Read Sangtam Naga NEHEMIA 13 Bible Online

NEHEMIA 13 - Sangtam Naga bible

NEHEMIA 13

¹Khode Mosa Yuzeng tsü müyurü te züde khi yocho, hütsüla Amonrü ko Moabrü süsü Tsingrangbarü nyitsarü yola zehnung mümülarepü thrah licho ngucho.

²Hütsü Amonrü ko Moabrünü Israelrü Ijip lanü rode arüh lang la tsuyongnung ko kih müjücho khunü licho. Hütsü mülih, Israelrü chokehcholanung arühnü Balam mülihcho, ta Ihsa Tsingrangnü chokehchola tsü amüwa kangsocho.

³Khode Israelrünü hiba yuzeng khi yuchicho, arühnü shuparü atümung arüh yolanü khipehcho.

⁴Bebüba Eliashib tsü amübükuh la azahkehji kuh xükümrü licho ko abi bekhyah asheng Tobia te kehta lirocho.

⁵Abinü Tobia khyang fürü ko müchiji, amübükuh kohro, bebürü khyang amübü jücho, fürü, yongkha ko olive tuji dhüre nohlüm, Levirü, amübükuh la khithsarü ko anyahrü khyang jücho zahkehji chongsah amülah khüdu jo bichisohcho.

⁶Hi tikehde, Ih Jerusalem la mülicho, tunüo Babylon la Artaxerxes Yangthsaba kang sangrepü anyüu yangthsade abi khyang yuzi jünung Ih hütsülang wüpü licho.

⁷Azachah lipü abi chahnü amülaba ngucho ko Jerusalem lang thalicho. Hütsüde Eliashibnü Tobia khyang amübükuh la chongsah khüdu bichisohcho müdhe Ih nehcho.

⁸I ziichüronü Tobia kohro apüm Zangchehpehjücho.

⁹Hütsüba chongsah tsü müsachehpü amübükuh kohro, mübü jücho fürü ko müchiji thali yohpünung Ihnü yuzeng jücho.

¹⁰Adesü müyurünü arüh dhrisü müjüchonü, amübükuh la khithsarü ko Levirü Jerusalem pehjüpü arüh luh lang thali tsikopü Ihnü yuchicho.

¹¹Amübükuh layo pehjücho shulüm Ihnü adirüti khatacho. Hütsüpü Ihnü thali Levirü ko khithsarü noro nguchisohcho.

¹²Hütsükolü Israelrünü amübükuh azahkehji yang arüh fürü, yongkha ko olive tuji dhüre nohlüm hiromüsucho.

¹³Ihnü nyitsarü hiri azahkehji dhengyehnung nyümkehjücho: bebürü Shelemia athrahrü Zadok; ko Levirü khüdu Pedaia, Matania shümtsurü Zakur tsurü Hanan tsü arüh trorü thsanung throchehcho. Hiri nyitsarütinü arüh te müjang nguchirüti khyang chahlaba la tsü yuje chonungepü Ihnü longdicho.

¹⁴I Tsingrang, hiri apüm Ihnü Nü Amübükuh ko hütsüla mübüba nguchi nengdang nguchicho lümchehng.

¹⁵Hütsü bekhyah Amünyümong müyurünü Juda la Shükusih dhrüm Ihnü ngucho. Ko aparünü arüh gadu chah fürü, yongkha, shükusih, ngurüsih ko apa kohroti zang Jerusalem lang hiwücho. Amünyümong tusü mü-inung Ihnü müzahsohcho.

¹⁶Tyre yangdi lanü khürü ro Jerusalem la licho ko arühnü Amünyümong ngu ko kohro lüpcho hiro ihrü nyitsarü te icho.

¹⁷Ihnü Jihudarü langnürüti yübo yocho, “Nührünü nguchiba amütsa tsü dheng! Nührünü Amünyümong tsü münyijüre.

¹⁸Hitachonü Tsingrangbanü hiba yangdi la achangba hirojo nührü jümürü khingchicho. Ko nührünüsü Amünyümong münyijo alaa Tsingrangba rihlong Israel michah hironyüre.”

¹⁹Hütsünü Amünyümong mükhu, nyüzehyeng yangdi tbükhümti khangtinung ko Amünyümong mükhude mükhangthrunung Ihnü yuzeng jücho. Amünyümong yangdi la tusü mü-iironung shulüm tbükhümti la Ihnü nyitsarü khürü yohpücho.

²⁰Khüdupi anyüpi kohro adhangpi ihrü shithsabhülehrüti hokolbar romang yangdi tbükhüm mihlang yüpcho.

²¹Ihnü arüh müzahsoh yocho, “Tuepü nührünü tbü shündhün yüpro? Nührünü anyüpiu hütsüta nguchikhang, Ihnü kheh küdunung.” Hütsütinü arühnü Amünyümong müropehcho.

²²Ihnü Levirü te arühbürü jangjang müsachehnung ko Amünyümong müsa yohpünungthsa wünü tbükhümti nyahnung yuzeng jücho. Hi nengdangsü Ih lümchehng, O Tsingrang, ko Nü amüi aichi I te yanglilüm.

²³Hütsü shikhe la Jihudarü adrongnü Ashdod, Amon ko Moablarü khyücho Ihnü rangchehcho.

²⁴Arüh tsurü changshonü Ashdod yu mahkhang apa yu chopü ihrübürü Juda yu müchochehcho.

²⁵Ihnü arüh yübücho, ko arüh michah chokehchola dsichojücho, lahcho ko arüh kuva rohchehjücho. Hütsüpü Tsingrangba nengla khodesü arühnü mahkhang ihrü tsuzarünü shupalarü te kuthri yangthri müthsanungepü yuchümsohcho.

²⁶Ihnü yocho, “Yangthsaba Solomon amünyi shitpahsohba tsü arüh shupalarünü. Abi tsü aparü yucho yangthsarü tenü khüdupinü adiuba thsacho. Tsingrangbanü abi müicho ko Israel apüm michah yangthsarü kangsohcho ta abinü hiba amünyi la shohjocho.

²⁷Ihrüsü nührü iithsa shupalarü khyünü ihrü Tsingrang yocho münyinung do?”

²⁸Joiada tsü Amungthriba Bebüba Eliashib tsurü ta Joiada tsurü khüdunü Beth Horon yangdi lanü nyüh khüdu Sanbalat tsularü khyücho, hütsünü Ihnü Joiada Jerusalem lanü iipehcho.

²⁹O Tsingrang, arühnü bebüba nguchi ko bebürü ko Levirü te nühnü azengtacho külüpcho thsangnyangcho lümchehng.

³⁰Ihnü I müyurüti shuparü nguchi lüpcho lanü müsachehjücho; arüh müipinü abürü nguchi tsüpnung shulüm Ihnü bebürü ko Levirü khyang yuzeng külüpjücho.

³¹Kangmübü trüpnung becho la sing hironung ko akhudiba fürü ko singsilungsi hironung Ihnü rungnüm jücho. O Tsingrang, hiri apüm lümcheh Ih müing.