Read Sangtam Naga 1 ROHTHAP 15 Bible Online

1 ROHTHAP 15 - Sangtam Naga bible

1 ROHTHAP 15

¹Davidnü apu nengdangsü yangdi la tsü kuh thsacho. Abinü Yuzeng Singdi nengdang shükuh khüdu thsacho.

²Hütsüpü abinü yocho, “Levirü dunü Yuzeng Singdi tsü dhieng, tunüo hütsü dhinung ko lede abi dikehnung ABÜDONGBAnü arüh throchehcho.”

³Hütsüta Davidnü Yuzeng Singdi Jerusalem lang hiwü abinü thsachola yohpünung Israelrü apüm dsicho.

⁴Hütsü khangte abinü Aron ko Levirü trah dsicho.

⁵Levirü Kohat lanü nyüh 120 michah anüchiba Uriel;

⁶Merari tsutpu lanü nyüh 220 michah anüchiba Asaia;

⁷Gershon tsutpu lanü nyüh 130 michah anüchiba Joel;

⁸Elizafan tsutpu lanü nyüh 200 michah anüchiba Shemaia;

⁹Hebron tsutpu lanü nyüh 80 michah anüchiba Eliel;

¹⁰ko Uziel tsutpu lanü nyüh 112 michah anüchiba Aminadab rocho.

¹¹Hütsüpü Davidnü bebürü Zadok ko Abiathar ko Levirü arüh dhüroh, Uriel, Joel, Shemaia, Eliel ko Aminadab dsicho.

¹²Abinü Levirü te yocho, “Nührü Levirü hung michah anüchirü lile. Ihnü thsaba müdüm la tsü Israel Tsingrang ABÜDONGBA Yuzeng Singdi hironung nengdang, nührübürü ko ajünirü Levirü nührü jangjang müsachehng.

¹³Akhudi hütsü dhinung nührü mülichonü ko Ihsanü athsalangnü abi mümübüchonü, ABÜDONGBA Ihsa Tsingrangnü Ihsa khingchicho.”

¹⁴Achotsü Israel Tsingrang ABÜDONGBA Yuzeng Singdi dhinungthsa bebürüti ko Levirütinü arüh jangjang müsachehcho.

¹⁵Ko ABÜDONGBAnü Mosa khu mülacho kyo, arühnü akhau yohpü arüh pakyarü chahnü dhicho.

¹⁶Davidnü Levirü azibarüti te papa khyang akünyang khi honglilah ko dhengza tii thsasohnung yuzeng jücho.

¹⁷Khithsarü hung lanü, arühnü dhengza tinung hiri throchehcho: Joel tsurü Heman, Berekia tsurü Asaf ko Merari tsutpu lanü Kushaia tsurü Ethan. Arüh trosohnung arühnü tbenglah zii thsasohnung Levirü hiri throchehcho: Zekaria, Jaziel, Shemiramoth, Jehiel, Unni, Eliab, Maaseia ko Benaia.

²²Khenania tsü khi thsanung la tsachonü, Levirü khithsarü xükümnung throchehcho.

²³Yuzeng Singdi nyahnung Obed Edom ko Jehia yola Berekia ko Elkana throchehcho. Yuzeng Singdi bete rühti mehnung bebürü Shebania, Joshafat, Nethanel, Amasai, Zekaria, Benaia ko Eliezer throchehcho.

²⁵Hütsüpü Yangthsaba David, Israel azibarüti ko rothsarü anüchirüti Yuzeng Singdi khyünung Obed Edom kuh lang wücho ko arühnü thsüti arangcheh khyücho.

²⁶Arühnü Yuzeng Singdi dhirü Levirü chah tu alümxünung mülinung nengdang, misüpung dhünyeh ko san dhünyeh kangmübü jücho.

²⁷David ko khithsarüti, arüh anüchiba Khenania ko Yuzeng Singdi dhirü Levirü arüh apüm anana shü atsaubanü kyahcho fükhüm khümcho. Davidnü anana bebü jengki tsü khyücho.

²⁸Hütsüta Israelrü apümnü Yuzeng Singdi yola rühti, shujüh, dhengza ko honglilah bipü khi thsa Jerusalem lang wücho.

²⁹Singdi tsü hiro yangdi tsü chihde, Saul tsulatpü Mikalnü nyübongkhi lanü chehchü dhengcho ko Yangthsaba David akünyanglangnü nyiichi tsohchi ngu mükünyang lümcho.