Read Sangtam Naga 1 ROHTHAP 29 Bible Online

1 ROHTHAP 29 - Sangtam Naga bible

1 ROHTHAP 29

¹Yangthsaba Davidnü ashimükhongrü apüm te müdhesohcho: “I tsurü Solomon tsü Tsingrangbanü throchehba tsü lile, ta abi ade azarü du ko tu mümüdhe. Ko anguchinungba nguchi tsü dirale, tunüo hi nyitsarü nengdang kuh mah, ta ABÜDONGBA Tsingrangba nengdang amübükuh lile.

²Ihnü akohcho amübükuh nengdang tsü rungnümko-hon, taripi, imüyeng, idhse, singtpah, thsidi lung, züdi nengdang lung ko riri lung khütang küdangko.

³Ihnü khyübülungcho hiri apüm chah lahkeh, Ihnü Tsingrangba amübükuh müichonü Ipu kuthsi lanü hon ko taripi mii jüko.

⁴Ihnü hon amüthseng metric ton thsih milang ko amübükuh züdi la sehyahsohnung

⁵ko sihthrirünü külüpnung liba apa apüm nengdang taripi atsauba metric ton thsih anyüpü yüre-o jüko. Ade ABÜDONGBA khyang amüküp mübü jünyürü mülio?”

⁶Hütsüde tsutpu athahti, ahung la thsazirüti, rothsarü la anüchirüti, ko Yangthsaba kuthsi bichirünü,

⁷Amübükuh nengdang hiri jünung nyengchocho; hon metric ton 170 mihlang, taripi metric ton 340 milang, imüyeng metric ton 620 ko idhse metric ton 3400 mihlang.

⁸Thsidi lung lirünü amübükuh kuthsi nengdang jücho ko hütsü Gershon hung Jehiel ko Levirünü müshocho.

⁹Müyurünü ABÜDONGBA khyang künyang du jücho, ko hütsütoi jücho nengdang arüh künyang licho. Hütsünü Yangthsaba Davidsü dee künyangcho.

¹⁰Hütsüla ashimükhongrü apüm bete Davidnü ABÜDONGBA secho. Abinü yocho, “Ihrü jümürü Jakob Tsingrang, ABÜDONGBA, Nüh müchangkapü sesohng!

¹¹Nüh arangcheh ko rezeh, ahechi ko adi. Ninglang ko alih la licho apüm michah Nüh Yangthsaba lile.

¹²Aliba ko kuthsi apüm Nü chahnü rore; Nühnü lüpcho Nü re ko ziinü thsare ko Nühnü amülah ko rezeh kangsohnung kohle.

¹³Ade ihrü Tsingrang, ihrünü Nü khyang nengse jüre ko ihrünü Nüh ahechi neng sere.

¹⁴“Ta I müyurü ko Ihnü Nü khyang tusü müjücheh, tunüo lüpcho tsü Nü chahnü jiyü lile ko ihrünü Nüpu yo du thali jüre.

¹⁵O ABÜDONGBA, ihrü jümürü kyo ihrü akang yangtsilang ko shirü kyo du khu rocho Nühnü müdhele. Ihrü akang tsü nbükhüm khüdu kyole ko ihrünü asü phungkhunung mükoh.

¹⁶O ABÜDONGBA, ihrü Tsingrang, ihrünü Nü amüwa neng dhichinung amübükuh khüdu thsanung kuthsi hidoi khyübülungko, ta hiri apüm Nü chahnü rocho ko apüm Nü yo lile.

¹⁷Nühnü apüm lasih thsatsüre ko yuje nyitsarü te longkyangre. Yuje cho ko lasih apümnü Ihnü hiri apüm Nü khyang jüre ko hila shibülung liba müyurünü künyangseh Nü khyang amübü hirocho Ihnü nguko.

¹⁸Ihrü jümürü Abraham, Isak ko Jakob Tsingrang ABÜDONGBA, Nü müyurü lasih la hitari lümlong tsü lede nengdang, lümkhung yohpüjüng ko arüh lede Nü te longlang lisohng.

¹⁹Nü yuzeng lüpcho nyinung ko Ihnü amübükuh thsanung küdang yohpübanü I tsurü Solomon khyang alongphi lasiking jüng.”

²⁰Hütsüpü Davidnü müyurü te yuzeng jo yocho, “ABÜDONGBA nührü Tsingrang neng seing!” Achotsü ashimükhongrü apümnü arüh jümürü Tsingrang ABÜDONGBA secho ko mükhukeh ABÜDONGBA ko arüh Yangthsaba khyang adhichi jücho.

²¹Nyümong khüu arühnü kangmübü nengdang kanglungrü mapsehpü, hütsü ABÜDONGBA khyang müsacheh jücho ko müyurü khyangsü tsusohnung jücho. Hütsü chah lahkeh, arühnü misüpung hajar khüdu, mizapung hajar khüdu, san hajar khüdu bholu chah üpümshünü trüp kangmübü jücho.

²²Hütsüta hütsü nyümong tsü arühnü ABÜDONGBA jingte dee künyangta tsuyongcho. Anyüpiu arühnü Solomon tsü arüh Yangthsabaepü sobhocho. ABÜDONGBA nengla arühnü abi arüh yangthsaba ko Zadok tsü bebürü thsanung müyühjo throchehcho.

²³Hütsüta ABÜDONGBAnü külüpjüba pümji la tsü Solomon tsü au David mülih Yangthsaba kangcho. Abi dee akoh yangthsaba licho ko Israel yucho apümnü abi te nyicho.

²⁴Adirüti ko rothsarü anüchirü apüm ko David tsurü aparüti mii zeh Solomon tsü Yangthsaba kangnung nyengchocho.

²⁵ABÜDONGBAnü yucho apüm khyang Solomon drüsohcho ko Israel la aparü yangthsarü apüm tenü abi alaa hechisohcho.

²⁶Jesse tsurü Davidnü Israel la kang

²⁷yüre yangthsacho. Abinü Hebron la kang dhünyeh ko Jerusalem la kang sangrepü asang yangthsacho.

²⁸Abi dee shipü akyang, alirüthsa ko apümnü jengreng jo lide sücho ko atsurü Solomon-nü abi mülihcho.

²⁹Yangthsaba David yukheh tsü adikeh lanü achangka chii azikehrü asang-Samuel, Nathan ko Gad-rünü thrahyoh lile.

³⁰Athrahcho la tsü abinü khüta thsacho, khütoh-i mülahcho ko abi ko Israel ko mükangmüshü yanglihti chah tu tikehcho, hiri apüm nengdang yo lile.