Read Sangtam Naga 2 ROHTHAP 32 Bible Online

2 ROHTHAP 32 - Sangtam Naga bible

2 ROHTHAP 32

¹Yangthsaba Hezekianü yuje cho ABÜDONGBA dikeh ya shikhe Assyria Yangthsaba Senacheribnü Juda mahcho. Abinü lungnü tbüticho yangditi beticho ko tbü tsü thsangnyang züdunung yuzeng jücho.

²Khode Senacheribnü Jerusalem mii mahnung Hezekianü dhengchehcho,

³abi ko abi pohki thsazirütinü, Assyriarü tsü Jerusalem shündhün rode ayongnung müngusohnung yangdi lanü apalang kih jüba tsü yatinung dhrongchehcho. Thsazirü nyitsarü adrong nüpü chüdu dongkhu kih pohcheh mütsisohnung kihna apüm khangticho.

⁵Yangthsabanü yangdi tsungtinung nengdang tbü külüpchicho, tbü michah roshengvi thsacho ko dongkhu tbü khüdu tbücho. Hütsü chah lahkeh, abinü Jerusalem ahiba la nyüchürolang alih sühpü liba la tbü tsü külüpchicho. Abinü adesü thsuh ko tsung adrong külüpcho.

⁶Abinü yangdi la nyitsarü apüm tsü rothsarü anüchirü khehla yohpücho ko arüh te yangdi tbükhüm la tsü shimükhongnung yocho.

⁷Abinü arüh te yocho, “Müsi mülahng ko re zehng ko Assyriarü Yangthsaba ko abi yola zehba rothsarü tsü tüdrü. Tunüo abi te liba tenü Ihsa yola zehba tsü adiuba lile.

⁸Abilü nyitsarü tase, ta Ihsalü Ihsa trorü ABÜDONGBA, Ihsa Tsingrang lile.” Arüh Yangthsaba yu hirinü arüh rezehsohcho.

⁹Azachah lipü khanglang, Senacherib ko abi rothsarüti Lakish la lide, abinü Hezekia ko abi te Jerusalem la liba Judarü yang yu hita jücho:

¹⁰“Ih, Assyria Yangthsaba Senacheribnü, Jerusalem la betipü linung nührü tunü müsi mülahsohropü tsingdhengre.

¹¹Hezekianü nührü te ABÜDONGBA nührü Tsingrangnü ihrü chahnü nührü khümchonungepü yole, ta nührü ayang axonü süsohnung abinü nührü kihyochüre.

¹²ABÜDONGBA bholu ko mübüji thsangnyangba tsü apu ko Judarü ko Jerusalemrü telü bholu khüdu chah du mübüji trüpnung yore.

¹³Ihrü jümürü ko Ihnü yucho parü te tu nguchicho nührünü mümüdheo? Yuchoti tsingrang khürü dunüsü Assyria Yangthsaba chahnü arüh khümchocho mah-o?

¹⁴Hütsüri yanglih tsingrangnü khode ihrü chahnü yanglihti khümchodhengcho? Khang khüta nührü Tsingrangnü nührü khümchonungepü lümro?

¹⁵Ade Hezekia khyang nührü tükiyohchüsoh mahkhang tünümülasoh. Abi chah tüyudsi. Tu yucho tsingrangnüsü Assyria Yangthsaba kheh lanü arüh müyurü mükhümchodheng. Hütsü kyo hiba nührü Tsingrang nüsü nührü mükhümchochehnung.”

¹⁶Assyria thsazirütinü ABÜDONGBA Tsingrang ko Abi dikehrü Hezekia nengdang dee nyüm chocho.

¹⁷Yangthsabanü thrahba vathrah tsünü ABÜDONGBA, Israel Tsingrang münyisohcho. Hita thrahcho, “Yuchoti tsingrangnü I kheh lanü arüh müyurü mükhümcho ko Hezekia Tsingrangnüsü I kheh lanü abi nyitsarü mükhümchochehnung.”

¹⁸Arühnü züdi shündhün liba Jerusalemrünü hütsü yuchipü suzah ko nehsoh yangdi tsü mülakhüti kohnung nengdang Ibri yu la hütsüta züdekehjücho.

¹⁹Arühnü yucho parü tsingrangti nyitsarü khehnü münohcho kyothri nengdang chocho roh-i tsü Jerusalem Tsingrang nengdangsü chocho.

²⁰Hütsüde Yangthsaba Hezekia ko Amoz tsurü azikehrü Isaya nyühnü Tsingrangba te arüku ching züdecho.

²¹ABÜDONGBAnü riwürü khüdu müthehcho Assyriarü rothsarü adirü ko rothsarüti kyüsehsohcho. Hütsüta Yangthsaba tsü Assyria lang ashah khyo thalicho. Nyümong khüdu abi tsingrang amübükuh la lide, atsurüti khürünü arüh nohshengnü abi kyüsehcho.

²²Hütsüta ABÜDONGBAnü Yangthsaba Hezekia ko Jerusalemrü tsü Assyria Yangthsaba Senacherib ko arüh rorüh aparüti kheh lanü khümchocho. Abinü müyurüti mükangmüshü yuchoti apüm te yangtsa la lisohcho.

²³Nyitsarü khütangnü Jerusalem lang ABÜDONGBA khyang amübü ko Hezekia khyang jiyü hirojücho, hütsütinü yucho apümnü Hezekia dhichi bichicho.

²⁴Hütsü shikhe Yangthsaba Hezekia sümüphoh thsangnangcho. Abinü dangkhidangnangcho ko abi kyangnung ABÜDONGBAnü amüdhethsa khüdu jücho.

²⁵Ta ABÜDONGBAnü abi chah tu nguchicho hütsü nengdang anengse jünung khura müthsehcho, ko hütsü ngang Juda ko Jerusalem chongchacho.

²⁶Ta achangka la, Hezekia ko Jerusalemrünü arüh jangjang longlüm kangcho, hütsünü ABÜDONGBAnü Hezekia akang lidelü müyurüti mükhingchicho.

²⁷Yangthsaba Hezekia khütang alirü kangcho ko atümungnü abi dhichi bichicho. Abi yo hon, taripi, thsidilung, axümlichi, tsung ko apa thsidi kohro yohpünung azahkeh kuh thsacho.

²⁸Hütsü chah lahkeh, abi fürü, yongkha ko tuji nengdang shih ko misü nengdang kuh ko abi santi nengdang kuh thsasohcho.

²⁹Hiri apüm chah lahkeh, Tsingrangbanü abi khyang san ko misü jücho ko apa kuthsi dira jüchonü, abinü yangditi adrong külüpcho.

³⁰Gihon yongna khangtijüpü Jerusalem tbü yonglang münyehmüla khyüjüba tsü Yangthsaba Hezekia licho.

³¹Hezekianü abi nguchicho lüpcho la akoh ngucho ko hütsüla pathsa khüdu tikehcho yangchinung Babylonrü langbürü rode mii, abi saying thsatsüsohnung Tsingrangbanü Hezekia abi thsanyücho thsasohcho.

³²Yangthsaba Hezekianü nguchicho lüpcho ko abinü ABÜDONGBA mübücho apüm Amoz tsurü azikehrü Isaya müngucheh ko Juda ko Israel yangthsarüti Yukheh la thrahyoh lile.

³³Hezekia sücho ko yangthsarü kong athahlangba la dhrürangcho. Abi süde Judarü ko Jerusalemrünü adhichi amülah jücho. Ko abi tsurü Manase tsü abi mülih Yangthsaba kangcho.