Read Sangtam Naga EZRA 10 Bible Online

EZRA 10 - Sangtam Naga bible

EZRA 10

¹Amübükuh bete Ezra hütsüta tranü münyi hiri nyengcho dangkhidangnang yade, Israelrü khingkurü, adhrerü ko azarü mülung amülah abi mükang shibülung khütang tracho.

²Hütsüde Elam tsutpu lanü Jehiel tsurü Shekanianü Ezra te yocho, “Ihsanü yangpilarü khyücho khu Tsingrangba te Ihsa yudsi thsangnyangko, ta adesü Israelrü nengdang alongdi lile.

³Ade Ihsanü khingkurü hiri ko arüh tsurüti tsipehsohnung Ihsa Tsingrang te anyengchoba khüdu külüpnung. Nüh ko Tsingrangba yuzeng bichirünü tu yonang ihrünü nguchinung. Tsingrangba Yuzengnü tu yonang ihrünü hütsü nguchinung.

⁴Hütsü nguchinung tsü nü bhamüling. Ihrü nü te zehle, wüng ko hütsüta nguching.”

⁵Achotsü Ezra te Shekanianü tu yodhengcho hütsüta nguchinung pü bebürü, Levirü ko Israel langnürüti khyang yuchümsoh dikehcho.

⁶Hütsüpü abinü Amübükuh betenü Eliashib tsurü Jehohanan lichah wücho ko hütsü romang hütsüla yangtsirünü yuje müchocho shulüm longri yüpcho. Abinü tusü mütsumüyongcho.

⁷Yangtsi langnü rorüh atümung yuzengnü Jerusalem la shibülungnung Jerusalem ko Juda apümlang sobhocho.

⁸Sü nyümong asang la ro müchihnang, abi kuthsi apüm zang khyüjünung ko abi yucho la khiyoh mülinung.

⁹Nyümong asang kahla, choo düku nyümong mükyüu la, Juda ko Benjamin lih la lirü adhrerü atümung Jerusalem lang ro Amübükuh bete shimükhongcho. Tsing khütang rocho ko tsingnyü ko ashimükhong nahdhengkeh tsünü arüh atümung dhridhricho.

¹⁰Ezra bebübanü shemüsu arüh te yocho, “Nührü yudsi mülipü yangpilarü khyücho khu Israel michah amünyi hirojüko.

¹¹Hütsüeko ade, ABÜDONGBA nührü jümürü Tsingrang te münyi nyengchoung ko Abi künyangnungthsa nguching. Ihsa lih la liba shuparü tenü za-ang ko shupalarü nührü nitpürüti tsisohng.”

¹²Müyurütinü züde lalingcho, “Nühnü tu yonang ihrünü nguchinung.”

¹³Ta arühnü yocho, “Amülung tsü sühdirale ko tsing dira role. Ihrünü jungchah hita müyacheh. Hi nyümong khüdu anyüh la nguchichehba mah, tunüo hiba münyi la ihrü adrong zehle.

¹⁴Ihrü ayingthsarüti Jerusalem la nyehlipü hi nguchisohng. Hütsüpü sürü shupalarü nitpürü liro arüh tsü bekhyah throcheh langnürü ko yangdi yukharüti yola rosohng. Hita nguchi Tsingrangba rihlong chüroba tsü ximülanung.”

¹⁵Hiba lümchung tsü Levirü Meshulam ko Shabethai nyüh chah dümpipü Asahel tsurü Jonathan ko Tikva tsurü Jazaeia chah khu sünüsü müritacho.

¹⁶Yangtsi langnü rorütinü hütsüba lümchung tsü khyüchocho, hütsünü Ezra bebübanü tsutputi lanü athahti throcheh arüh neng thrahyohcho. Choo dhüreuba akhudiba nyümong arühnü bhunung dikehcho,

¹⁷ko choo asang kahla shupalarü khyürüti atümung bhuchehcho.

¹⁸Shupalarü nitpürü khyürüti tsü hiri: Joshua ko anirüti tsutpu, Jehozadak tsuzarüti: Masia, Eliezer, Jarib ko Gedalia.

¹⁹Arühnü arüh nitpürü tsisohnung nyengchocho ko arühnü arüh münyi nengdang kangmübü jünung sanpung khüdu mübücho.

²⁰Imer tsutpu: Hanani ko Zebadia

²¹Harim tsutpu: Masia, Elija Shemaia Jehiel, ko Uzia.

²²Pashur tsutpu: Elioenai, Maseia, Ishmael, Nethanel, Jozabad ko Elasa.

²³Jozabad, Shemei, Kelaia (Kelitasü dsicho) Petahia Juda ko Eliezer.

²⁴Eliashib. Shalum, Telem ko Uri

²⁵Parosh tsutpu: Ramia, Izzia, Malkija, Mijamin, Eleazar, Malkija ko Benaia.

²⁶Elam tsutpu: Matania, Zekaria, Jehiel, Abdi, Jeremot ko Elija.

²⁷Zatu tsutpu: Elioenai, Eliashib, Mathania, Jeremot, Zabad ko Aziza.

²⁸Bebai tsutpu: Jehohanan, Hanania, Zabai ko Athlai.

²⁹Bani tsutpu: Meshulam, Maluk, Adaia, Jashub, Sheal ko Jeremot.

³⁰Pathat Moab tsutpu: Adna, Chelal, Benaia, Maseia, Mathania, Bezalel, Binnui ko Manase.

³¹Harim tsutpu: Eliezer, Ishija, Malkija, Shemaia, Shimeon, Benjamin Maluk ko Shemaria.

³³Hashum tsutpu: Matenai, Matata, Zabad, Elifelet, Jeremai, Manase ko Shimei.

³⁴Bani tsutpu: Madai, Amram, Uel, Benaia, Bedeia, Cheluhi, Vania, Meremot, Eliashib, Matania, Matenai ko Jasu.

³⁸Binnui tsutpu: Shimei, Shelemia, Nathan, Adaia, Maknadebai, Shahsai, Sharai, Azarel, Shelemia, Shemaria, Shalum, Amaria ko Josef.

⁴³Nebo tsutpu: Jeiel, Matithia, Zabad, Zebina, Jadai, Joel ko Benaia.

⁴⁴Hiri atümung shupalarü niirü thsacho. Arühnü arüh nitpürü za arüh tsuzarü zeh tsisohcho.