Read Sangtam Naga 2 ROHTHAP 31 Bible Online

2 ROHTHAP 31 - Sangtam Naga bible

2 ROHTHAP 31

¹Thsüti tsü changkapü khanglang, Israelrü atümungnü Juda la yangditi apümlang wünü lung-dongdi mapnahjücho, Ashera tsingranglatpü kyothri kengnahjücho ko müyudsirü mübüji ko bholuti thsangnyangjücho. Arühnü Juda, Benjamin, Efraim ko Manasenü hiri apüm la hütsüroh-i nguchicho; hütsüpü arüh atümung kuh lang thalicho.

²Yangthsaba Hezekianü arüh papa nguchi bebürü ko Levirü mülung nguchi tsü thali külüpchijücho. Hiri nguchi tsü trüp mübü mübünung, akehta mübü mübüba la dikehnung ko amübükuh la nengse jüba ko nengsekhi thsaba la zehnung.

³Nyangnyü romang mükhu trüp-mübüba ko Chonu Asi Thsüti, Sabath nyümong mübücho ko Yuzengnü mülacho apa thsütiti la khyünung apu yo kanglungrü abinü jücho.

⁴Hütsü chah lahkeh, Yangthsabanü Jerusalemrü te, bebürü ko Levirünü yuzengnü mülacho roh-i arühnü arüh bekhyah apüm jüchehnungthsa, arüh khyang jünung athsalang amübü tsü hirojünung yocho.

⁵Yuzeng tsü yuchiyeng Israelrünü fürü, yongkha, tuji, thsakukih ko chisilengsicho apüm lanü atsauba tsü amübüthsa ko apa lüpcho lanü dhüre nohlüm hirojücho.

⁶Juda lih la yangditi la lirü atümungnü arüh misü ko san lanü dhüre nohlüm ko arühnü amübü apa khütang hiro arüh Tsingrang ABÜDONGBA khyang müsacheh jücho.

⁷Amübü tsü choo asangu chahnü jümüsucho ko mütozah choo müyü thohbülungcho.

⁸Yangthsaba Hezekia ko abi thsazirütinü hütsütoi jücho ngude, arühnü ABÜDONGBA nengsecho ko abi müyurü Israelrü secho.

⁹Yangthsabanü hiba amübü nengdang bebürü ko Levirü te chotacho,

¹⁰ko Zadok chahnü trahchocho Amungthriba bebüba Azarianü abi te yocho, “Müyurünü Amübükuh lang arüh amübü jüchonü, tsuxahpü dunü khütang nyingre. ABÜDONGBAnü Abi müyurü müwajücho khu Ihsanü hi ngure.”

¹¹Yangthsabanü yuzeng jonü arühnü amübükuh te azahkehji kuh thsacho

¹²ko hütsüla arüh amübü ko dhüre nohlüm apüm khyübülung zahkehcho. Arühnü hütsü xükümnung Levirü khüdu anengnü Konania ko anithre Shimei abi chitungthsa yohpücho.

¹³Anyüh pohki nguchinung Levirü hiri dhüre yohpücho: Jehiel, Azazia, Nahat, Asahel, Jerimoth, Jozabad, Eliel, Ismakia, Mahath ko Benaia. Hiri apüm Yangthsaba Hezekia ko Amungthriba Bebüba Azaria nyüh tase la du nguchicho.

¹⁴Levirü khüdu Imna tsurü Kore tsü Amübükuh Nyüchürolang Tbükhüm nyahrü ayingba tsünü ABÜDONGBA khyang jücho amübü khyüchonung ko changnah jünung nguchi la abi axükümrü thsasohcho.

¹⁵Bebürü liba apa yangditi la tsü, aparü Levirü hirinü abi dee trocho: Eden, Miniamin, Jeshua, Shemaia, Amaria ko Shekania. Arühnü aparü ajünirü Levirü khyang tsuyongba tsü tsutpu aichi mahpü,

¹⁶arüh nguchi aichi phülari changnah jücho. Arühnü adhrerü kang sangre ko amilangrü Amübükuh la nyümong mükhu nguchi dikehrü atümung khyang nohlüm khüdu-khüdu jücho.

¹⁷Bebürüti tsü tsutpu aichi nguchi jücho ko Levirü kang mükyü ko amilangrü tsü arüh nguchi roh-i amülung-mülung khyang nguchi jücho.

¹⁸Arüh atümung nitpürü, tsuzarü ko kuhla lirü zeh aneng thrahyohcho, tunüo arüh Amüsa nguchi tsü masüde nguchinung rungnüm du linung nguchi thsacho.

¹⁹Aron trah khyang jücho yangditi la lirü ko hiri yangditi mükyah lirü bebürütilü, bebürü kukhiti la adhrerü apüm ko Levirü tsutpu la zehrü atümung khyang tsuyongba changta jürü kangcho.

²⁰Juda lih apüm la, Yangthsaba Hezekianü yuje ko ABÜDONGBA abi Tsingrangnü künyangnungthsa du nguchicho.

²¹Abinü akoh ngu nguchicho, tunüo Amübükuh nengdang nguchi lüpcho mahkhang yuzengnü mülacho nguchiba apüm, abinü abi Tsingrang te yochonyi ko khakhuchüjo nguchicho.