Read Sangtam Naga 2 ROHTHAP 23 Bible Online

2 ROHTHAP 23 - Sangtam Naga bible

2 ROHTHAP 23

¹Kang dhüroh yingpü bebüba Jehoiadanü adelü nguchinung akyangepü dhrongchehcho. Abinü rothsarü anüchirü arüh nyüh münga: Jehoram tsurü Azaria, Jehohanan tsurü Ishmael, Obed tsurü Azaria, Adaia tsurü Maseia ko Zikri tsurü Elishafat te zengtacho.

²Arühnü Juda yangdi apümlang wücho ko Levirü ko ahung apüm la athahti Jerusalem lang norocho.

³Arüh apüm amübükuh la tsü shibülungcho ko Yangthsaba tsurü Joash te azengchotaba külüpcho. Jehoiadanü arüh te yocho, “Hi asuu Ahazia tsurü lile! ABÜDONGBAnü David te abi trah lanü yangthsasohnung nyengchocho kyo, abi ade Yangthsaba kangnung.

⁴Ihsanü hita nguchinung. Khode Sabath nyümong bebürü ko Levirüti nguchinung ronang, arüh nohlüm asang la nohlüm khüdu amübükuh tbükhüm nyahnung,

⁵nohlüm khüdu tsünü Yangthsaba kuh nyahnung ko anyingcho tsü Akhyümdi Tbükhüm la yasohnung. Ko müyurü apüm amübükuh kekhüm te shimükhongnung.

⁶Amübükuh la tsü anguchirü bebürü ko Levirü chah khu süsü müzüdunung. Arüh züdunung kohle, tunüo arüh tsü khakhuchüjüko, ta anyingcho müyurü tsülü ABÜDONGBA yu nyi dongkhu yang.

⁷Levirü tsünü arüh nohsheng bipü Yangthsaba mükang nyah yanung ko abi khüdederü wünye abi te linung. Sünü Amübükuh la züdunung müküpnang abi tsü süsohnung.”

⁸Levirü ko Judarünü Jehoaiadanü thülaba tsü nguchicho. Arüh Sabath nyümong nguchi thüm tsinye, nyitsarüti tsü müshishocho, achotsü anüchirü tsü nguchi lang rorüh ko atsirü anyüding te licho.

⁹Jehoiadanü Yangthsaba David yo amübükuh la yohpüba thsuh ko tsung tsü anüchirü khyang jücho.

¹⁰Abinü Yangthsaba tsungtinung shulüm Amübükuh bete ko mükangnü nohsheng bipü nyitsarüti yasohcho.

¹¹Hütsüpü Jehoaiadanü Joash tsü chürosohcho, athah la kuthri tsü thrijücho ko Yangthsaba kangnung yuzeng vakha khüdu jücho. Hütsüta abi Yangthsaba kangsohcho. Bebüba Jehoaiada ko abi tsurütinü Joash müyühjo throchehcho ko apümnü züdecho, “Yangthsaba Kutsüp Lieng!”

¹²Müyurünü Yangthsaba neng secho tsü Athalianü yuchi müyurü shibülung liba amübükuh lang tsü abükyünü shang wücho.

¹³Hütsüla amübükuh trahtri la, yangthsarü nengdang dongdi khyümpüba la tsü rothsarü ko rühti mehrünü mükangtipü Yangthsaba asi tsü ya abükyünü ngucho. Müyurü apümnü akünyangnü züdecho ko rühti meh ko amübükuh la khithsarüti tsünü nüpü thsüti tsü khyoyacho. Abükyünü hütsü ngu awahchonü ashü rehnah khong züdecho, “Akihyochürü! Akihyochürü!”

¹⁴Jehoiadanü amübükuh mükang la Athalia tsü mükyüsehsohnyücho, hütsünü abinü rothsarü anüchirü te dsicheh yocho, “Anyahrü chung kahla tsünü abükyü tsü nücheh tsieng ko sünü abükyü tsü khümchonung müküpnang abi tsü kyüsehng.”

¹⁵Arühnü abükyü rangcho, Yangthsaba kuh lang nowücho ko hütsüla Kuri Tbükhüm la tsü abükyü kyüsehcho.

¹⁶Bebüba Jehoiadanü abi yola Yangthsaba Joash ko müyurü, arüh ABÜDONGBA müyurüepü zengchotaba la zehsohcho.

¹⁷Hütsüpü arüh atümungnü Baal amübükuh lang wücho ko hütsü tphünahjücho. Arühnü hütsüla kyothri ko bholu mapnah pehjücho ko bholu bete tsünü Baal bebürü Mattan tsü kyüsehcho.

¹⁸Jehoiadanü bebürü ko Levirü tsü amübükuh nguchi dhengyehsohcho. Arühnü arüh khyang Yangthsaba Davidnü nyümkehjücho nguchi tsü nguchinung ko Mosa yuzengnü mülacho kyo ABÜDONGBA khyang mübücho kangmübü trüpnung. Khithsaba ko thsüti nguchi tsüsü arühnü dhengyehnung.

¹⁹Ayahnü mümüsarü yatinung nengdang Jehoiadanü amübükuh tbükhüm lasü anyahrü yohpücho.

²⁰Rothsarü anüchirüti, shutsakhung azirüti, thsazirüti ko müyurü apümnü amübükuh lanü Yangthsaba kuh lang yanglongdse noroba la tsü Jehoiada yola zehcho. Arühnü tbükhüm adiuba la tsünü zürocho ko Yangthsaba tsü Yangthsaba pümji la pümsohcho.

²¹Adelü Athalia tsü süchonü, müyurü apüm akünyangnü jengcho ko yangdi tsü tbachi kangcho.