Read Sangtam Naga 1 ROHTHAP 28 Bible Online

1 ROHTHAP 28 - Sangtam Naga bible

1 ROHTHAP 28

¹Yangthsaba Davidnü Israel la thsazirüti apüm Jerusalem la shimükhongnung yuzeng jücho. Achotsü yucho mükhu lanü thsazirüti, yanglih la yangthsarüti, ahung la azibarüti, Yangthsaba ko abi tsurü yo kuthsi ko kanglungrü dhengyehrü yangthsaba kuhla thsazirüti, rothsarü la thsazirüti ko ayingthsarüti apüm Jerusalem la shimükhongcho.

²Davidnü arüh bete yapü chocho: “I müyurüti, I yu nyieng. Ihnü Yuzeng Singdi ko Ihsa Tsingrang ABÜDONGBA jing jükehji lede nengdang kuh khüdu thsanung lümcho. Amübükuh thsanung Ihnü küdangko,

³ta Abinü hütsü yaticho, tunüo Ih rothsarü khüdu ko khura shühkhatohko.

⁴ABÜDONGBA, Israel Tsingrangnü Ih ko I chahnü trahchochonü Israel la lede yangthsathsanung throchehko. Abinü langnürü chüronung Juda throchehcho ko Juda lanü Iu kukhi throchehko. Hütsüba tsutpu lanü Israel la Ih Yangthsaba kangsohnung Abinü künyang licho.

⁵Abinü I khyang tsuzarü khütang müwajücho ko arüh yolanü ABÜDONGBA yanglih, Israel la yangthsanung Abinü Solomon throchehko.

⁶“ABÜDONGBAnü I te yocho, Nü tsurü Solomon-nü I khyang amübükuh tsü thsanung. Ihnü abi I tsurü ko Ih abi au thsanung throchehko.

⁷Abinü ade kyo I yuzeng ko amülaba tsa bichikhang, Ihnü abi yanglih müchangka lisohnung

⁸“Hütsüeko ade, I müyurüti, Ihsa Tsingrang bete ko Israelrü ashimükhongrü bete, nührünü hiba asu lih hi khyünung ko lede nengdang aronung shang khyang jühmüchinungthsa, Tsingrangbanü Ihsa khyang jüba yuzengti apüm athsalangnü bichiengpü Ihnü nührü te khangre.”

⁹Ko Solomon te abinü yocho, “Itso, nühnü I Tsingrang müdhenung ko lasih apümnü Abi dikehnung Ihnü nü te khangre. Abinü Ihsa lümcho ko khyünyücho apüm müdhele. Nühnü Abi yang wükhang, Abinü nüh khyüchonung; ta nühnü Abi tenü zakhang, Abinü lede nengdang nüh pehjünung.

¹⁰Abi Amüsa Amübükuh thsanung ABÜDONGBAnü nüh throchehkopü nühnü lümkehng. Hütsüeko ade müsi mülahpü hütsü dikeh nguching.”

¹¹Davidnü Solomon khyang amübükuh la kohro zahkehji ko apa chongnahti ko amünyi pehba Amüsauba chongsah hiri apüm nengdang lümchung jücho.

¹²Abinü kekhüm ko hütsü mükang chongnahti, amübükuh kohro zahkehji ko ABÜDONGBA khyang khakhuchüjücho jiyüti hiri apüm nengdang lümchung abi khyang jücho.

¹³Davidnü adesü abi khyang arüh nguchi nguchinung, Amübükuh nguchinung ko amübükuh la shingtbhürü xükümnung bebürü ko Levirü changnahnung lümchung jücho.

¹⁴Shingtbhürü, külüpnung shulüm hon ko taripi khüdoi thsütahnung,

¹⁵dsi ko dsimüdongsing, Tsingrangba khyang amübü jüba hümthse yohpünung shulüm taripi ko hon tsingthsang,

¹⁶hiri nengdang abinü athülaba jücho.

¹⁷Abinü adesü shumütsa, mütpah-tbhü ko shinga hiri külüpnung hon amüthseng khüdoi thsütahnung,

¹⁸shingtbhürü nengdang hon ko taripi khüdoi thsütahnung, müchiji trüpnung bholu külüpnung ko Yuzeng Singdi michah cherubim aqo keh kanglungrü külüpnung la hon amüthseng khüdoi thsütahnung hiri nengdang athülaba jücho.

¹⁹Yangthsaba Davidnü yocho, “Hiri apüm ABÜDONGBA Apunü I khyang nguchisohnung jüba lümchung la thrah lile.”

²⁰Yangthsaba Davidnü atsurü Solomon te yocho, “Müsi mülahng ko rezehng. Nguchi tsü dikehng ko hütsü tunüsü tüyatisoh. Ihnü dikehba ABÜDONGBA Tsingrang, nü te linung. Abinü nüh müpehjünung, ta Abi Amübükuh nguchi müthümde Abi nü te linung.

²¹Amübükuh la anguchinung nengdang Bebürü ko Levirü khyang nyümkeh jüko. Nguchi lüpcho la anguchirütinü nüh tronung longphi du lile ko müyurü ko arüh langnürüti atümung nü khehla lile.”