah langnüba licho. Abinü nyüh thsih asang te thsuhnü du chitacho ko arüh atümung kohnü “Sangre” yola anengkhong khüdu kangcho.

²¹Abi tsü arüh “Sangre” michah akurah-uba ko arüh yola anüchiba kangcho, ta “asang” kyo anengkhonglü müthsacho.

²²Kabzeel lanü Jehoiada tsurü Benaia tsü anengkhong rothsarü khüdu licho; abinü Moabrü athrungrü anyüh zeh kyüsehnü akurah nguchi adrong nguchicho. Abinü khüdupi müdhrang süh nyümong mütrüm khüdu la züdu kihkhünying khüdu kyüsehcho.

²³Abinü Ijiprü khüdu thsuh arangcheh bipü athsenglang khehap münga chah alaa akurong khüdu kyüsehcho. Benaianü abi janü abi miicho, Ijipba khehla tsünü thsuh tsü rohchocho ko hütsünü apu chiisehcho.

²⁴Hütsüri tsü “sangre” yola khüdu, Benaia akurah nguchi licho.

²⁵Abi “sangre” yola tsü anengkhong khüdu licho, ta “asang” tsülü mükyo. Davidnü abi nyahrü yola anüchirü kangsohcho.

²⁶Aparü hiri anengkhong rothsarüti licho: Joab ani Asahel Bethlehem lanü Dodo tsurü Elhanan Harod lanü Shamoth Pelet lanü Helez Tekoa lanü Ikkesh tsurü Ira Anathot lanü Abiezer Husha lanü Sibekai Aho lanü Ilai Netofa lanü Maharai Netofa lanü Bana tsurü Heled Benjamin la Gibea lanü Ribai tsurü Ithai Pirathon lanü Benaia Gash münyeh angah lanü Hurai Arba lanü Abiel Bahurum lanü Azmavet Shalbon lanü Eliaba Gizon lanü Hashem Harar lanü Shakhee tsurü Jonathan Harar lanü Skar tsurü Ahiam Ur tsurü Elifal Mekera lanü Hefer Pelon lanü Ahija Karmel lanü Hezro Ezbai tsurü Narai Nathan ani Joel Hakri tsurü Mibhar Amon lanü Zelek Beroth lanü Joab thsunohrü birü Naharai Jatir lanü Ira ko Gareb Hit-rü Uria Alai tsurü Zabad Shiza tsurü Adina (Reuben hung lanü abi mülung rothsarü sangre anüchiba) Maka tsurü Hanan Mithan lanü Joshafat Ashtera(...)