Read Sangtam Naga 1 ROHTHAP 17 Bible Online

1 ROHTHAP 17 - Sangtam Naga bible

1 ROHTHAP 17

¹Adelü Yangthsaba David yangthsarü kuhla licho. Nyümong khüdu abinü azikehba Nathan yanglang adsinung mütheh yocho, “Ih hila Cedar singnü thsacho kuhla lire, ta ABÜDONGBA Yuzeng Singdilü shükuh la yohpüle!”

²Nathan-nü yocho, “Nühnü tu lümrünang hütsüta nguching, tunüo nü te Tsingrangba lile.”

³Ta hütsü romang Tsingrangbanü Nathan te yocho,

⁴“Wüng ko I dikehrü David te hita young, ‘I khyang amübükuh khüdu thsanung tsü nüh mah.

⁵Ihnü Ijip lanü Israelrü nücheh nyümong lanü chünye chii, Ih khodesü amübükuh la müli; Ih lede shükuh la du müdüm papa la lii rore.

⁶Ih Israelrü yola shitseh ayung, Ihnü throchehba langnürüti te tuepü I khyang cedar singnü amübükuh müthsajüropü khodesü Ihnü müyodheng.’

⁷“Hütsüeko I dikehrü David te Ih, Akohba ABÜDONGBAnü hita yoreding, ‘Ihnü nüh san nyahba lanü nücheh I müyurü Israelrü michah Yangthsaba kangsohcho.

⁸Nü wücho apümlang Ih nü te licho ko nü bekhu Ihnü nü rorüh apüm kohjücho. Ihnü nüh limih la langnürü anengkhong adiuba kangsonung.

⁹Ihnü I müyurü Israelrü khyang müdüm khüdu throcheh arüh hütsüla lisohcho, adelü arüh hütsüla sünüsü müsehchipü linung. Arüh hiba lih la zürodunü amütsarütinü arüh mahko, ta hütsüta adelü mütikehnung. Ihnü nührü rorüh hiri apüm kohjüpü nührü chahnü khütang trahchosohnung Ihnü nyengchore.

¹¹Nüh süde nü jümürü kong la dhrürangnung, Ihnü nü tsurü yolanü nyüh khüdu Yangthsaba kangsohnung ko nü yanglih rezeh yohpünung.

¹²Abinü I khyang amübükuh khüdu thsajünung ko Ihnü abi yangthsathsaba lede lisohnung.

¹³Ih abi au ko abi I tsurü thsanung. Ihnü Saul khyümüipü nüh Yangthsaba kangsohcho kyo, abi chahnü I arüku mükhyümüinung.

¹⁴Ihnü I müyurü ko I yanglih michah lede nengdang abi axükümrü kangsohnung. Abi yanglih khodesü müchangkanung.’ ”

¹⁵Nathan-nü David te Tsingrangbanü mishacho lüpcho yocho.

¹⁶Hütsüde Yangthsaba Davidnü ABÜDONGBA shükuh la züdu pümcho ko dangkhidangnangcho, “I chah nguchiba hi Ih ko I kukhinü müleng, ABÜDONGBA Tsingrang.

¹⁷Ta ade Nühnü alaa du nguchire; Nühnü I chahnü aronung la trahchonung nyengchoko ko ABÜDONGBA Tsingrang, Nühnü Ih adirü khüdu kyo bichire.

¹⁸Ihnü alaa Nü te tu yonung! Nühnü Ih longi müdhele, ta Nühnü Ih Nü dikehrü dhichire.

¹⁹Nühnü I te hi nguchinung ko Ih aronung I te ngusohnung tsü Nü lümcho ko nahdhengkeh licho.

²⁰ABÜDONGBA, Nüh kyo süsü müle, Ihrünü Nüh du Tsingrangbaepü lede müdhele.

²¹Ayurü suro lanü nücheh Nüpu müyurü kangsohba Israel yucho kyo limih la apa yucho müle. Arüh nengdang Nühnü thsayahiya nguchiba tsünü limih apümlang Nü neng sobhoko. Nühnü Ijip lanü Nü müyurü khümchoko ko Nü müyurü bekhu yucho pati iipehjüko.

²²Nühnü lede nengdang Israel, Nüpu müyurü kangsohko ko ABÜDONGBA, Nüh arüh Tsingrang kangko.

²³“Ko ade, O ABÜDONGBA, Nühnü I te Ih ko I trah nengdang tu nyengchocho, hütsü tikehsohng ko Nühnü yocho kyo nguching.

²⁴Nüh anengkhong thsanung, ko müyurünü lede yonung, ‘Akohba ABÜDONGBA tsü Israel michah Tsingrang lile.’ Ko Nühnü akang ayung I yanglih riki yohpüjünung.

²⁵Ihnü hiba dangkhidangnang Nüh yang hinung mihthrungmihzire, I Tsingrang, tunüo hi apüm Nühnü Nü dikehrü te mishako ko I trah lanü yangthsarü kangsohnungepü Nühnü yoko.

²⁶Nüh, ABÜDONGBA, Tsingrang lile, ko hiba anyemüyangnung anyengchoba hi Nühnü I te külüpko.

²⁷Lede Nüh akhümba arüh chah linungthsa I trah müwajüng pü Ihnü Nü te kihchire. Nüh, ABÜDONGBAnü arüh müwajüko ko arüh chah Nü amüwa tsü müchangkapü linung.”