Read Sangtam Naga 2 ROHTHAP 18 Bible Online

2 ROHTHAP 18 - Sangtam Naga bible

2 ROHTHAP 18

¹Khode Juda Yangthsaba Jehoshafat alirü ko anengkhong kangcho, abinü abi kukhi lanü nyüh khüdu Israel Yangthsaba Ahab kukhi te kukangnung rungnümcho.

²Kang adrong khanglang Jehoshafatnü Ahab shirünung Samaria yangdi lang wücho. Jehoshafat ko abi yola rorüh dhichinung, Ahabnü san ko misü khütang mapseh thsüti külüpcho. Abinü Gilead la Ramoth yangdi mahnung la abi yola Jehoshafat tsü zehsohnyücho.

³Abinü yocho, “Ramoth mahnung I yola nühsü ronung mah-o?” Jehoshafatnü lalingcho, “Nühnü zehsohnyükhang Ih ko I rothsarü zehnung rungnüm du lile. Ihrünü nü yola zehnung.”

⁴Hütsüpü abinü yocho, “Ta akhudi Ihsanü ABÜDONGBA te kihtanung.”

⁵Achotsü Ahabnü azikehrüti arüh thsih müyü dsiyoh arüh te tsingcho, “Ihnü Ramoth mahnung wünung müwünung?” Arühnü lalingcho, “Hütsü mahng. Tsingrangbanü nü khyang akoh jünung.”

⁶Ta Jehoshafatnü tsingdhengcho, “Ihsanü ABÜDONGBA te tsingdhengnung aparü azikehrü khürü mülio?”

⁷Ahabnü yocho, “Imla tsurü Mikaia lile. Ta Ihnü abi thrünyire, tunüo abinü khodesü I nengdang atsa müchoyohre; lede amütsa du thsare.” Jehoshafatnü lalingcho, “Nühnü hütsüta tücho.”

⁸Achotsü Yangthsaba Ahabnü kuhla adirü khüdu dsinü abi te hütsüdenü wü Mikaia noronung yocho.

⁹Yangthsarü anyüh tsü yangthsarü jengki khyüpü, Samaria tbükhüm mihlang pungkhyang müdüm la tsü yangthsarü pümji chah tsü pümcho ko azikehrü apümnü anyüh bete choyoh licho.

¹⁰Arüh yola nyüh khüdu, Khenana tsurü Zedekianü idhsenü ajüh külüp-pü Ahab te yocho, “ABÜDONGBAnü hita yore, ‘hi bipü nühnü Syriarü te khatanung ko nühnü arüh sehchi kohnung.’ ”

¹¹Aparü azikehrü atümungnü hütsü akyokyo tsü yocho. Arühnü yocho, “Ramoth nyüm shemüsung ko nühnü kohnung. ABÜDONGBAnü nü khyang akoh jünung.”

¹²Hütsütade Mikaia nünung wüba adiba tsünü abi te yocho, “Aparü azikehrü atümungnü Yangthsabanü kohnung du choyohko, nühnüsü hütsüta du choyohng.”

¹³Ta Mikaianü lalingcho, “Akang liba ABÜDONGBA nengla, I Tsingrangnü I te tu yonang hütsü du yonung!”

¹⁴Khode abi Yangthsaba Ahab yanglang rocho, “Mikaia, Ramoth mahnung Jehoshafat Ihjünü wünung müwünung?” Mikaianü yocho, “Mahng! Akohlü nühjünü kohnung. ABÜDONGBAnü akoh jünung.”

¹⁵Ta Ahabnü lalingcho, “Khode nühnü I te ABÜDONGBA nengla chonang, yuje choung! Ihnü hütsü nü te khüdopi yonung?”

