Read Sangtam Naga EZRA 3 Bible Online

EZRA 3 - Sangtam Naga bible

EZRA 3

¹Choo dhünyeh-u lalü Israelrü atümung arüh yangditi la lipehcho. Hütsüpü arüh atümung Jerusalem la shibülungcho

²ko Tsingrangba nyitsarü Mosa yuzeng la thrah licho athülaba roh-i tsü arühnü hütsü chah kangmübü trüpnung nengdang Jehozadak tsurü Joshua ko abi te bebürüti, Shealtil tsurü Zerubabel ko arüh tsutpurü zeh Israel Tsingrang Bholu külüpchicho.

³Yangtsi langnü rorütinü hütsüla li yarüti tsü drünye, papade yaba müdüm la tsü arühnü bholu tsü külüpchicho. Hütsüpü arühnü thali hütsü chah anyangnyü ko anyüzehlang kangmübü mübünung dikehcho.

⁴Yuzengnü mülacho roh-i arühnü Mütpahvi Thsüti müzehcho; nyümong müthe arühnü hütsü nyümong thsütah kangmübü mübücho;

⁵ko hütsü chah lahkeh üpümshünü trüpba kangmübü, Chonu Asi Thsüti la mübüba ko ABÜDONGBA mübüba adhangpi zeh ko ABÜDONGBA khyang amükangnü mübüba lüpcho zeh mübücho.

⁶Nyitsarünü Amübükuh thsachinung müdikeh-e nye, arühnü choo dhünyeh adikeh nyümong tsü ABÜDONGBA khyang kangmübü jünung dikehcho.

⁷Nyitsarütinü lung mistri ko sing mistri khyang jünung thsi jücho ko Tyre ko Sidonrü te Cedar singnü mülita Lebanon lanü Joppa lang kihdi khu hironung shulüm arühnü atsuba, ayongba ko olive tuji jücho. Hiri apüm Persia yangthsaba, Cyrus te tsingdhengpü nguchicho.

⁸Amübükuh liba Jerusalem la ropü hütsüba kang choo anyüu la, arühnü nguchi dikehcho. Zerubabel, Joshua ko arüh nyitsarüti, bebürüti ko Levirüti, ko yangtsi langnü Jerusalem lang thalirü atümung nguchi la tsü zehcho. Levirü kang mükyü ko amilang atümung Amübükuh thsachinung nguchi nyümkehjücho.

⁹Levirü Jeshua, atsurüti ko tsutpurüti, ko Kadmiel ko atsurütisü (Hodavia tsutpu) Amübükuh thsachiba la zeh nohlüm khyücho. (Henadad tsutpu Levirüti nüsü arüh trocho.)

¹⁰Müyurütinü Amübükuh müsude, bebürünü arüh jengki khyüpü arüh khehla rühti bipü yacho ko Asaf tsutpu Levirütinü hütsüla dhengza bipü yacho. Yangthsaba David chichahnü bichi rocho athülaba kyo, arühnü ABÜDONGBA secho.

¹¹Arühnü ABÜDONGBA nengse hi lolinü thsacho: “ABÜDONGBA tsü atsa, ko Israel nengdang Abi amüi achangka müle”. Atümungnü palu kohchonü ABÜDONGBA nengse züdecho, tunüo amübükuh tsü müsucho.

¹²Bebürü ashirüti, Levirüti ko tsutpu la athahtinü akhudiba amübükuh tsü ngupü licho ko hiba Amübükuh müsucho ngude, arühnü longri tracho. Ta hütsüla yarü aparütilü akünyangchonü züdecho.

¹³Akünyangchonü khongcho ko tracho tsü sünüsü müchangchehcho, tunüo arühnü khongcho yuva tsü dirachonü ashu lanüsü hütsü yuchicho.