Read Sangtam Naga NEHEMIA 1 Bible Online

NEHEMIA 1 - Sangtam Naga bible

NEHEMIA 1

¹Hakalia tsurü Nehemianü nguchichehcho nengdang. Persia la Artaxerxes yangthsathsaba kang mükyüu Kislev choo chah, Ih Nehemia, Susa yangdiba la licho.

²Juda lanü Inirü Hanani yola aparü mülungo zeh rocho, ko Ihnü arüh te Jerusalem nengdang ko Babylon lanü yangtsi langnü rorüh ajünirü Jihudarü shulüm tsingdhengcho.

³Sürü müsüpü thali abürü lih lang rocho arüh dee chongcha lile, ko shündhün liba shuparütinü dee mükhimüngurepü I te yocho. Jerusalem tbü ko tbükhümti, tahpeh shüshü ade yingcheh thsangnyang mükülüpchipü licho nengdangsü I te yocho.

⁴Ihnü hiri apüm yuchide, Ihnü pümpü tracho. Ihnü nyümong asheng kong longricho. Ihnü Tsingrangba te dangkhidangnangcho,

⁵“ABÜDONGBA ninglang liba Tsingrang, Nüh arangcheh, Nü jingte Ihnü drüseh yare. Nü müirü ko Nü yuzeng bichirüti te Nühnü Nü azengchotaba yohpüre.

⁶I chah dheng, ABÜDONGBA, Ihnü Nü dikehrüti Israelrü shulüm müyüp mükhyang kihchide, I dangkhidangnang nyijüng. Ihrü Israelrünü münyi shitpahcho mülang Ihnü nyengchore. I jümürüti ko Ihnü münyi shitpahko.

⁷Ihrünü Nüh nyüm mütsa nguchiko ko Nü yuzeng mübichi. Nühnü Nü riwürü Mosa khu jücho yuzeng ihrünü mübichi.

⁸Ade Nühnü Mosa te yocho lümchehng: ‘Nührü Israelrünü I te yocho münyikhang, aparü yuchoti la Ihnü nührü shupishuzasohnung.

⁹Ta nührünü Ih yang thali ro Ihnü mülacho nührünü nguchikhang, nührü alih changkachi shupishuza linye Ih mübüsohnung throchehba lih lang Ihnü nührü nüli ronung.’

¹⁰“ABÜDONGBA, hiri Nü dikehrüti ko Nü müyurüti lile. Nühnü arüh Nü zii ko re amülahnü khümcho lile.

¹¹Ade Ih ko Nü dikehrütinü kihchicho nyijüng. Chünye I khyang akoh jüng ko Yangthsaba khyang Ih müisohng.” Hütsü nyümongla Ih Yangthsaba yongkha shing bijürü licho.