Read Sangtam Naga 2 ROHTHAP 24 Bible Online

2 ROHTHAP 24 - Sangtam Naga bible

2 ROHTHAP 24

¹Joash tsü kang dhünyeh thsade Juda la Yangthsaba kangcho ko abinü Jerusalem la kang yüre yangthsacho. Atpa tsü Bersheba yangdi lanü Zibia licho.

²Abinü bebüba Jehoiada akang li ayung ABÜDONGBAnü künyangnungthsa nguchicho.

³Jehoiadanü Yangthsaba Joash khyang anitpü anyüh khyüjücho ko anyünü abi khyang khingkurü ko adhrerü nümüsujücho.

⁴Abinü azachah yangthsapü, Joashnü Amübükuh thsachinung dhrongchehcho.

⁵Abinü bebürü ko Levirü te wünü Juda yangdi lanü müyurü chahnü Amübükuh thsachinung thsi akükyüh khyübülungnung yuzeng jücho. Abinü arüh te nguchi tsü zah nguchinung yocho, ta Levirünü münucho,

⁶achotsü abinü arüh anüchiba Jehoiada dsinü yocho, “Tuepü Judarü ko Jerusalemrü chahnü ABÜDONGBA dikehrü Mosa te ABÜDONGBA shükuh nengdang müyurü chahnü amüthsüh dhrinung mülacho nguchi Levirü khyang müdhrisohro?”

⁷(Amükhyu khingkurü Athalia mononü amübükuh thsangnyangcho ko hütsüla Amüsa kohro adrong Baal mübüba la bichipü licho.)

⁸Yangthsabanü Levirü te amübü khyübülungnung singdi khüdu külüpnü amübükuh trahtri la yohpünung yuzeng jücho.

⁹Hütsüpü arühnü Juda ko Jerusalem apümlang, akhudi akungaselih la Mosanü dhriba amüthsüh sü nyitsarü müipinü ABÜDONGBA khyang hironung yu jücho.

¹⁰Hinü müyurü ko arüh langnürüti künyangcho ko arühnü amüthsüh thsi tsü hirocho ko singdi tsü jengcho.

¹¹Nyümong mükhu Levirünü singdi tsü Yangthsaba kuhla hütsü xükümba adiba yanglang hiwücho. Khodederü hütsü jengnang Yangthsaba kuhla athrahba ko Amungthriba Bebüba nyühnü thsi tsü khyüchehnung ko singdi tsü ayohpüji la thali yohpücho. Hütsüta arühnü thsi khütang khyübülungcho.

¹²Yangthsaba ko Jehoiada nyühnü thsi tsü amübükuh thsachiba anüchirü khyang jücho ko arühnü hütsü lung mistri, sing mistri ko idhse nguchirüti nyükheh mülihcho.

¹³Nguchirü apümnü dee müküp nguchicho ko amübükuh tsü akhudi kyo thali thsachehcho.

¹⁴Khode thsachiba nguchi tsü thümcho, anyingcho hon ko taripi tsü Yangthsaba ko Jehoiada nyüh khyang jücho ko anyünü amübükuh nengdang mütpah-tbhü ko apa tsangfü-hifü külüpcho.

¹⁵Jehoiada akang ayung, amübükuh la lede kangmübü mübücho. Abi kang thsihpü sangre shi lipü sücho.

¹⁶Abinü Israelrü mono, Tsingrangba, ko Amübükuh nengdang tsa nguchicho ngang arühnü abi David yangdi la yangthsarü kong la dhrürangcho.

¹⁷Ta Jehoiada sükolü, Juda la langnürütinü Yangthsaba Joash khyang arüh yu nyisohcho.

¹⁸Hütsünü müyurünü Amübükuh la arüh jümürü Tsingrang, ABÜDONGBA mümübücho ko arühnü Ashera tsingranglarü kyothri mübünung dikehcho. Hiri arüh müyurü Juda ko Jerusalem chah ABÜDONGBA rihlong küducho.

¹⁹ABÜDONGBAnü Abi yang ximülasohnung arüh yang azikehrü müthehcho, ta arühnü münyicho.

²⁰Hütsüde Tsingrangba anbünü bebüba Jehoiada tsurü Zekaria rangcho. Müyurünü ngunung müdüm khüdu la yapü abinü züdecho, “Tuepü Abi amülaba münyipü nührübürü chah achangba hirosohropü ABÜDONGBA Tsingrangbanü tsingdhengre! Nührünü Abi pehjüko, hütsünü Abinü nührü pehjüre.”

²¹Yangthsaba Joashnü Zekaria süsohnung la zehcho, ko Yangthsaba yuzengnü müyurü khyang amübükuh kekhüm la kengsehsohcho.

²²Zekaria au Jehoiadanü yochonyi abi dikehcho Yangthsabanü nbüchücho ko Zekaria mapsehcho. Zekaria müsi longde abinü yocho, “Nühnü nguchiba tsü ABÜDONGBAnü ngung ko nüh khingching!”

²³Hütsü kang mamüki la, Syria rothsarünü Juda ko Jerusalem mahcho, langnürü apüm kyüsehcho ko Damaskas lang kuthsi adrong zang hitsicho.

²⁴Syria rothsarü aikyah du, ta ABÜDONGBAnü Judarü rothsarü khütang kohsohcho, tunüo müyurütinü arüh jümürü ABÜDONGBA Tsingrang thrüchahchüpehcho. Hütsüroh-i Yangthsaba Joash khingchicho.

²⁵Abi dee khee lerohpehcho ko arorüh shehlide, abi pohki adirü anyünü abi nyüm rah külüpcho ko bebüba Jehoiada mapsehcho rühyangnü arühnü abi chongnong chah mapsehcho. Abi me David yangdi la dhrürangcho ta yangthsarü kong la müdhrürangcho.

²⁶(Abi nyüm arah külüprü tsü Amonlarü Shimeath tsurü Zabad ko Moablarü Shimrith tsurü Jehozabad.)

²⁷Yangthsarüti vakha la tsü Joash tsurüti yukheh, abi nyüm choyohchoti ko abinü amübükuh thsachicho thrah zehle. Abi tsurü Amazia tsü abi mülih Yangthsaba kangcho.