Read Sangtam Naga 2 ROHTHAP 33 Bible Online

2 ROHTHAP 33 - Sangtam Naga bible

2 ROHTHAP 33

¹Manase tsü Juda la Yangthsaba kangde abi kang dhüre-anyüh thsacho, ko abinü Jerusalem la kang dhünyangpü münga yangthsacho.

²ABÜDONGBAnü abi nyitsarü rode iipehba yucho parüti yah kyo, Manasenü ABÜDONGBA nyüm amünyi shitpahcho.

³Au Hezekianü thsangnyang pehjüba müyudsirü mübüji abinü thali thsachicho. Abinü Baal mübüsohnung bholu külüpjücho, Ashera tsingranglarü kyothri külüpjücho ko chenghiti mübücho.

⁴ABÜDONGBAnü achangka müli Abi hütsüla mübüsohnung yoba Amübükuh la tsü müyudsirü bholu külüpcho.

⁵Amübükuh chongsah anyüh la tsü, abinü chenghi mübürü nengdang bholu külüpjücho.

⁶Abinü Hinnom Ngah la trüp mübüthsa atsurüti kangmübü jücho. Abinü azi-among nguchi nguchicho ko müchehmülohrü te müchehcho. Abinü ABÜDONGBA nyüm amünyi arangcheh shitpah abi rihlong chürosohcho.

⁷Tsingrangbanü David ko atsudhre Solomon nyüh te hita yocho Amübükuh la kyothri khüdu yohpücho: “Israel yucho dhüre-anyüh lih apüm lanü Jerusalem Amübükuh hila Ih mübüsohnung Ihnü throchehcho.

⁸Ko Israelrünü amülaba apüm bichikhang, ko I dikehrü Mosa khu jüba Yuzeng tsü apüm yohpükhang, Ihnü arüh jümürü khyang jüba lih la tsünü mü-iipehsohnung.”

⁹Abi müyurü rode, ABÜDONGBAnü pehjüba yucho parü tenü alaa, Manasenü Judarü khyang amünyi adiu shitpahsohcho.

¹⁰ABÜDONGBAnü Manase ko abi nyitsarü khyang müzahsoh nye, arühnü münyicho.

¹¹Achotsü ABÜDONGBAnü Assyriarü rothsarüti khyang Juda mahsohcho. Arühnü Manase rangcho, abi chah shumütsa mükyürangjücho, ixilihnü rahcho ko Babylon lang notsicho.

¹²Abi chongcha la abinü longlüm kangcho, abi Tsingrang ABÜDONGBA yang ximülacho ko abi te kihchicho.

¹³Tsingrangbanü Manase dangkhidangnang lalingcho ko abi thali Jerusalem lang wüsoh ko anyüpiu yangthsasohcho. Hi khu Manasenü ABÜDONGBA tsü Tsingrangepü khyüchocho.

¹⁴Hütsüpü, Ngu Tbükhüm lang Gihon Yongna shündhün angah la Ofel dsiba müdüm la tsünü, Manasenü David yangdi nyüchürolang dongkhu tbü tsü thsakehcho. Abinü Juda la atbüticho yangditi müipi la tsü adirü khüdu khüdunü nüpü rothsarü yohpücho.

¹⁵Abinü Amübükuh la tsünü abinü yohpücho yangpirü tsingrang ko arüh kyothriti, ko Amübükuh yaba akhang chah ko Jerusalem la müdüm apati lanü müyudsirü bholuti pehjücho; abinü hütsüri yangdi khu hichüdu dhiyohchüpehcho.

¹⁶Abinü ABÜDONGBA mübüba la bholu tsü külüpchicho ko hütsü michah abinü akehta mübü ko nengse jüba mübü kangmübü jücho. Abinü Judarü apüm te ABÜDONGBA, Israel Tsingrang mübünung yuzeng jücho.

¹⁷Müyurütinü apa mübü müdümti la kangmübü mütozah mübü nye, arühnü hütsüri ABÜDONGBA khyang du mübücho.

¹⁸Manasenü nguchicho apa lüpcho, abinü abi Tsingrang te dangkhidangnangcho ko ABÜDONGBA, Israel Tsingrang nengla abi te chotaba azikehrü yusi, hiri apüm Israel yangthsarü Yukheh la thrahyoh lile.

¹⁹Yangthsaba dangkhidangnang ko Tsingrangba alalingba, abi lasih thsamülaba te shitpahcho münyi, nguchi amütsa, abinü külüpcho müyudsirü amübükuh ko Ashera tsingranglarü kyothri ko abinü mübücho kyothriti, hiri apüm azikehrüti Yukheh la thrah lile.

²⁰Manase sücho ko yangthsarü kong la abi dhrürangcho ko atsurü Amon tsü abi mülih Yangthsaba kangcho.

²¹Amon tsü Juda la Yangthsaba kangde abi kang mükyüpü anyüh thsacho ko abinü Jerusalem la kang anyüh yangthsacho.

²²Au Manase kyo, abinü kyothriti mübo ABÜDONGBA nyüm amünyi shitpahcho.

²³Ta au mükyopü, abinü longlüm mükangcho ko ABÜDONGBA yang müximülacho; au tenü abi deenü alaa amünyi akang licho.

²⁴Amon apu pohki thsazirütinü arah külüpcho ko Yangthsaba kuh lanü abi kyüsehcho.

²⁵Judarünü Amon süsohrüti tsü kyüsehcho ko abi tsurü Josia tsü Yangthsaba kangsohcho.