Read Sangtam Naga EZRA 5 Bible Online

EZRA 5 - Sangtam Naga bible

EZRA 5

¹Hütsüde, Juda ko Jerusalem la lirü Jihudarü te, azikehrü nyüh anyüh, Haggai ko Iddo tsurü Zekaria nyühnü Israel Tsingrang nengla chonung dikehcho.

²Khode Shealtil tsurü Zerubabel ko Jehozadak tsurü Joshua nyühnü arüh yusi tsü yuchicho, arühnü Jerusalem la Amübükuh thsachinung dikehcho ko azikehrü anyüh tsünü arüh trocho.

³Hütsüde, nyüzüdulang Eufrates governor Tatenai, Shethar Bozenai ko müjang nguchirü adirüti Jerusalem lang ronü yocho: “Hiba Amübükuh hi thsachi rungnümnung sünü nührü khyang mülacho?”

⁴Arühnü hütsüba nguchi la trotarü atümung anengtisü chingcho.

⁵Ta Tsingrangbanü Jihudarü langnürü dhengyeh licho ko Persiarü adirütinü Darius te vathrah thrah alalingba müngude tu münguchinung dhrongchehcho.

⁶Arühnü Yangthsaba yang jüba yusi tsü hi:

⁷“Yangthsaba Darius, yangtsa lieng.

⁸“Ihrünü Juda lih lang wüko ko arangcheh Tsingrangba kuh tsü lung amülülah ko züdi la sing khyangnü thsachicho nguko ko hi nüh adibongnü müdhenungbae. Nguchi tsü dee müzah nguchi yale ko athsalangnü nguchi tsile.

⁹“Achotsü arüh yola langnürüti te Amübükuh tsü thsachi rungnümnung sünü mülacho ko ihrünü tsingdhengcho.

¹⁰Ko ihrünü nü te yonung nengdang arüh yola langnürüti anengtisü chingcho.

¹¹Ko arühnü ihrü te hita lalingcho, “Ihrü ning ko alih Tsingrang dikehrüti lile. Ko papade rezeh Israel yangthsarünü thsachehcho Amübükuh thsachire.

¹²Ta ihrü jümürünü ning Tsingrang wahsohchonü, Abinü Chaldenrü Babylon Yangthsaba Nebukadnezar khyang arüh kohsohcho. Amübükuh tsü thsangnyangjücho ko müyurüti Babylon lang yangtsirü kang nowücho.

¹³Hütsüpü Babylon la Cyrus Yangthsaba kangpü akhudiba kang la, Cyrusnü Amübükuh tsü thsachinung yuzeng jücho.

¹⁴Nebukadnezarnü Jerusalem Amübükuh lanü khyo Babylon la amübükuh la yohpüba amübükuh yo hon ko taripi shingtbhürü tsü thali jücho. Hiri shingtbhürü tsü Cyrusnü Juda la governor anengnü Sheshbazar khehla jücho.

¹⁵Yangthsabanü abi te hütsüri tsü hiwü Jerusalem la Amübükuh la yohpünung ko akhudi hütsü yohpüba Amübükuh tsü thsachinung yocho.

¹⁶Hütsünü Sheshbazarnü ronü kuphi tsü müsangcho, hütsütinü ade yingcheh kuthsaba tsü mütozah rore, ta Amübükuh tsü ade mürungnüm-e.

¹⁷“Ade, hinü nüh Adibong longxosohkhang, yuje Cyrusnü Jerusalem la Amübükuh thsachinung yuzeng müjünang Babylon Yangthsaba kuhla athrahcho yuzi yangchisohng ko hi nengdang nü alümcho tunang ihrü te müdhesohng.”