Read Sangtam Naga 1 ROHTHAP 20 Bible Online

1 ROHTHAP 20 - Sangtam Naga bible

1 ROHTHAP 20

¹Kang khüu chisi bekhyah, kang la yangthsarünü khata wüba bekhyah, Joabnü rothsarü nüpü wü Amon lih mahcho, ta Yangthsaba Davidlü Jerusalem la licho. Arühnü Raba yangdi beticho, hütsü mahcho ko changjücho.

²Amonrü tsingrang kyothri Milkom kuthri hon süreh sangrepü müyü-o amüling khüdu licho. Hütsüla thsidi lung khüdu zehcho, hütsü Davidnü khyo apu kuthri la yohcho. Hütsüpü abinü yangdi la tsünü kuthsi adrong khyücho.

³Abinü yangdi la tsünü nyitsarü nowü singxasing, fühjeng ko püh bi nguchisohcho. Abinü hütsüroh-i tsü Amon yangdiba lanü nororü khyangsü nguchisohcho. Hütsüpü abi ko abi nyitsarüti Jerusalem lang thalicho.

⁴Akhanglang, adesü Filistinrü te Gezer la khata suhwücho. Hila Husharü Sibekainü akurahrü nyüh khüdu anengnü Sippai kyüsehcho ko Filistinrü kohcho.

⁵Adesü Filistinrü te khata apa khüdu khatacho ko Jair tsurü Elhanan-nü Gathrü Goliath anithre Lahmi, sü khehla thsuh shükyahrü kihdüm toh-i acheh bicho, hütsü kyüsehcho.

⁶Gath la apa khata khüdu chürocho ko hütsüla ajing akheh chah müyungza dhürüroh kehba akurahrü khüdu rocho. Abi tsü papade akurahrü khüdu chahnü trahchocho licho.

⁷Abinü Israelrü khyangchicho ko David amung Shama tsurü Jonathan-nü abi kyüsehcho.

⁸David ko abi nyitsarünü kyüsehba hiri asang hi Gath la akurahrü chahnü trahchocho licho.