Read Sangtam Naga 2 ROHTHAP 26 Bible Online

2 ROHTHAP 26 - Sangtam Naga bible

2 ROHTHAP 26

¹Amazia tsurü Uzia kang dhüre-dhüroh thsade au mülih yangthsanung Judarü atümungnü abi throchehcho.

²(Au Amazia süpü Uzzianü Elath khyücho ko yangdi tsü külüpchicho.)

³Uzia kang dhüre-dhüroh thsade Yangthsaba kangcho ko abinü Jerusalem la kang dhünyangpü anyüh yangthsathsacho. Atpa tsü Jerusalem lanü Jekolia licho.

⁴Au adüzü khyo, abinü ABÜDONGBAnü künyangnungthsa nguchicho.

⁵Abi khyang yudsi la lümlong jürü Zekaria akang lide, abinü ABÜDONGBA yuje cho dikehcho ko Tsingrangbanü abi müwajücho.

⁶Uzzianü Filistinrü nyüm rothsanung wücho. Abinü Gad, Jamnia ko Ashdod yangdi tbü mapnahjücho ko Filistia apümlang ko Ashdod shündhün yangditi lungnü tbüticho.

⁷Gurbaal ko Meunit la lirü Filistin ko Arabrü Tsingrangbanü abi khyang kohsohcho.

⁸Amonrünü Uzia khyang akhüm tüpcho ko abi dicho nengse Ijip lih chii sobhocho.

⁹Uzzianü Ajongnah Tbükhüm, Angah Tbükhüm ko tbü müshi la roshengvi külüpnü Jerusalem khümkhüm tbüticho.

¹⁰Abinü rangmü lanü roshengvi thsanü kihkong adrong Jucho, tunüo nyüzüdu lahpi azong jingdümpi ko angah la tsü abi yo misü adrong kangcho. Abinü luh thsanung müichonü müyurü te azong lih la shükusiluh ko alih su la luh thsanung thsüchicho.

¹¹Abi yo khataba rothsarü amülung amülah licho. Yangthsaba dikehrü Hananianü dhengyeh Jeiel ko Masia nyühnü abi nguchi apüm thrah yohpücho.

¹²rothsarü tsü adirü hajar anyüh thsih dhüroh nü nüchicho.

¹³Yangthsaba rorüh te khatachehnungthsa adekheng rothsarü lakh asang hajar dhünyeh thsih münga licho.

¹⁴Uzzianü rothsarüti khyang tsung, thsuh, idhse kuthri, khata fükhüm, singthsalu ko tbüdeng ko akyanung lung jücho.

¹⁵Jerusalem la akülüprünü yangdi tbükhüm jongnah ko roshengvi lanü tbüdeng kyanung ko lung tsa müthehnung kohro külüpcho. Abi nengse apümlang sobhocho ko Tsingrangba chahnü arüku ngucho khu abi dee rezeh kangcho.

¹⁶Ta khode Yangthsaba Uzia rezeh kangcho, abi müthseh kangcho ko hütsü khu abi khülusohcho. Amübükuh la müchiji trüpnung züducho khu ABÜDONGBA abi Tsingrang münyijücho.

¹⁷Bebüba Azaria yola müsi mülah rezeh bebürü qurenü Yangthsaba tsü yatinung iiwücho.

¹⁸Arühnü yocho, “Uzia! Nühnü ABÜDONGBA khyang müchiji trüpnung athsalang mah. Aron trah lanü amüsachehcho bebürü dunü hi nguchinungbae. Amüsa Müdüm hi pehjüng. Nühnü ABÜDONGBA Tsingrang wahsohko ko adelü nühnü Abi amüwa müngunung.”

¹⁹Uzia tsü amübükuh la müchiji trüpba bholu te müchiji trüpnung bipü yacho. Abinü bebürüti te longmüsahcho ko hütsü denü akikhang la mübhira chürocho.

²⁰Azaria ko bebürütinü Yangthsaba kikhang tsü drüseh dhengcho ko abi amübükuh lanü dhsüthsa tsisohcho. Abinü dhsüthsa tsicho tunüo ABÜDONGBAnü abi khingchicho.

²¹Yangthsaba Uzia tsü akang ayung abi mathsa khu ayahnü amümüsa akang kangpehcho. Amübükuh la müzüduchehpü apu kuhla licho ko abi tusü münguchipü abi tsurü Jothamnü yanglih tsü xükümcho.

²²Yangthsaba Uzzianü abi yangthsade nguchicho apüm Amoz tsurü Isaya azikehrünü thrahyoh lile.

²³Uzia sücho ko yangthsarü kongyo la dhrürangcho ta abi mathsa kehchonü yangthsarü kong la müdhrürangcho. Atsurü Jotham tsü abi mülih Yangthsaba kangcho.