Read Sangtam Naga EZRA 4 Bible Online

EZRA 4 - Sangtam Naga bible

EZRA 4

¹Juda ko Benjamin rorütinü yangtsi langnü rorünü Israel Tsingrang, ABÜDONGBA Amübükuh thsachilepü yuchicho.

²Achotsü arühnü Zerubabel ko tsutpu la athahti shironü yocho. “Amübükuh thsala tsü ihrüsü zehsohng. Nührünü mübüba Tsingrang hütsü du ihrünüsü mübüre ko Assyria Yangthsaba Esaraddon-nü ihrü hila müthehba shikhe lanü ihrünü Abi khyang du kangmübü jo rore.”

³Zerubabel, Joshua ko tsutpu la athahtinü arüh te yocho, “Ihrü Tsingrang ABÜDONGBA khyang Amübükuh thsajünung la nührü arüku müdhsütah. Persia Yangthsaba Cyrusnü yuzeng jücho roh-i ihrü jangjang thsanung.”

⁴Hütsükolü hütsü lih la lirütinü Jihudarü tsü suhzahsoh ko drüsoh kuh tsü müthsasohnung müküpcho.

⁵Persia adirütinü arüh nyümsohnung arühnü pohsa jücho. Arühnü Cyrus yangthsathsa ayung ko Darius yangthsathsa chii hütsüla mütozah nguchicho.

⁶Yangthsaba Ahaserus yangthsanung adikeh la, Juda ko Jerusalem la lirü arüh rorütinü arüh nyüm thrah hirocho.

⁷Anyüpiusü, Persia la Artaxerxes Yangthsaba shikhe la, Bishlam Mithredat, Tabel ko arüh shangrütinü Yangthsaba yang vathrah khüdu thrahcho. Vathrah tsü Aramaik la thrahcho ko akhide thsamüla khicho.

⁸Governor Rehum ko yanglih la athrahba Shimshai nyüh nüsü Jerusalem nengdang Artaxerxes yang hita thrahcho:

⁹“Governor Rehum, yanglih la athrahba Shimshai, arüh shangrüti, yukharüti, ko Elam lih la Erek, Babylon ko Susa tsatsa lanü ko aparü thsazirüti chahnü,

¹⁰ko anengkhong Ashurbanipalnü arüh kuh lanü iipehcho Samaria ko Eufrates nyüzüdu lahpi liba aparü nyitsarüti chahnü.”

¹¹Vathrah la zehba tsü hi: “Yangthsaba Artaxerxes yang, abi dikehrüti nyüzüdu lahpi liba Eufrates chahnü.

¹²“Jihudarü sürü apalangnü ro Jerusalem la lipehcho ko arühnü amükhyu ko anyümba yangdi tsü külüpchicho ihrünü nüh adibong khyang müdhesohnyüre. Arühnü tbü tsü külüpchinung dikehko ko thümnung thsale.

¹³Adibong, hiba yangdi tsü thsachehkhang ko tbü tsü thümkhang, arühnü alihmüthsü müjünung ko nü thsi rolang kyüchopehnung.

¹⁴Ade, ihrü nüh adibong müyurü thsachonü hütsüta mütikehsohnyüre.

¹⁵Hütsüeko nü jümürünü zahkehpücho yukheh yangchisohnyüre. Hütsü ngukhang, hiba yangdi khüta anyümrü thsacho ko papadenü hütsüla yangthsarütinü khüta alongmüzi jo rocho hütsü nühnü müdhenung. Arüh michah yangthsanung khütang thsahcho. Hütsü khu hiba yangti tsü thsangnyangjücho.

¹⁶Hütsünü, hiba yangdi hi külüpchi ko tbü tsü rungnümchehkhang, nüh adibongnü nyüzüdulang liba Eufrates limih tsü mükoh rahsehnungepü ihrünü lümre.”

¹⁷Yangthsabanü alalingba hi müthehcho: “Governor Rehum, yanglih la athrahba Shamshai ko Samaria ko Eufrates nyüzüdulang lirü arüh shangrüti yanglang salüm.

¹⁸“Nührünü mühehba vathrah tsü thsamüla I te khi yoko.

¹⁹Ihnü bhusohnung yuzeng jüko ko papadenü Jerusalem tsü yangthsaba nyümrü ko arüh tsü athsangthsi chürosohrüepü rangchehko.

²⁰Hütsüla adangchi yangthsarünü Eufrates nyüzüdulang tsü alihmüthsü khyonü thsa roko.

²¹Hütsüpü Ihnü thali yuzeng müjüde, yangdi thsachiba tsü zahnung nührünü yuzeng jüng.

²²I lümcho lahsah tu münguchinungthsa hi zah nguching.”

²³Artaxerxes chahnü vathrah hi Rehum, Shimshai ko arüh shangrüti te khiyeng, arühnü Jerusalem lang dhsüthsa wünü yangdi thsachiba tsü zahnung Jihudarü te müdhesohcho.

²⁴Persia la Yangthsaba, Darius yangthsathsaba kang anyüu yingcheh, amübükuh thsaba nguchi tsü nyehlipehcho.