Read Sangtam Naga 1 ROHTHAP 22 Bible Online

1 ROHTHAP 22 - Sangtam Naga bible

1 ROHTHAP 22

¹Hütsünü Davidnü yocho, “Hila hi ABÜDONGBA Tsingrang Amübükuh tsü linung. Israelrünü trüp mübü mübünung bholu tsü hila lile.”

²Yangthsaba Davidnü Israel lih la liba shuparü apüm shimükhongnung yuzeng jücho ko abinü arüh nguchisohcho. Khürünü amübükuh thsanung lung hamcho.

³Abinü sing tbükhüm nengdang imühi ko amüjüpsing külüpnung idhse khütang jücho ko imüyeng tsü drongrachonü sünüsü hütsü müho-dhengcho.

⁴Abinü Tyre ko Sidonrü khyang Cedar singpungtüm rungnümjüsohcho.

⁵Davidnü lümcho, “I tsurü Solomon-nü thsanung liba Amübükuh tsü ahechikeh ko anengkhong thsanungbae. Ta abi azarü du ko nguchi müxüpcheh-e, hütsüeko Ihnü küdang yohpüjünung.” Hütsüta Davidnü abi müsü tenü kohro khütang rungnüm yohpüjücho.

⁶Abinü Solomon dsiro ABÜDONGBA, Israel Tsingrang khyang Amübükuh khüdu thsanung yuzeng jücho.

⁷Davidnü abi te yocho, “Itso, Ihnü amübükuh khüdu thsajo I Tsingrang ABÜDONGBA dhichinyücho.

⁸Ta Ihnü nyitsarü drongra kyüsehko ko chita drongra khatakopü ABÜDONGBAnü I te yocho. Ko Ihnü hütsüdoi shühkhatohsohcho khu, Ihnü Abi khyang amübükuh khüdu thsajünung tsü Abinü mümülacho.

⁹Ta Abinü I te hi nyengchoko. Abinü yocho, ‘Nü tsurü khüdu linung ko abinü yangtsa la yangthsa thsanung, tunüo abi rorüh apüm chahnü Ihnü abi khyang yangtsa jünung. Abi neng Solomon thsanung, tunüo abi chiichah Ihnü Israel khyang yangtsa ko Atbachi jünung.

¹⁰Abinü I khyang Amübükuh khüdu thsajünung. Abi I tsurü ko Ih abi au thsanung. Abi trahnü Israel achangka müli yangthsa thsanung.’ ”

¹¹Davidnü mütozah yocho, “Ade Itso, ABÜDONGBA nü Tsingrang nü te lieng, ko nühnü Abi khyang amübükuh thsajüsohnung Abi anyengchocho akoh ngusohng.

¹²Ko nühnü Israel la Abi yuzeng la yangthsanung nengdang ABÜDONGBA nü Tsingrangnü nü khyang lümlong ko anyichehba jüng.

¹³Israel khyang Mosa khu jüba Yuzeng tsü apüm bichikhang, nühnü akoh ngunung. Müsi mülahng ko rezehng ko tunüsü nü müsi tüsümsoh.

¹⁴Ko amübükuh nengdang tsü, Ihnü akohchonü hon metric ton hajar asangpü thsih müyü, ko taripi metric ton hajar sangre khyübülung yohpüjüle. Hütsü chah lahkeh, idhse ko imüyeng mükhilong yohpüjüle. Ihnü singlungrüsü rungnüm yohpüjüle, ta nühnü alaa khyübülung.

¹⁵Nguchirü kükyo lile. Lungkhahji la nguchirü, lung hamrü ko sing mistri,

¹⁶ko hon, taripi ko imüyeng ko idhse nguchi la axangchehrü kükyo lile. Nguchi tsü dikehng ko ABÜDONGBA nü te zeh lieng.”

¹⁷Davidnü Israelrü zirü apüm te Solomon rükunung yuzeng jücho.

¹⁸Abinü yocho, “ABÜDONGBA Tsingrang nührü te licho ko lüpcho la nührü khyang atbachi jücho. Hiba lih la lirü apüm Abinü I khyang kohsohcho ko arüh ade nührü ko ABÜDONGBA pohki lile.

¹⁹Ade nührünü nührü lasih ko anbü apümnü ABÜDONGBA nührü Tsingrang dikehng. Nührünü Yuzeng Singdi ko mübü la bichiba Amüsa kohro apüm yohpünungthsa, Amübükuh tsü thsanung dikehng.”