Read Sangtam Naga 1 ROHTHAP 16 Bible Online

1 ROHTHAP 16 - Sangtam Naga bible

1 ROHTHAP 16

¹Arühnü Yuzeng Singdi tsü Davidnü rungnüm liba shükuh la tsü hiwü ayonglang yohpücho. Hütsüpü arühnü Tsingrangba khyang kangmübü ko akehta mübü jücho.

²Davidnü kangmübü tsü jükapü khanglang, abinü ABÜDONGBA nengla müyurü müwajücho,

³ko arüh atümung khyang tsuyongnung chahla jücho. Abinü Israel la khingkurü adhrerü atümung khyang hümthse khüdu, shuh aruhcho khüdu ko singsih akungcho jücho.

⁴Davidnü Yuzeng Singdi bete khithsa Abi nengsesoh, Israel Tsingrang ABÜDONGBA mübü la langnünung Levirü khürü throchehcho.

⁵Asaf tsü anüchiba ko Zekaria tsü achitung throcho. Jeiel, Shemiramoth, Jehiel, Matithia, Eliab, Benaia, Obed Edom ko Jeielrü tsü tbenglah tinung throcho.

⁶Asafnü dhengza tinung ko bebürü Benaia ko Jahaziel nyühnü lede Yuzeng Singdi bete rühti mehnung.

⁷Hütsüpü du Davidnü akhudi Asaf ko Levirü khyang ABÜDONGBA nengsekhi thsanung nyümkehjücho.

⁸ABÜDONGBA khyang nengse jüng, Abi dicho sobhoung; limih te Abinü nguchicho young.

⁹ABÜDONGBA te nengsekhi thsaang; Abinü anyemüyangnung nguchichoti young.

¹⁰Ihsa Abi yo thsacho künyang; abi mübürü apüm künyangsohng!

¹¹Arüku nengdang ABÜDONGBA yang wüng, ko mütozah Abi mübüng.

¹²Nührü Tsingrangba dikehrü, Jakob trah, Tsingrangbanü throchehcho, Israel trah,

¹³Tsingrangbanü nguchicho thsayahiya ko Abinü jücho yukhaba lümchehng.

¹⁴ABÜDONGBA Ihsa Tsingrang; Abi yuzeng tsü limih apüm nengdang.

¹⁵Khodesü azengchotaba tünbüchü, khüi Abinü lede nengdang külüpcho,

¹⁶Abraham te külüpba azengchotaba, Isak te külüpba anyengchocho.

¹⁷Jakob te azengchotaba külüpcho, lede müchangkaba khüdu.

¹⁸“Ihnü nü khyang Kanan lih jünung,” abinü yocho. “Hütsü nührü yo thsanung.”

¹⁹Tsingrangba nyitsarü adükeh du thsacho, Kanan lih la shirü licho.

²⁰Arüh limih khüdu lanü apa khüdu la rümchicho, yanglih khüdu lanü apa khüdu chii.

²¹Ta arüh sü khyangsü müsehchisohcho; arüh tsungtinung Abinü yangthsarüti khyang müzahsohcho:

²²“Athrochehcho I dikehrü tüthsakehsoh; I azikehrü chah tüthahbü.”

²³ABÜDONGBA te khi thsaang, limih apüm! Abinü Ihsa khümchocho yuse atsa nyümong mükhu sobhoung.

²⁴Abi ahechi yuchoti te sobhoung, Abi akohba nguchi nyitsarü apüm te.

²⁵ABÜDONGBA tsü arangcheh, Abi dee senung adekheng; tsingrangti apüm michah Abi alaa dhiching.

²⁶Apa yuchoti tsingrang apüm kyothri du, ta ABÜDONGBAnü ning külüpcho

²⁷Ahechi ko adibongnü Abi lohti, Zii ko akünyangnü Amübükuh jengcho.

²⁸ABÜDONGBA seing, limih chah lirü apüm, Abi ahechi ko tase seing.

²⁹ABÜDONGBA ahechi neng seing; amübü bipü amübükuh lang rung. Amüsaba rode, Ajingte mükhukehng;

³⁰Abi bete dhridhrieng, limih apüm! Limih tsü abi joji la drengdreng müdong lile ko hütsü mümühachinung.

³¹Künyang, Ning ko alih! ABÜDONGBA tsü Yangthsabaepü limih apüm te young.

³²Khong, Kihdi, nüchah liba akang apüm; Künyang rangmü, Nü te liba apüm.

³³Rangmü singdongnü züdenung, limih lang yangthsanung rode.

³⁴ABÜDONGBA khyang anengse jüng, tunüo Abi atsa lile; Abi amüi müthrehre.

³⁵Abi te young, “Ihrü khümchoung; Ihrü nübülung; yuchoti kheh lanü Ihrü iichoung, Ihrünü künyang Nüh Amüsa neng senungthsa.”

³⁶Israel Tsingrang, ABÜDONGBA seing! Ade ko lede Abi seing! Hütsüde müyurü apümnü yocho, “Amen,” ko ABÜDONGBA secho.

³⁷Yangthsaba Davidnü Yuzeng Singdi yohpüchah amübü nengdang tsü Asaf ko abi shangrü Levirünü lede xükümnung yohpücho. Hütsüla arühnü nyümong mükhu arüh nguchi nguchinung.

³⁸Ko Jeduthun tsurü Obed Edom ko arüh tsutpu lanü arüh rohrepü-kehnü arüh trocho. Tbükhüm nyahrü michah anüchirü tsü Hosa ko Obed Edom licho.

³⁹Ta bebüba Zadok ko abi shangrü bebürüti tsü Gibeon la amübü chah xükümrü thsacho.

⁴⁰Arühnü nyangnyü romang mükhu Israelrü khyang ABÜDONGBAnü jücho Yuzeng la thrah licho roh-i bholu chah üpümshünü trüp kangmübü jücho.

⁴¹Hütsüla arüh yola Abi amüthreba amüi nengdang ABÜDONGBA neng senung pathsa throchehrü Heman ko Jeduthun ko aparüti yohpücho.

⁴²Heman e Jeduthun nyüh tsü nengsekhi thsade rühti, dhengza ko apa ikhongti bichi thsaba michahsü axükümrü thsacho. Ko Jeduthun tsutpu la aparü tsü tbükhüm nyahnung nyümkehjücho.

⁴³Hütsüpü arüh atümung palu kuh lang tsicho ko Davidsü abi kukhirü yola azachah linung kuh lang wücho.