Read Sangtam Naga 2 ROHTHAP 17 Bible Online

2 ROHTHAP 17 - Sangtam Naga bible

2 ROHTHAP 17

¹Jehoshafat tsü au Asa mülih Yangthsaba kangcho ko Israel nyüm alaa drengdrengchicho.

²Abinü Juda lih la Juda la lungnü tbüticho yangditi la ko Efraim lih la Asanü mahchehcho yangditi la rothsarüti yohpücho.

³ABÜDONGBAnü Jehoshafat müwajücho, tunüo abinü au akhulang akang kyo Baal tsingrang mümübücho.

⁴Abinü au Tsingrang dikehcho, Tsingrangba yuzeng bichicho ko Israelrü Yangthsarü kyo münguchicho.

⁵ABÜDONGBAnü Jehoshafat khyang Juda yanglih drengdreng yohpüsohcho ko müyurü apümnü abi khyang jiyü hirojücho, hütsünü abi alirü kangcho ko dee dhichi licho.

⁶Abinü ABÜDONGBA dikehba la künyangcho ko müyudsirü mübüba müdüm thsangnyangjücho ko Juda la Ashera tsingranglarü kyothri thsangnyang pehjücho.

⁷Abi yangthsacho kang asangu la, abinü Juda yangditi la dosohnung adirü hiri müthehcho: Benhail, Obadia, Zekaria, Nethanel ko Mikaia.

⁸Arüh tsü Levirü düku ko bebürü anyünü müyangcho. Levirü tsü Shemaia, Nethania, Zebadia, Asahel, Shemiramoth, Jehonathan, Adonija, Tobija, Tobadonija; ko bebürü tsü Elishama ko Jehoram.

⁹Arühnü ABÜDONGBA Yuzeng vakha hipü Juda lih apümlang müyurü te donü wücho.

¹⁰ABÜDONGBAnü mükangmüshü yanglih sünüsü Yangthsaba Jehoshafat nyüm khata müwüsohnung drüsohcho.

¹¹Filistinrü khürünü Jehoshafat khyang taripi ko apa jiyüti khütang hirojücho ko Arabrü khürünü abi khyang san hajar dhünyeh thsih dhünyeh, ko miza hajar dhünyeh thsih dhünyeh hirojücho.

¹²Hütsüta Jehoshafat tsü alaa adiu kangcho.

¹³Juda lih apümlang tsuyongba zahkehji yangditi lungnü tbüticho.

¹⁴Jerusalem la abinü arüh ahung aichi anengkhong thsazirüti yohpücho. Juda hung lanü Adna tsü rothsarü la anüchiba, abi pohki rothsarü lakh asang licho.

¹⁵Abi chitung tsü Jehohanan, abi te rothsarü lakh anyüh hajar qure licho,

¹⁶asanguba tsü Zikri tsurü Amasia, abi te lakh anyüh licho. (Amasianü ABÜDONGBA dikehnung khakhuchüjücho.)

¹⁷Benjamin hung lanü anengkhong rothsarü anüchirü Eliada licho, abi pohki tsung ko singthsalu birü nyüh lakh anyüh licho.

¹⁸Abi chitung anüchiba tsü Jehozabad, thsunohrü kükyo birü, abi te nyüh lakh khüdu hajar qure licho.

¹⁹Abinü Juda la atbüticho yangditi la rothsarü yohpüchochah lahkeh, hiri nyitsarü Jerusalem la Yangthsaba dikehcho.