Read Sangtam Naga 2 ROHTHAP 10 Bible Online

2 ROHTHAP 10 - Sangtam Naga bible

2 ROHTHAP 10

¹Rehoboamnü Shekem lang wücho ko hütsüla kihku lahpi Israelrü apüm abi Yangthsaba kangsohnung shimükhong licho.

²Nebat tsurü Jeroboam, sü Solomon tenü tsiwü Ijip la licho, abinü yusi hi yuchide, arüh lih lang thali rocho.

³Kihku lahpi yuchotinü abi dsinung müthehcho ko arüh atümungnü müjang Rehoboam yanglang wü abi te yocho,

⁴“Nüunü ihrü chah bhamüling amülah jücho. Nühnü hiri bhamüling hi yingyasohkhang ko ihrü akang tsa lisohkhang, ihrünü nü pohki yochonyi linung.”

⁵Rehoboamnü yocho, “Ihnü hiba khiyu lümdhengnung I khyang nyümong asang bekhyah jüng. Hütsüpü thali rung.” Achotsü müyurünü tsicho.

⁶Yangthsaba Rehoboamnü hütsü au Solomon khyang lümlong jürü azirüti te kihtacho. Abinü tsingdhengcho, “Ihnü hiri nyitsarü khyang tu alalingba jünung?”

⁷Arühnü lalingcho, “Nühnü hiri nyitsarü müi alümdhengba alalingba jo arüh künyangsohkhang, arühnü lede yochonyi nüh dikehnung.”

⁸Ta abinü azirütinü yocho tsü pehjüpü arüh aroh surorü ko ade abi khyang lümlong jürü dhrezarüti yanglang wü tsingdhengcho,

⁹“Tu khüta nguchinung nührünü I te yonung? Arüh bha yingyasohnung tsingdhengrü te Ihnü to pü lalingnung?”

¹⁰Arühnü yocho, “Nühnü arüh te hita young: ‘I müyungza achangtpü hi Iu kihrüm tenü achehba lile’

¹¹Iunü nührü michah bhamüling zangkehjücho; Ihnü alaa amülingu kangsohnung. Iunü nührü chah müyahnü xüpcho, Ihnülü nührü chah tpolu yonü xüpnung.”

¹²Nyümong asang khanglang, Jeroboam ko müyurüti apüm abinü yocho kyo Rehoboam yanglang rocho.

¹³Yangthsabanü azirüti athülaba pehjüpü dhrezarütinü yochonyi arüh te dee kako chotacho.

¹⁴Abinü yocho, “Iunü nührü chah bha amüling zangkehjücho; Ihnü alaa amülingba zangkehjünung. Abinü nührü chah müyahnü xüpcho, Ihnü nührü chah tpolu yonü xüpnung.”

¹⁵Hi Shilo la azikehrü Ahija khu Nebat tsurü Jeroboam te tu yocho hütsü tikehsohnung tsü ABÜDONGBA lümcho licho. Hütsü khu Yangthsabanü müyurü tsü seh mükhichi bichicho.

¹⁶Khode müyurünü arüh lümcho yangthsabanü mükhyü pü müdhecho, arühnü züdecho, “David ko abi kukhi khülusohng! Arühnü Ihsa shulüm tu nguchicho? Israelrü, Ihsanü kuh lang thalinung. Rehoboam tsü ajangjang thsasohng.”

¹⁷Hütsüta Israelrünü nyüm yacho ko Rehoboam tsü Juda la lirü nengdang du Yangthsaba thsa pehjücho.

¹⁸Achotsü Yangthsaba Rehoboamnü Israelrü yanglang hehnehthsarü michah anüchirü Adoniram müthehcho, ta arühnü abi kengsehpehcho. Hütsü ngu Rehoboamnü dhsüthsa kuri kari la pümpü Jerusalem lang rang tsicho.

¹⁹Hütsütinü kihku lahpi liba Israelrünü David hung te nyümta licho.