Read Sangtam Naga 2 ROHTHAP 1 Bible Online

2 ROHTHAP 1 - Sangtam Naga bible

2 ROHTHAP 1

¹Yangthsaba David tsurü Solomon-nü Israel yanglih drengdreng yohpücho ko ABÜDONGBA abi Tsingrangnü abi müwajücho ko abi dee disohcho.

²Yangthsaba Solomon-nü hajar michah ko thsih michah anüchirü, thsazirüti, tsutpu la azibarüti ko müyurüti apüm te yuzeng khüdu,

³Gibeon la mübüba müdüm lang abi yola wünung yuzeng jücho. Arühnü wücho tunüo ABÜDONGBA dikehrü Mosanü rangmü la külüpba ABÜDONGBA shükuh tsü hütsüla licho.

⁴(Ta Yuzeng Singdi tsülü Kiriat Jearim lanü singdi tsü hirode Davidnü thsaba shükuh Jerusalem la licho.)

⁵Imüyeng bholu khüi Hur shümtsurü ko Ur tsurü Bezalelnü külüpcho, hütsüsü Gibeon la ABÜDONGBA shükuh bete licho. Yangthsaba Solomon ko müyurütinü hütsüla mübücho.

⁶Shükuh bete tsü Yangthsabanü imüyeng bholu chah tsü ABÜDONGBA khyang kangmübü jo mübücho; abinü kanglungrü hajar khüdu kyüsehcho ko hütsü chah apüm trüpcho.

⁷Hütsü romang Tsingrangbanü Solomon te chüro tsingdhengcho, “Ihnü nü khyang tu jüsohnyüro?”

⁸Solomon-nü lalingcho, “Nühnü Iu David te amüi amülah ngusohko, ko ade abi mülih Ih Yangthsaba kangsohko.

⁹O ABÜDONGBA Tsingrang, Nühnü Iu te nyengchocho tikehsohng. Nühnü müyurü hidoi michah Yangthsaba kangsohko,

¹⁰hütsüeko arüh michah yangthsanung lümlong ko amüdhe jüng. Hütsüta müthsakhang Ihnü Nü müyurü hidoi michah khüta yangthsanung?”

¹¹Tsingrangbanü Solomon te yocho, “Nühnü athsalang throchehko. Nühnü kuthsi, nengse, nü rorüh süsohnung mahkhang kutsüp müching, ta I müyurü michah yangthsanung lümlong ko amüdhe chingko.

¹²Ihnü nü khyang lümlong ko amüdhe jünung. Hütsü chah lahkeh, tu yangthsarünü mülidhengcho ko hikosü mülidhengnung, Ihnü nü khyang kuthsi ko nengsesü jünung.”

¹³Hütsüpü Solomon-nü ABÜDONGBA shükuh liba Gibeon la amübü müdüm tsü pehjüpü Jerusalem lang thalicho. Hütsüla abinü Israel michah yangthsacho.

¹⁴Solomon-nü kuri kari hajar khüdupü thsih müyü, ko khata kuri hajar dhüre-anyühnü rothsarü mülung külüpcho. Abinü khürü Jerusalem ko khürü apa yangditi la yohpücho.

¹⁵Abi chichah Jerusalem la hon ko taripi tsü lung roh-i ko cedar sing tsü Juda zong jingdümpi la papasi sing roh-i thangchi bichicho.

¹⁶Yangthsaba pohki anguchirünü Musri ko Cilicia lanü kuri,

¹⁷ko Ijip lanü kuri kari lihcho dhengyehcho. Arühnü Hit-rü ko Syriarü khyang kuri kari khüdu la taripi 600 ko kuri khüdu la taripi 150 ngang icho.