Read Sangtam Naga 2 ROHTHAP 27 Bible Online

2 ROHTHAP 27 - Sangtam Naga bible

2 ROHTHAP 27

¹Jotham tsü kang mükyüpü münga thsade Yangthsaba kangcho ko abinü Jerusalem la kang dhüre-dhüroh yangthsacho. Atpa tsü Zadok tsulatpü Jerusha licho.

²Abinü au kyo ABÜDONGBAnü künyangnungthsa nguchicho; ta au kyo amübükuh la müchiji trüp amünyi müshitpahcho. Ta müyurünülü amünyi shitpahcho.

³Jothamnü Amübükuh kihku lahpi Tbükhüm tsü thsacho ko Ofil dsiba Jerusalem mükyah yangdi tbü tsü amülah külüpchicho.

⁴Juda zong la Abinü yangditi külüpcho ko rangmüla roshengvi ko mükehmükong kuh thsacho.

⁵Yangthsaba Amon ko arothsarü te khatacho ko arüh kohcho. Abinü Amonrü te kang müipi taripi süreh hajar asang thsih müyü, litoh metric ton hajar khüdu ko lüdi metric ton hajar khüdu abi khyang kang asang akhüm tüpnung khangcho.

⁶Jothamnü abi Tsingrang ABÜDONGBA te yocho nyicho ko hütsü khu abi rezeh kangcho.

⁷Jotham yangthsade tikehcho, khatacho ko abi lümchung apüm Israel ko Juda Yangthsarü Yukheh la thrahyoh lile.

⁸Jotham kang mükyüpü münga thsade Yangthsaba kangcho ko abinü Jerusalem la kang dhüre-dhüroh yangthsacho.

⁹Abi sücho ko David yangdi la dhrürangcho ko atsurü Ahaz tsü abi mülih Yangthsaba kangcho.