Read Sangtam Naga 2 ROHTHAP 3 Bible Online

2 ROHTHAP 3 - Sangtam Naga bible

2 ROHTHAP 3

¹Yangthsaba David, Solomon aunü Amübükuh kuphi tsülü rungnüm yohpüjungcho. Hütsü Jerusalem la ABÜDONGBAnü David shirüba ko Jebusrü Arauna pungkhyang-Moria khang chah licho.

²Yangthsaba Solomon-nü abi yangthsacho kang müyüu, choo anyüu la kuh thsanung dikehcho.

³Yangthsaba Solomon-nü thsaba amübükuh tsü ashenglang khehap rohre ko adilang khehap mükyü licho.

⁴Azüduba trahtri chongsah tsü amübükuh adilang khehap mükyü, ko athsenglang khehap thsipü mükyü licho. Ayonglang chongsah tsü hon amüthsi dunü khyangcho.

⁵Alonglaba chongsah tsü cedar singnü chongcho ko hon amüthsengnü münohcho ko hütsü chah tsü sedong ko ixilih kyothri tühcho.

⁶Amübükuh tsü Yangthsabanü Parvaim lih lanü shüyohcho atsah atsa thsidi lung ko hon dunü sehyahcho.

⁷Abinü züdi, dre aringu, trahtri bekhüm ko trahtri tsü hon-nü münohcho. Züdi chah tsü aqo kehba kanglungrü Cherubim thrikehcho.

⁸Amüsauba chongsah dsiba alongtüshung chongsah tsü amübükuh adilang apümshünü adilang khehap mükyü ko ashenglang khehap mükyü licho. Amüsauba chongsah züdi münohnung hon metric ton mükyü milang khyücho;

⁹imühi külüpnung hon grams 570 khyücho ko amungthriba chongsah züdisü hon-nü münohticho.

¹⁰Yangthsabanü anguchirü te aqo kehba kanglungrü cherubim anyüh idhsenü külüp-pü hon-nü münohtinung ko Amüsauba chongsah la tsü yohpünung yuzeng jücho,

¹¹ko hütsü trahtri lang pipü deta yohpücho. Anyüding tsü aqo anyüh-nyüh kehcho, aqo khüdu tsü ashenglang khehap münga, aqo anyüh tsünü chongsah longla anyüh thapütacho ko aqo anyüh tsünü khüulang züdi tsü khehap mükyü tbhachahchü chihsohcho.

¹⁴Amüsauba chongsah kitinung apulu, anyahrüm ko amoh la chongpü shü anana ko apa shüla aqo kehba kanglungrü cherubim yahthri thrikehpü yohcho.

¹⁵Yangthsabanü dongdi athsenglang khehap sangrepü münga anyüh külüpcho ko Amübükuh bete khyümcho. Dongdi bemi chah yohnung anyüding nengdang khehap münga ashenglang külüpcho.

¹⁶Dongditi michah tsü achehcho ixilih ko imüyeng Tsanümsih thsih khüdu yohrüta mükingcho.

¹⁷Dongditi tsü amübükuh trahtri te khyümcho: kihjing lahpi yaba te Jakhin ko kihku lahpi yaba te Boaz dsicho.