Read Sangtam Naga 1 ROHTHAP 21 Bible Online

1 ROHTHAP 21 - Sangtam Naga bible

1 ROHTHAP 21

¹Satan-nü Israel michah chongcha hirojünyücho, hütsünü abinü David khyang mono khinung dhrongchehsohcho.

²Davidnü Joab ko aparü thsazirüti khyang yuzeng jo yocho, “Israel lih apümlang, khüulang achangnü-achang chii mono khidheng. Nyüh khüdoi lirünang Ihnü müdhenyüre.”

³Joabnü lalingcho, “ABÜDONGBAnü Israelrü ade liba tenü thsihpinü alaa kangsohnung! Nüh adibong, hiri apüm nüyo lile. Tuepü nühnü hi khidheng yucho apüm thsamehsohnyüro?”

⁴Ta Davidnü Joab khyang yuzeng tsü nyisohcho. Joabnü shemüsucho ko Israel lih apüm bongchocho ko Jerusalem lang thalicho.

⁵Abinü Yangthsaba David te rothsarü nguchi la wüxah adhrerü: Israel la lakh dhre-khüdu, ko Juda la lakh müyü hajar nyühre lilepü yocho.

⁶Yangthsaba yuzeng tsü mükhyüchochonü abinü Levirü ko Benjaminrülü Joabnü mükhidhengcho.

⁷Hütsüta nguchicho nengdang Tsingrangbanü mükünyangcho, hütsünü Abinü Israelrü khingchicho.

⁸Davidnü Tsingrangba te yocho, “Ihnü hi nguchichonü adrünungkeh amünyi shitpahko. Yanglilüm I khyang mülang pehjüng. Ihnü mümüdhepü thsamehko.”

⁹Hütsüde ABÜDONGBAnü David yo azikehba Gad te yocho,

¹⁰“Wüng ko David te Ihnü abi khyang asang hila khüdu throsohnung jüreding. Abinü khüi throchehnang Ihnü hütsü nguchinung.”

¹¹Gadnü David yanglang wücho ko abi te ABÜDONGBAnü yoba tsü yocho ko tsingdhengcho, “Khüiba khyünung?

¹²Kang asang yangkongnung? Mahkhang arorüh bete nüh choo asang tsichinung? mahkhang nyümong asang Tsingrangbanü abi nohshengnü nührü mahnung ko nührü lih la dhsara müthehnung ko Israel la abi riwürü khu asüba hirosohnung? Ihnü ABÜDONGBA te tu alalingba jünung?”

¹³Davidnü Gad te lalingcho, “Ih khüta müthsa surola lile. Ta nyitsarü khyanglü Ih mükhingchisohnyü. ABÜDONGBA apu khyang Ih khingchisohng, tunüo Abi yanglilüm lile.”

¹⁴Hütsünü ABÜDONGBAnü Israelrü michah rümra khüdu müthehcho ko arüh nyüh hajar nyühre sücho.

¹⁵Hütsüpü abinü Jerusalem changsohnung riwürü khüdu müthehcho, ta abinü alasih thsamüla riwüba te tsü yocho, “Hitadung! Hütsü kükyüko!” Riwüba tsü Jebusrü Arauna pungkhyang te yacho.

¹⁶Davidnü riwüba tsü Jerusalem changjünung akheh la nohsheng bipü ningwüm la ya ngucho. Hütsüde David ko müyurü langnürüti müyahshü müpipü atümungnü alih la romih hapkeh mükhukehcho.

¹⁷Davidnü dangkhidangnangcho, “O Tsingrang, thsamehba tsü Ih-e. Mono khinung yoba tsü Ih-e. Hiri müyurünü tu nguchicho? ABÜDONGBA, I Tsingrang, Ih ko I kukhi khingching, ta Nü müyurülü khümchoung.”

¹⁸ABÜDONGBA riwüba tsünü Gad te wü David te Arauna pungkhyang la bholu khüdu külüpnung yuzeng jünung yocho.

¹⁹Davidnü ABÜDONGBA yochonyi Gadnü yocho kyo wücho.

²⁰Pungkhyang la tsü Arauna ko atsurü müyü tsü litoh nyeh yacho ko khode arühnü riwüba tsü ngucho, atsurüti tsünü shang wü rangcho.

²¹Araunanü Yangthsaba David ro ngu, abi pungkhyang tsü pehjüpü wü abi te alih la mükhukehcho.

²²Davidnü abi te yocho, “Wara hi zahsohnung Ihnü ABÜDONGBA khyang bholu khüdu külüpnung I khyang nü pungkhyang hi lihsohng. Ihnü angang aleng jünung.”

²³Araunanü yocho, “Khyüng, nüh Adibong, ko nühnü tu khyünyüro hütsü nguching. Bholu chah kangmübü thsa trüpnung misüpung hila lile, ko pungkhyang la atahnung sing hiri lile, ko amübü jünung litoh hila lile. Ihnü hiri apüm nü khyang jüre.”

²⁴Ta Yangthsabanü lalingcho, “Do, Ihnü angang aleng jünung. Ihnü ABÜDONGBA khyang nüyo, amükangnü ngucho tusü mümübünung.”

²⁵Ko abinü Arauna khyang pungkhyang ngang tsü hon shekel thsih dhüroh jücho.

²⁶Abinü hütsüla ABÜDONGBA khyang bholu khüdu külüp-pü trüp mübü ko akehta mübü mübücho. Abinü dangkhidangnangcho ko ABÜDONGBAnü hütsü laling bholu chah kangmübü trüpnung ninglangnü michang jürosohcho.

²⁷ABÜDONGBAnü riwürü te abi nohsheng tsü tohlinung yocho ko riwüba tsünü nyicho.

²⁸Hütsüde Davidnü abi dangkhidangnang lalingkopü müdhecho, hütsünü abinü Arauna pungkhyang la bholu chah tsü kangmübü mübücho.

²⁹Mosanü akungaselih la thsaba ABÜDONGBA shükuh ko kangmübü trüpba bholu tsü ade yingcheh Gibeon amübükuh la lile;

³⁰ta Davidnü mübünung müwüchehcho, tunüo abinü ABÜDONGBA riwürü nohsheng tsü drücho.