Read Sangtam Naga EZRA 1 Bible Online

EZRA 1 - Sangtam Naga bible

EZRA 1

¹Persia la Yangthsaba Cyrus akhudiba kang, ABÜDONGBAnü azikehrü Jeremia khu choyohcho tikehsohcho. ABÜDONGBAnü Cyrus khyang abi yanglih apümlang yuzeng hiri thrahpü züde khisohnung yuzeng jücho:

²“Persia yangthsaba Cyrus yuzeng tsü hi. ABÜDONGBA, ninglang liba Tsingrangnü limih apüm michah Ih yangthsarü kangsohko ko Juda lih la Jerusalem la Abi khyang Amübükuh thsajünung I chah nyümkehjüko.

³Nührü Abi müyurü atümung te Tsingrangba zehng. Nührü Jerusalem lang wübae ko Israel la mübüba Tsingrang, Israel Tsingrang, ABÜDONGBA Amübükuh thsaching.

⁴Yangtsi la Abi müyurü khürü thalinung arüku thsütahkhang, arüh kurümrünü hiba thsütah tsü troung. Jerusalem la Tsingrangba Amübükuh la mübünung jüchochah, arühnü arüh khyang hon ko taripi ko kanglungrü jünung.”

⁵Hütsüde, Juda ko Benjamin hung la tsutpu athahti, bebürü ko Levirüti ko Tsingrangbanü thsüchirü atümungnü wünü Jerusalem la ABÜDONGBA Amübükuh thsachinung rungnümcho.

⁶Arüh kurümrü atümungnü arüh khyang taripi tsangfü-hifü, hon kohro, kanglungrü, thsidi kohroti ko Amübükuh shulüm amübü, hütsüta kohro khütang jonü trocho.

⁷Yangthsaba Nebukadnezarnü Jerusalem Amübükuh lanü khyo abi tsingrang amübükuh la yohpüba shingtbhürü Cyrusnü arüh khyang thali jücho.

⁸Abinü hütsüri thsi zahkehba Mithredat khyang jücho ko abinü hütsüri Juda Governor Sheshbazar khyang khi yohjücho.

⁹Kohro tsü hiri: Amübü nengdang hon tbhü — 30 Amübü nengdang taripi tbhü — 1,000 Tbhü apa — 29 Hon tbhü nümnüm — 30 Taripi tbhü nümnüm — 410 Apa shingtbhürü — 1,000

¹¹Hon ko taripi tbhü ko apa kohro apümnü 5,400 thsacho, ko hütsüri tsü Sheshbazarnü abi ko aparü yangtsirü Babylon lanü Jerusalem lang thalide hiwücho.