¹⁶Mikaianü yocho, “Ihnü Israelrü rothsarü azong la san nyahrü müliba san kyo shupishuza ngure. Ko ABÜDONGBAnü yocho, ‘Hiri nyitsarü anüchirü müle; arüh kuh lang tbachi tsisohng.’ ”

¹⁷Ahabnü Jehoshafat te yocho, “Abinü khodesü I nengdang atsa müchorepü Ihnü nü te yoko; lede tunang amütsa du thsanung.”

¹⁸Mikaianü yocho: “Ade ABÜDONGBAnü tu yoro hütsü nyieng. Ihnü ABÜDONGBA tsü ninglang apümji la pümpü ko ninglang riwürütinü abi mükangti ya ngure.

¹⁹ABÜDONGBAnü tsingdhengcho, ‘Ahab tsü wü Ramoth la kyüsehsohnung sünü abi kihyochünung?’ Riwürü khürünü lango ko aparü khürünü apa yocho,

²⁰hütsüpü anbü khüdu belang ro ABÜDONGBA te yocho, ‘Ihnü abi kihyochünung. ABÜDONGBAnü tsingdhengcho, Khüta?

²¹Anbü tsünü lalingcho, Ihnü wünung ko Ahab azikehrü apüm khyang arahkheh chosohnung. ABÜDONGBAnü yocho, Wüng ko abi kihyochüng. Nühnü kohnung’ ”

²²Ko Mikaianü changka yocho, “Hütsüta tikehko. ABÜDONGBAnü nü azikehrüti khyang nü te arahkheh chosohko. Ta Abinü nüh asü mütohnungepü yoko.”

²³Hütsüde azikehrü Zedekianü Mikaia yang küducho, aromih la tangcho ko abi te tsingdhengcho, “Khode tinü ABÜDONGBA anbünü Ih pehjüpü nü te chotaro?”

²⁴Mikaianü yocho, “Nühnü kuhjonglang rang pümde müdhenung.”

²⁵Hütsüde Yangthsaba Ahabnü abi adirü khüdu te yuzeng jo yocho, “Mikaia tsü rang ko yangdi governor Amon ko Yangthsaba tsurü Joash nyüh yanglang nowüng.

²⁶Abi akhangti kuhla yohpüngding ko Ih müthalide kih dunü kang yang.”

²⁷Mikaianü yocho, “Nüh khümcho thalikhang, ABÜDONGBAnü Ih khu müchota.” Abinü yocho, “Ihnü tu chocho hütsü atümungnü nyieng.”

²⁸Hütsüde Israel Yangthsaba Ahab ko Juda Yangthsaba Jehoshafat nyühnü Gilead la Ramoth yangdi mahnung wücho.

²⁹Ahabnü Jehoshafat te yocho, “Ihjü khata lang wüde, Ihlü I tsah thrimülanung, ta nühlü Yangthsarü jengki yohng.” Hütsüta Israel Yangthsaba tsü atsah thrimülapü khatanung wücho.

³⁰Syria Yangthsabanü abi kuri kari anüchirü te Israel Yangthsaba chah khu aparü süsü müpehnung yuzeng jücho.

³¹Achotsü arühnü khode Yangthsaba Jehoshafat ngucho, arüh atümungnü abi tsü Israel Yangthsabaepü lümcho ko arühnü abi beticho. Ta Jehoshafatnü züdecho ko ABÜDONGBA Tsingrangnü abi khümchocho ko abi beba lanü shehlicho.

³²Kuri kari nürütinü abi tsü Israel Yangthsaba mah pü müdhecho, achotsü arühnü abi mü-iiwücho.

³³Mülongdipü Syriarü rothsarü khüdunü atbüdeng khüdunü kyade hütsünü Yangthsaba Ahab khata jengki ko pakyarü nyüh kahla kyacho. Abinü abi kuri kari nüba te yocho, “Ih thsakehko!” Ximüla khata la tsünü Ih nücheh tsieng.

³⁴Khata bhülong la Yangthsaba Ahablü abi kuri kari la Syria lahpi abe pipü ngakeh licho. Nyü züdude abi sücho.