Read Sangtam Naga 1 ROHTHAP 13 Bible Online

1 ROHTHAP 13 - Sangtam Naga bible

1 ROHTHAP 13

¹Yangthsaba Davidnü hajar ko thsih mülung michah anüchirü atümung te kihtacho.

²Hütsüpü abinü Israel apüm te hita züdecho, “Nührünü mülajükhang ko hi ABÜDONGBA Ihsa Tsingrangnü lümkhang, Ihsanü Ihsa müyurü, bebürü ko Levirüti apüm hila Ihsa yang shimükhongnung arüh yangditi yang yuhirü müthehnung.

³Hütsüpü Ihsanü Saul Yangthsaba chichah thrüchahchüpehba Tsingrangba Yuzeng Singdi khyünung wünung.”

⁴Hütsü alümcho tsü müyurünü künyang khyüchocho.

⁵Achotsü Davidnü yanglih apümlangnü kihjinglang Ijip lurüh lanü kihku lahpi Hamath Lang chii, Kiriat Jearim lanü Jerusalem lang Yuzeng Singdi hironung Israelrü shimükhongsohcho.

⁶Hütsüpü David ko müyurütinü Juda lih la Bala yangdi hütsü Kiriat Jearim yang aqo kehba cherubim michah ABÜDONGBA neng thrahkeh liba, Tsingrangba Yuzeng Singdi khyünung wücho.

⁷Abinadab kuh lanü arühnü Yuzeng Singdi tsü khyüchehcho ko misü kari asi khüdu chah yohcho.

⁸Hütsüpü Uzza ko Ahio nyühnü misü kari tsü nüde, David ko müyurü apümnü Tsingrangba dhichi arühnü kohchonü nyiichicho. Arühnü tbenglah, honglilah, tbhang, dhengza ko rühti meh khi thsacho.

⁹Arühnü Khidon pungkhyang chii rode, misü tsü ajing müthicho ko Uzza tsü akheh müyungchüde Yuzeng Singdi chah tsü thapücho.

¹⁰Hütsüde Uzza te ABÜDONGBA zii chürocho ko Singdi thapücho ngang abi süsohcho ko hütsütinü hiba müdüm te Perez Uzza dsicho.

¹¹ABÜDONGBAnü zii chüro Uzza khingchichonü David rihlong chürocho.

¹²Hütsüpü Davidnü Tsingrangba dro yocho, “Ihnü Yuzeng Singdi tsü khüta hiwünung?”

¹³Achotsü Davidnü hütsü Jerusalem lang mü-iiwücho. Ta hütsü Gath yangdi la lirü Obed Edom kuhla pehjücho.

¹⁴Yuzeng Singdi tsü hütsüla choo asang licho ko ABÜDONGBAnü Obed Edom kukhi ko abi yo lüpcho müwajücho.