Read Sangtam Naga 2 ROHTHAP 25 Bible Online

2 ROHTHAP 25 - Sangtam Naga bible

2 ROHTHAP 25

¹Amazia kang mükyüpü münga thsade abi Yangthsaba kangcho ko abinü Jerusalem la kang mükyüpü düku yangthsacho. Atpa Jerusalem lanü Jehoadin licho.

²Abinü ABÜDONGBAnü künyangnungthsa nguchicho, ta tütohnyünyehnü nguchicho.

³Abi suhzeh kangde, abinü au mapsehrü thsazirüti süsohcho.

⁴Ta abinü atsurütilü müsüsohcho, ta ABÜDONGBAnü Mosa Yuzeng la mülacho bichicho: “Atsurütinü thsamehcho ngang tpurüti müsüsohnung, ko tpurünü thsamehcho ngang tsurüti müsüsohnung; nyitsarü khüdu tsü apu thsamehcho ngang du süsohnung.”

⁵Yangthsaba Amazianü Juda ko Benjamin hung nyitsarü, arüh tsutpu aichi rothsarü hajar ko thsih mülung kang changnahpü arüh michah anüchirü thro yohpücho. Hi kang mükyüpü amilang azirü nyitsarü atümungnü lakh asang licho. Arüh thsuh ko tsung bichinung asithsa, chitanung adekheng throchehcho rothsarüti.

⁶Hütsü chah lahkeh abinü Israel lanü rothsarü lakh khüdu taripi süreh hajar asangpü thsih müyü nü lihcho.

⁷Ta azikehrü khüdu Yangthsaba yang wünü abi te yocho, “Israel rothsarü hiri nü yola tünowü. Kihkulang yanglih lanü roba nyitsarü hiri te ABÜDONGBA müzeh.

⁸Rothsa la arühnü nührü zehsohnung nühnü lümre, ta akoh ko amükoh jünung tsü Tsingrangba chah tase lile, ko Abinü nü rorüh khyang nüh kohsohnung.”

⁹Amazianü azikehba te tsingdhengcho, “Ta Ihnü arüh khyang taripi hütsüdoi jüba tsü khüta?” Azikehbanü lalingcho, “ABÜDONGBAnü hütsü tenü nü khyang alaa jüchehle!”

¹⁰Achotsü Amazianü amülihcho rothsarüti te kuh lang thalinung yocho. Hütsünü arüh Judarü te khütang zichüro arüh kuh lang thalicho.

¹¹Amazianü re zehchipü Mih Ngah lang abi rothsarü nüpü wücho. Hütsüla arühnü Edomrü te chitapü rothsarü hajar dhüre kyüsehcho

¹²ko hajar dhüre akangnü rangcho. Arühnü rangcho nyitsarüti tsü Sela yangdi te lungdhong michah no tuwü dümchahchücho, hütsüta arüh lungdhong pohki thungsehkhangcho.

¹³Hütsüde Amazianü abi yola chita lang münowüba Israel rothsarütinü Samaria la Beth Horon nyüh kahla liba Judea yangditi mahcho ko nyüh hajar asang kyüsehpü kuthsi khütang rohchocho.

¹⁴Amazianü Edomrü kohpü thalide, abinü arüh kyothri hirocho ko hütsü yohpüpü müchiji tah mübücho.

¹⁵Hütsünü ABÜDONGBA zichürocho, achotsü Amazia yang azikehrü khüdu müthehcho. Azikehbanü yocho, “Tuepü arühbürü nyitsarü mii nü kheh lanü khümchonung mükohba yangpirü tsingrangti nühnü mübüro?”

¹⁶Amazianü lalingcho, “Khode tinü ihrünü nüh Yangthsaba khyang lümlong jürü kangsohcho? yuva tüchüro, mahkhang Ihnü nüh süsohnung!” Azikehrü tsünü zahcho ta yocho, “Tsingrangbanü nüh changjünung dhrongchehcho Ihnü müdhele, tunüo nühnü hiri apüm nguchiko ko Ihnü yocho mükhyü.”

¹⁷Juda Yangthsaba Amazia ko abi khyang lümlong jürütinü Israel nyüm arah külüpcho. Achotsü abinü Jehu shümtsurü ko Jehoahaz tsurü Israel Yangthsaba Jehoash yang abi te khatanung khyangchi yusi müthehcho.

¹⁸Amazia te Jehoashnü hita lalingcho, “Khüdupi Lebanon zong la zengtrung khüdunü Cedar sing yang hita müthehcho: ‘Nü tsulatpü tsü I tsurü kuhla xengsohng.’ Rangmü kanglungrü lahkhucho ko zengtrung tsü dhrümnah pehcho.

¹⁹Amazia, ade nühnü Edomrü kohchonü müthsehre, ta nü kuhla yaa püm. Nüpu ko nü müyurü chah du achangba hironung tuepü ruhmüsuro”

²⁰Ta Amazianü münyicho. Amazia amükoh ngunung tsü Tsingrangba lümcho thsacho, tunüo abinü Edomrü kyothriti mübücho.

²¹Achotsü Israel Yangthsaba Jehoashnü Juda Yangthsaba Amazia nyüm khata suhwücho. Arüh Juda lih Beth Shemesh la dhsükehtacho,

²²Juda rothsarüti khülucho ko rothsarüti tsishocho.

²³Jehoashnü Amazia rangcho ko Jerusalem lang nowücho. Ko abinü Efraim Tbükhüm lanü Ajongnah Tbükhüm chii, adukah khehap thsih müyü yangdi tbü tsü thsangnyangjücho.

²⁴Ko abinü Amübükuh la hon ko taripi, Obed Edom trahnü nyahba Amübükuh kohro ko Yangthsaba kuh la kuthsi apüm Samaria lang zang hitsicho. Abinü nyitsarü mii rang notsicho.

²⁵Juda Yangthsaba Amazia tsü Israel Yangthsaba Jehoash tenü kang dhüre-münganü alaa licho.

²⁶Amazianü nguchicho apa lüpcho, abi Yangthsaba adikeh lanü achangchi Israel ko Juda Yangthsarüti yukheh la thrahyoh lile.

²⁷Abinü ABÜDONGBA nyüm yako tinü, Jerusalem la abi kihyochünung arah külüpcho. Achangka la abi Lakish yangdi lang dro tsicho, ta arorühnü iiwü abi kyüsehcho.

²⁸Ame tsü Jerusalem lang kuri chahnü hiwücho ko abi David yangdi la Yangthsarü kong la dhrürangcho.