Read Sangtam Naga EZRA 6 Bible Online

EZRA 6 - Sangtam Naga bible

EZRA 6

¹Hütsünü Yangthsaba Dariusnü Babylon yangthsarü kuhla athrahcho yuzi yangchinung yuzeng jücho.

²Ta Media lih la Ekbatana yangdi la thrahlohcho khüdu ngucho:

³“Yangthsaba Cyrus akhudiba yangthsa kang, kangmübü jüba ko amübü trüpba Jerusalem Amübükuh tsü thsachinung abinü yuzeng jücho. Amübükuh tsü athsenglang khehap rohre, ko adilang khehap rohre thsanung.

⁴Züdi tsü lung chung asang müipi sing khenglipü chungnung. Apehcho apüm Yangthsarü thsibong lanü jünung.

⁵Ko adesü Nebukadnezarnü Jerusalem la Amübükuh lanü Babylon lang hiroba hon ko taripi shingtbhürü tsü Jerusalem Amübükuh la ayohpüji la tsü thali yohpünung.”

⁶Achotsü Dariusnü alalingba hi mühehcho: “Eufrates nyüzüdu lahpi nyüzüdulang governor Tatenai, Shethar Bozenai ko Eufrates nührü te müjang nguchirüti yang: Amübükuh la tsünü shehkhung

⁷ko hütsü thsaba tsü tülongmüzi. Juda governor ko Jihudarü langnürüti khyang Amübükuh tsü akhulang liba müdüm la tsü thsasohng.

⁸Hütsü thsachinung la tronung Ihnü nührü khyang yuzeng jüre. Nguchi tsü müthsangthsinungthsa, apehnung apüm tsü Eufrates nyüzüdu lahpinü amübü dhrisü lanü rocho Yangthsaba kuthsi lanü jüng.

⁹Nyümong müthe, Jerusalem la bebürünü arüh tu thsütahlepü yorünang mülahphehpü jüng: Ning Tsingrang khyang trüp mübünung nengdang misü bongtho, san mahkhang sanza mahkhang Litoh, Mih, yongkha mahkang olive tuji jüng.

¹⁰Ning Tsingrangnü khyüchochehnungthsa arühnü kangmübü jünung ko arühnü Ih ko I tsurüti nengdang amüwa chingjüsohnung hi nguching.

¹¹Ihnü adesü yuzeng hi jüre: khürünü yuzeng hi münyikhang, apu kuh lanü sing khüdu tphahchehnung, khüulang thsühchehnung ko afü khakhu thranung. Ko abi kuh tsü sehnyeh thohpehsing kangsohnung.

¹²Yangthsarü mahkhang yucho khüibanü hiba yuzeng thsangnyangnung müküpro ko Amübükuh tsü thsangnyangjünung müküpro, abi mübüsohnung Jerusalem sünü throchehcho, hiba Tsingrangnü abi changsohng. Ih, Dariusnü yuzeng jüre. Hi nyitsatsanungbae.”

¹³Hütsüta governor Tatenai, Shethar Bosenai ko arüh müjang nguchirütinü Yangthsabanü yuzeng jücho roh-i nguchicho.

¹⁴Jihudarü langnürütinü azikehrü Haggai ko Zekaria nyühnü thsüchi Amübükuh thsaba tsü dee dhsüthsa nguchicho. Israel Tsingrang ko Persia yangthsarü Cyrus, Darius ko Artaxerxes-rühnü yuzeng jücho kyo arühnü Amübükuh thsaba tsü rungnümcho.

¹⁵Arühnü amübükuh tsü Yangthsaba Darius yangthsathsaba kang athüroh-u Adar choo asangu nyümong thümcho.

¹⁶Hütsüpü Israelrü bebürü, Levirü ko yangtsi langnü thalirü atümungnü künyangseh Amübükuh tsü müsachehcho.

¹⁷Arühnü müsachehnung nengdang misüpung thsih khüdu, San thsih anyüh ko sanza thsih müyü kangmübü jücho ko Israel hung dhüre-anyüh müipi miza khüdu-khüdu khyo amünyi nengdang amübü jücho.

¹⁸Ko arühnü Mosa vakha la athülaba jücho roh-i, Jerusalem la amübükuh ashibülung nengdang bebürü ko Levirü mülung throchehcho.

¹⁹Yangtsi langnü thalirütinü Phungkhu Thsüti tsü kang khüu akhudiba choo dhüre-müyüu nyümong müzeh mungcho.

²⁰Bebürü ko Levirü atümung arüh jangjang ayah müsa müsachehcho. Levirünü Phungkhu Thsüti kangmübü athalirü atümung, bebürü ko arühbürü nengdang kanglungrü müpsehcho.

²¹Kangmübü tsü yangtsi langnü rorüh Israelrü atümung, hütsü lih la lijungrü kyothri tsingrang pehjüpü rorüti ko Israel Tsingrang ABÜDONGBA mübünung rorüti atümungnü tsucho.

²²Nyümong dhünyeh arühnü bhüpza müyohba hümthse thsüti künyangchi müzeh mungcho. Arüh künyangsehcho, tunüo Israel Tsingrang Amübükuh thsachiba nguchi la tronungthsa ABÜDONGBAnü Assyria Yangthsaba khyang arüh khümsohcho.