Read Sangtam Naga 2 ROHTHAP 35 Bible Online

2 ROHTHAP 35 - Sangtam Naga bible

2 ROHTHAP 35

¹Yangthsaba Josianü ABÜDONGBA nengla Jerusalem la Phungkhu Thsüti mungcho; akhudiba choo dhüre-müyüu nyümong arühnü thsüti nengdang kanglungrü tsü mapsehcho.

²Abinü bebürüti khyang amübükuh la arüh nguchi changta jücho ko arüh te tsa nguchinung nyümchi yocho.

³Abinü ABÜDONGBA khyang müsacheh jürü Levirü ko Israel adorüti tesü athülaba hiroh-i jücho: “David tsurü Yangthsaba Solomon-nü thsaba Amübükuh la tsü Amüsa Yuzeng Singdi tsü yohpüng. Adelü nührünü dhimüchi hichi mürachinung, ta nührünü ABÜDONGBA nührü Tsingrang ko Israelrü dikehnung.

⁴Yangthsaba David ko atsurü Solomon nyühnü changnah jücho kyo, amübükuh la tsü atsutpu tsutpunü püm,

⁵ko Israelrü nührü khürünülü kukhi müipi rükuchehnungthsa nührü jangjang müshoung.

⁶Phungkhu Thsüti nengdang nührünü sanza ko miza mapsehnung. Hütsüeko ABÜDONGBAnü Mosa khu jüba athülaba tsü ajünirü Israelrünü iithsachehnungthsa, nührü jangjang ayah müsa müsachehng.”

⁷Phungkhu Thsüti la bichinung nengdang, Yangthsaba Josianü apu yo lanü kanglungrü san, sanza, mizaza hajar sangre ko misüpung hajar asang jücho.

⁸Müyurü, bebürü ko Levirü thsütah la bichinung abi pohki thsazirüti nüsü amübü jücho. Ko Amübükuh xükümba adiuba, Hilkia, Amungthriba bebürü Zekaria ko Jehielrü nüsü bebürüti khyang sanza ko mizaza hajar anyüpü thsih dhüroh, ko thsüti shikhe kangmübü nengdang misüpung thsih asang jücho.

⁹Levirü langnürü, Konania, Shemaia ko abi ani Nethanel, Hashabia, Jeiel ko Jozabadrünü kangmübü jüsohnung Levirü khyang sanza ko mizaza hajar münga, ko misüpung thsih münga jücho.

¹⁰Khode Phungkhu Thsüti nengdang lüpcho küdangcho, Yangthsabanü yuzeng jücho kyo, bebürü ko Levirünü arüh palu nguchi la yacho.

¹¹San ko miza tsü mapsehpü khanglang, Levirünü aküp khohcho ko bebürünü bholu chah ashüh tsü xahkehcho.

¹²Hütsüpü arühnü Mosa yuzeng la yocho roh-i mübüchehnungthsa, trüp mübü nengdang kanglungrü tsü kukhi mülung aichi changtacho.

¹³Yuzeng roh-i tsü Phungkhu Thsüti kangmübü tsü Levirünü michang la mürecho ko Amüsa mübü füh, kürafüh ko aruhfüh lanü chongnung ko müyurü khyang shuh tsü zahzah chahla jünung.

¹⁴Hütsüta nguchipü khanglang, Levirünü arühbürü ko Aron trah bebürü nengdang shuh khyücheh yohpünung, tunüo bebürü tsü üpümshünü ko asu kangmübü jücho kanglungrü tsü trüpnü ama yingcheh müdeng licho.

¹⁵Asaf tsü khithsarü Levirü hiri tsü yangthsaba Davidnü thülacho arüh palu müdüm la licho: Asaf, Heman ko Yangthsaba azikehrü Jeduthun. Amübükuh la anyahrütilü arüh nguchi pehjünung müdhsütahcho, tunüo arüh nengdang aparü Levirünü thsüti tsü rungnümjücho.

¹⁶Hütsüta, Yangthsaba Josianü mülacho kyo, ABÜDONGBA mübünung, Phungkhu Thsüti mungnung ko bholu chah trüp mübü mübünung, hütsü nyümong lüpcho küdangcho.

¹⁷Hütsüla roba Israelrü apümnü nyümong dhünyeh Phungkhu Thsüti ko bhüpza müyohba hüm thsüti tsu mungcho.

¹⁸Azikehrü Samuel nyümong lanü, hi kyo Phungkhu Thsüti khodesü mümungdheng. Akhulang yangthsarü sünüsü Yangthsaba Josia, bebürü, Levirü ko Judarü, Israelrü ko Jerusalemrünü

¹⁹Josia Yangthsa thsacho kang dhürekeh-u la Phungkhu Thsüti mungcho hi kyo mümungdheng.

²⁰Yangthsaba Josianü Amübükuh nengdang hiri apüm nguchipü khanglang, Ijip Yangthsaba Nekonü rothsarü nüpü Eufrates Yongkhi te Karkemish la khatanung rocho.

²¹Josianü abi yatinung müküpcho, ta Josia yang Nekonü yusi hita müthehcho: “Juda Yangthsaba, Ihnü hi nü te khatarü mah. Ih nü te khatanung müro, ta I rorüh te khatanung rocho ko Tsingrangbanü I te dhsüthsanung yoko. Tsingrangba I lahpi lile, hütsüeko Ih tüyati, mahkhang abinü nüh changjünung.”

²²Ta Josianü khatanung dhrongchehcho. Yangthsaba Neko khu Tsingrangbanü yocho abinü münyicho ko abinü tsah thrimülapü Megido Ngah la chitanung wücho.

²³Chita la tsü Ijiprü tbüdengnü Yangthsaba Josia chah kyacho. Abinü abi kuliba te yocho, “Ih notsieng; Ih dee khee thsakehko.”

²⁴Arühnü abi kuri kari lanü dhikeh hiwü anyüuba kuri kari la dhikehcho ko Jerusalem lang hiwücho. Hütsüla abi sücho ko yangthsarü kong la abi dhrürangcho. Judarü ko Jerusalemrü apümnü abi meshücho.

²⁵Azikehrü Jeremianü Yangthsaba Josia meshü khi khüdu tangcho. Hütsü Israel la khithsarü khingkurü adhrerü apüm nengdang meshüde thsaji khi kangcho. Hiba khi tsü meshü khi vakha la ngunung.

²⁶Josianü nguchicho apüm abinü ABÜDONGBA mübücho, Yuzeng te yocho nyicho,

²⁷ko abi Yukheh adikeh lanü achangka chii, Israel ko Juda yangthsarüti yukheh la thrahyoh lile.