Read Sangtam Naga 2 ROHTHAP 2 Bible Online

2 ROHTHAP 2 - Sangtam Naga bible

2 ROHTHAP 2

¹Yangthsaba Solomon-nü ABÜDONGBA mübünung Amübükuh khüdu ko apu nengdang yangthsaba kuh khüdu thsanung dhrongchehcho.

²Abinü kusing dhichinung nyitsarü hajar nyühre ko lung zangnung nyitsarü hajar qure yohpücho. Ko nguchi dhengyehnung nyüh hajar asangpü thsih dhüroh yohpücho.

³Solomon-nü Tyre Yangthsaba Hiram yang yusi khüdu müthehcho. “Nühnü Iu David te abi Yangthsaba kuh thsanung Cedar singpungtüm icho kyo, I tesü ieng:

⁴ABÜDONGBA I Tsingrang dhichinung Ihnü amübükuh khüdu thsare. Hütsü Ih ko I müyurünü axümlichi müchiji trüpnung, ihrünü mütozah Amüsa hümthse mübünung ko Sabath nyümong, Chonu Asi Thsüti ko ABÜDONGBA ihrü Tsingrang dhichinung Amüsa nyümong roh-i anyangnyü ko anyüzehlang mükhu trüp mübü jo Abi mübünungba Amüsa müdüm linung. Hütsüta akang ayung nguchinung Abinü Israel khyang yuzeng jüko.

⁵Ihnü Amübükuh tsü arangcheh thsanyüre, tunüo Ihsa Tsingrang tsü aparü apüm tenü adiu lile.

⁶Ta sünüsü Tsingrangba khyang amübükuh müthsajücheh, tunüo ning nüsü Abi müzuhnung. Khang Ihnü khüta amübükuh tsü Abi khyang müchiji trüpnung tenü alaa adiu thsachehnung?

⁷Ade I khyang ayah tohnung hon, taripi, imüyeng, idhse ko shü apulu, anyahrüm ko amoh shü hiri nguchi la axangchehrü nyüh khüdu müthehng. Abi tsü Iu Davidnü throchehba Juda ko Jerusalem lanü rorüh sihthrirü yola nguchinung.

⁸Nü nyitsarünü sing dangzangnung müdhele, hütsüeko Lebanon lanü I khyang cedar, cypres ko Juniper singpungtüm chixieng.

⁹Singtpah khütang küdangnung la nü nyitsarü tronung I nyitsarü müthehnung rungnüm lile, tunüo Ihnü thsanung lümba amübükuh tsü arangcheh ko ahechi keh linung.

¹⁰Nü nyitsarü anguchirü nengdang, Ihnü litoh metric ton hajar anyüh, lüdi metric ton hajar anyüh, yongkha liter lakh müyü ko olive tuji liter lakh müyü müthehnung.”

¹¹Yangthsaba Hiramnü Solomon te hita lalingcho, “ABÜDONGBAnü Abi müyurü müichonü abinü nüh Yangthsaba kangsohko.

¹²ABÜDONGBA Israel Tsingrang, Ning ko alih külüpbong neng seing. Abinü Yangthsaba David khyang athsehthsa ko anyicheh atsurü khüdu jücho ko ade abinü ABÜDONGBA khyang amübükuh khüdu ko apu nengdang Yangthsaba kuh khüdu thsanung dhrongre.

¹³Ihnü nüh yang athsehthsa ko axangcheh sihthrirü nyüh khüdu anengnü Huramabi müthehre.

¹⁴Atpa tsü Dan hung lanü ko au tsü Tyrerü. Abinü hon, taripi, imüyeng, idhse, lung ko sing lanü lüpcho külüpnung müdhele. Abinü shü apulu, anyahrüm, amoh ko anananü külüpnung kohle. Abinü ayah adhangpi ko abi te thongucho lüpcho hamcheh hamla külüpnung kohle. Abi tsü nü nyitsarü sihthrirü ko nüu Yangthsaba David khyang nguchijürüti yola nguchisohng.

¹⁵Hütsüeko ade nühnü nyengchoba litoh, lüdi, yongkha ko olive tuji tsü ihrü khyang müthehng.

¹⁶Ihrünü Lebanon zong la tsünü nühnü khyünyüba cedar sing tsü renung, arüh tsü bhongnung ko Joppa chii kihdi la tsünü müyeh jürosohnung. Hütsü lanü nühnü Jerusalem yang hiwüng.”

¹⁷Yangthsaba Solomon-nü au Davidnü mono khiba roh-i, Israel la liba shuparü apüm mono khicho. Hütsüla shuparü lakh khüdu hajar dhünyangpü asang thsih dhüroh licho.

¹⁸Abinü kusing dhichinung arüh hajar nyühre, ko azong la lung hamnung hajar qure, ko nguchi dhengyehnung nyüh hajar asang thsih dhüroh throchehcho.