Read Sangtam Naga 2 ROHTHAP 36 Bible Online

2 ROHTHAP 36 - Sangtam Naga bible

2 ROHTHAP 36

¹Judarünü Josia tsurü Joahaz tsü throcheh, müyühjo Jerusalem la Yangthsaba kangsohcho.

²Joahaz tsü Juda la Yangthsaba kangde kang mükyüpü asang licho, ko abinü Jerusalem la choo asang yangthsacho.

³Ijip Yangthsaba Nekonü abi rang tsicho ko abi khyang Judarünü akhüm taripi süreh, hajar asang thsih müyü, ko hon süreh sangrepü müyü jüsohcho.

⁴Nekonü Joahaz ani Eliakim tsü Juda la Yangthsaba kangsohcho ko aneng Jehoiakim mülijücho. Joahaz tsü Nekonü Ijip lang notsicho.

⁵Jehoiakim tsü Juda la Yangthsaba kangde kang mükyüpü münga licho ko abinü Jerusalem la kang dhüre-kheh yangthsacho. Abinü ABÜDONGBA abi Tsingrang nyüm amünyi shitpahcho.

⁶Babylon Yangthsaba Nebukadnezarnü Juda mahcho, Jehiakim rangcho ko Babylon lang ixilihnü rahpü notsicho.

⁷Nebukadnezarnü Amübükuh lanü kuthsi khürü zang hiwü Babylon la abi kuhla yohpücho.

⁸Jehoiakimnü athrünyinungkeh nguchicho ko amünyi shitpahcho tsü Israel ko Juda yangthsarüti yukheh la thrahyoh lile. Atsurü Jehoiakhin tsü abi mülih Yangthsaba kangcho.

⁹Jehoiakhin tsü Juda la Yangthsaba kangde abi kang dhüre-keh licho ko abinü Jerusalem la choo asangpü nyümong dhüre yangthsacho. Abinüsü ABÜDONGBA nyüm amünyi shitpahcho.

¹⁰Khode chisi kyang chihcho, Yangthsaba Nebukadnezarnü Babylon lang Jehoiakhin tsü rang notsicho ko Amübükuh la kuthsi zang hitsicho. Hütsüpü Nebukadnezarnü Jehoiakhin au azaba Jerusalem la Yangthsaba kangsohcho.

¹¹Zedekia tsü Juda la Yangthsaba kangde abi kang mükyüpü kheh licho ko abinü Jerusalem la kang dhüre-kheh yangthsacho.

¹²Abinü ABÜDONGBA nyüm amünyi shitpahcho ko abi te ABÜDONGBA yu choba azikehrü Jeremia yu münyicho.

¹³Zedekianü Yangthsaba Nebukadnezar nyüm yacho, sünü abi pohki lisohnung khing Tsingrangba nengla nyengchosohcho. Abinü lasih thsamüla ABÜDONGBA, Israel Tsingrang yang ronung hongzicho.

¹⁴Hütsü chah lahkeh, Juda langnürüti, bebürü ko müyurünü arüh mükangmüshü liba yuchoti iithsa kyothri mübo, ABÜDONGBA apunü Amüsa kangsohba Amübükuh münyisohcho.

¹⁵ABÜDONGBA, arüh jümürü Tsingrangnü mütozah apu müyurü müzahsohnung azikehrüti müthehcho, tunüo Abinü arüh ko Amübükuh rikinyücho.

¹⁶Ta arühnü Tsingrangba yusi hirü mükhimüngucho ko Abi yu layü pehjo ko Abi azikehrü müthsanyüjücho khu, achangkathsa arüh chah Tsingrangba rihlong chüroba lanü arüh süsü mütsichehcho.

¹⁷Achotsü ABÜDONGBAnü arüh mahnung Babylon Yangthsaba norocho. Yangthsabanü Judarü dhrezarü Amübükuh lanü mii kyüsehcho. Abinü azarü azirü, khingkurü adhrerü, ko thsangnangrü ko tsayengrü sü chahsü yanglilüm müngucho, Tsingrangbanü arüh apüm abi khehla jücho.

¹⁸Babylon Yangthsabanü Amübükuh lanü kuthsi, Yangthsaba ko abi pohki thsazirüti kuthsi lüpcho zang Babylon lang hitsicho.

¹⁹Abinü yangdi, Amübükuh ko Yangthsaba kuh ko kuthsi apüm trüp-pehjücho ko yangdi tbü thsangnyangjücho.

²⁰Abinü anyingcho apüm Babylon lang notsicho, hütsüla Persia yanglih müchürode arühnü abi ko abi shümtsurü ayurü kang dikehcho.

²¹Hütsüta azikehrü Jeremia khu ABÜDONGBAnü choyohcho tikehcho: “Sabath nyümong mümung rocho pisasohnung alih tsü kang nyühre pehjo jonung.”

²²Persia Yangthsaba Cyrus akhudiba kang, ABÜDONGBAnü azikehrü Jeremia khu yocho tikehsohcho. Yuzeng khüdu abi yanglih apümlang thrahpü jünung ko yuva chüro khisohnung yuzeng Cyrus khyang jüsohnung ABÜDONGBAnü abi thsüchicho:

²³“Persia Yangthsaba Cyrus yuzeng tsü hi: ABÜDONGBA, Ning Tsingrangnü Ih limih apüm Yangthsaba kangsohko ko abi khyang Juda lih Jerusalem la Amübükuh khüdu thsajünung bhamüling nyümkehjüko. Ade, nührü Tsingrangba müyurü apüm, hütsü lang püte ko ABÜDONGBA nührü Tsingrang nührü te lieng.”