Read Sangtam Naga 2 ROHTHAP 34 Bible Online

2 ROHTHAP 34 - Sangtam Naga bible

2 ROHTHAP 34

¹Josia tsü Juda la Yangthsaba kangde abi kang keh du thsacho ko abinü Jerusalem la kang sangrepü khüdu yangthsacho.

²Abinü ABÜDONGBAnü künyangnungthsa nguchicho; abinü abi jümürü Yangthsaba David kyo, Tsingrangba Yuzengti dee khükhah bichicho.

³Josia Yangthsaba kangcho kang akeh-u la, abi adesü azarü du thsade, abinü amü Yangthsaba David Tsingrang mübünung dikehcho. Kang müyü thsapü, abinü müyurü mübüji, tsingranglarü Ashera kyothri ko apa kyothriti apüm thsangnyangjünung dikehcho.

⁴Abinü yuzeng jo, abi nyitsarütinü Baal mübüba bholu ko müchiji trüpba bholuti mapnahjücho. Arühnü Ashera tsingranglarü kyothri ko apa kyothri apüm lihwü kangsohcho ko hütsüri khyang kangmübü jürüti kong chah lihwü tsü sohkehjücho.

⁵Abinü müyudsirü bebürüti rüh tsü arühnü mübüba bholu chah tsü trüpcho. Hütsüta nguchi, abinü Juda ko Jerusalem thali ayah müsa müsachehcho.

⁶Abinü yangditi ko Manase, Efraim ko Simeon achangjücho mükyah la ko kihku lahpi Naftali chii hütsüroh-i tsü nguchicho.

⁷Kihku lahpi yanglihti apüm la, abinü bholuti ko Ashera kyothri mapnah pehjücho, kyothriti tsü lihwü kangsohcho ko müchiji trüpji bholuti tsü mapzangzang pehjücho. Hütsüpü abinü Jerusalem lang thalicho.

⁸Abi yangthsathsacho kang dhüre-keh-u la, abinü müyudsirü mübü changkajo alih ko Amübükuh müsachehpü khanglang, Yangthsaba Josianü ABÜDONGBA Tsingrang Amübükuh thsachinung nyüh asang müthehcho: Azalia tsurü Shafan, Jerusalem governor Maseia ko amungthriba adirü khüdu Joahaz tsurü Joa müthehcho.

⁹Amübükuh la Levirü anyahrünü khyübülungcho thsi tsü Amungthriba Bebüba Hilkia khyang jücho. (Hütsü Efraimrü, Manaserü ko kihku lahpi yanglihti ko Judarü, Benjaminrü ko Jerusalemrü chahnü dhrichehcho.)

¹⁰Hütsüpü hiba thsi tsü amübükuh thsachirü arüh asang khyang jücho,

¹¹ko arühnü hütsü Judarü yangthsarütinü sütpahpehsohba kuh külüpchinung nengdang kuthsarü ko sing mistri yang lung ko singtpahti lihnung jücho.

¹²Anguchirüti tsü khütang yuje chorü thsacho. Arüh tsü Levirü nyüh müyünü dhengyehcho: Merari tsutpu lanü Jahat ko Obadia ko Kohat tsutpu lanü Zekaria ko Meshulam. (Levirü atümung khi thsanung la axangcheh licho.)

¹³Levirü aparü tsü kohro himüchita ko nguchi papa nguchirüti dhengyehcho, aparü tsü athrahrü ko khürü anyahrü licho.

¹⁴Khode thsi tsü azahkehji lanü khyüchehcho, Hilkianü ABÜDONGBA Yuzeng, Mosa khyang Tsingrangbanü jüba Yuzeng tsü ngucho.

¹⁵Abinü Shafan te yocho, “Ihnü hiba Amübükuh lanü Yuzeng vakha tsü nguko.”

¹⁶Abinü Shafan khyang vakha tsü jücho ko hütsü Shafan-nü Yangthsaba yanglang hiwücho. Abinü abi te yocho, “Ihrünü nühnü yocho lüpcho nguchiko.

¹⁷Ihrünü Amübükuh lanü thsi tsü khyo hiwü anguchirü ko adhengyehrü khyang jüko,”

¹⁸Hütsüpü abinü yocho, “Hilkianü jücho hila vakha khüdu lile.” Ko abinü hütsü Yangthsaba te yuva chüro khi yocho.

¹⁹Yangthsabanü vakha tsü khicho yuchide,

²⁰abinü amüsi mükyangnü ajengki rehnahcho ko Hilkia, Shafan tsurü Ahikam, Mikaia tsurü Abdon, athrahrü Shafan ko Yangthsaba dikehrü Asaia hiri khyang yuzeng hita jücho:

²¹“Wüng ko Ih ko müyurü ade Israel ko Juda la liyarü nengdang ABÜDONGBA te kihtaang. Hiba vakha la adoba nengdang yangching. Ihsa jümürünü ABÜDONGBA yu münyi ko hiba vakhanü mülacho münguchichonü, Ihsa te ABÜDONGBA rihlong chürole.”

²²Yangthsabanü yuzeng jo, Hilkia ko aparü tsünü Jerusalem asi thrikeh tsiba la liba azikehlarü khüdu Hulda yanglang wücho. (Anii Harhas shümtsurü, Tikva tsurü Shalum tsü amübükuh la jengki müshorü licho.)

²³Arühnü abükyü te atikehcho tsü changnah yocho ko abükyünü arüh te thali wü

²⁴Yangthsaba te ABÜDONGBA chahnü yusi hita yonung arüh te yocho: “Yangthsaba te khi yoba vakha la thrah licho chokehchola tsü Jerusalem ko hütsüla lirü apüm khingchinung.

²⁵Arühnü apa tsingrangti khyang kangmübü jücho khu I rihlong chürosohko. Jerusalem nyüm I rihlong chüroko ko hütsü münyehlinung.

²⁶Yangthsaba apu nengdang, Ih, ABÜDONGBA, Israel Tsingrangnü hita yore:

²⁷Vakha la tu thrah zehcho nühnü yuchiko ko nühnü nüpu jangjang longlüm kang, Ihnü Jerusalem ko hütsüla lirü khingchinung thrah licho yuchinü jengki rehnah tranü lasih thsamülako.

²⁸Ihnü nü kihchicho yuchiko ko Ihnü jünung liba akhingchi tsü nüh müsüde müjünung. Ihnü nüh tbachi süsohnung.” Ko arühnü yusi hi hipü Yangthsaba Josia yanglang thalicho.

²⁹Yangthsaba Josianü Juda ko Jerusalem la langnürüti apüm dsibülungcho,

³⁰ko arüh yola bebürü ko Levirünü müyangpü alirü ko ailümrü müyurü apüm Amübükuh lang wücho. Arüh apüm bete, Amübükuh lanü nguba vakha tsü Yangthsabanü yuva chüro khicho.

³¹Abinü Yangthsaba dongdi te yapü Abi yocho nyinung, alasih ko anbü apümnü Abi yuzeng ko amülaba bichinung ko vakha la zehcho kyo lüpcho nguchinung ABÜDONGBA te azengchotaba khüdu külüpcho.

³²Abinü Benjaminrü ko Jerusalem la lirü apüm khyang azengchotaba tsü bichinung nyengchosohcho. Hütsüta Jerusalemrü atümungnü arüh jümürü Tsingrang te azengchotabanü mülacho apüm bichicho.

³³Yangthsaba Josianü Israel lih la athrünyinung kyothri apüm thsangnyang pehjücho ko abi akang li ayung, müyurü khyang ABÜDONGBA, arüh jümürü Tsingrang dikehsohcho.