Read Sangtam Naga 1 ROHTHAP 14 Bible Online

1 ROHTHAP 14 - Sangtam Naga bible

1 ROHTHAP 14

¹Tyre Yangthsaba Hiramnü David yang shithsabhüleh nengdang müthehcho; abinü abi khyang Yangthsaba kuh thsanung cedar singpungtüm ko lung mistri ko sing nguchirü jücho.

²Hütsü khu Davidnü abi Israel la ABÜDONGBAnü Yangthsaba kangsohcho ko abi müyurü khyanglangnü abi yanglih pungrohirorepü müdhecho.

³Jerusalem la tsü Davidnü anitpü alaa khyücho ko tsuzarü alaa thsacho.

⁴Atsurü hiri Jerusalem la surocho: Shamua, Shobab, Nathan, Solomon,

⁵Ibhar, Elishua, Elpelet,

⁶Noga, Nefeg, Jafia,

⁷Elishama, Beeliada ko Elifelet.

⁸Khode Israel yanglih apüm la David tsü Yangthsaba kangsohkopü Filistinrünü yuchicho, arüh te khatanung arüh rothsarüti wücho. Achotsü Davidnü arüh te dhsükehnung shemüsucho.

⁹Filistinrü tsü ro Refaim Ngah chihcho ko mahnung dikehcho.

¹⁰Davidnü Tsingrangba te tsingdhengcho, “Ihnü Filistinrü te khatanung mah-o? Nühnü Ih kohsohnung mah-o?” ABÜDONGBAnü lalingcho, “Khataang! Ihnü nü khyang kohsohnung.”

¹¹Achotsü Davidnü arüh te Baal Perazim la khatacho ko abinü arüh kohcho. Abinü yocho, “Kihmülümnü kyo arorüh rothsarü kehphohnung Tsingrangbanü Ih bichiko.” Hütsünü hiba müdüm te Baal Perazim pü dsicho.

¹²Filistinrünü arüh dro tside, arühnü arüh singkülüp pehjo tsicho ko hütsüri trüp-pehnung Davidnü yuzeng jücho.

¹³Tunyah mülipü Filistinrünü angah lang tsü thali chitanung rocho.

¹⁴Anyüpiusü Davidnü Tsingrangba te chotacho ko abi te yocho, “Arüh te hilanü tükhata, ta wünü Balsam singdong shündhün akhüulang tsünü betieng.

¹⁵Khode nührünü singku müle la tsehchicho jengreng yuchinang, hütsüde mahng, tunüo arüh kohnung Ih nührü bete wünung.”

¹⁶Davidnü Tsingrangbanü yocho kyo nguchicho, ko hütsüta abinü Filistinrü tsü Gibeon lanü Gezer chii iiyohchüpehcho.

¹⁷David nengkhong apümlang sobhocho ko ABÜDONGBAnü yucho apüm khyang abi drüsohcho.