Read Sangtam Naga NEHEMIA 4 Bible Online

NEHEMIA 4 - Sangtam Naga bible

NEHEMIA 4

¹Khode Sanbalatnü ihrü Jihudarünü tbü tsü külüpchilepü yuchicho, abi rihlong chüro ihrü müthsamünyünung dikehcho.

²Ashangrü ko Samariarü rothsarü bete abinü yocho, “Adongmücho Jihudarü hiri tu nguchiro? Arühnü yangdi tsü külüpchinyürü do? Kangmübü jüchonü nyümong khüdu lanü arüh nguchi thümnungepü arühnü lümrü do? Sünyeh trüp bhümcho lanü arühnü kuh thsanung lung külüpchehnung do?”

³Abi müshüm Tobiasü yacho ko abinü yocho, “Arühnü tu kyo tbü külüpnung? Shirungnü mii jütsunung!”

⁴O Tsingrang! Ihnü kihchire, “Arühnü ihrü müchümükehba tsü nyidheng. Arühnü müthsamünyüba tsü arühbürü chah küdusohng. Arüh licho lüpcho kengcho tsisohng ko shupa lih la arüh arangyohrü kang hitsisohng.

⁵Arühnü nguchiba amütsa tsü mülang tüpehjü ko arüh münyi tünbüchü, tunüo arühnü ihrü anguchirüti nyüpmüsehre.”

⁶Hütsüta ihrünü tbü tsü külüpchicho ko tunyah müli arongbi külüpkehcho, tunüo nyitsarünü nguchinung dee longphicho.

⁷Sanbalat, Tobia ko Arabiarü, Amonrü ko Ashdodrünü Jerusalem tbü ihrünü zikeh külüpchile ko tbü la akhitisü khangti khangle pü yuchide arüh dee zichürocho.

⁸Achotsü arühnü ro Jerusalem mahnung ko atsangnyang jünung rah külüpcho,

⁹ta ihrünü Tsingrangba te dangkhidangnang arüh nyüm ama atsingse anyahrü yohpücho.

¹⁰Judarünü thsacho khi khüdu licho: “Bhamüling hichonü ihrü re müzeh; Apehnung sehnyeh drongrako. Ihrünü tbü tsü chünye khüta külüpnung?”

¹¹Arühnü ro ihrü chah kheh thah, süsoh ko ihrü nguchi zahsoh yingcheh arüh rah ihrünü mümüdhenung mahkhang müngunungepü lümcho.

¹²Ta shikhe mükhu ihrü rorütinü ihrü nyüm arah külüpcho arüh yola liba Jihudarünü ro ihrü te yocho.

¹³Hütsünü Ihnü I nyitsarüti khyang thsunohrü ko singthsalu bisohpü mürungnüm-eba tbü müshüm ahung-ahung nyahsohcho.

¹⁴Nyitsarüti tsü Ihnü lümtpahnah ngucho, achotsü arüh ko arüh langnürüti te yocho, “Nührünü arüh tüdrü. ABÜDONGBA sünü nührü nyitsarüti, nührü tsuzarüti, nührü nitpürüti ko nührü kukhi nengdang khatajüro, Abi tsü khüta amülah ko adrünung hütsü lümchehng.”

¹⁵Ihrü rorütinü ihrünü arüh rah rangchehkopü yuchicho ko Tsingrangbanü arüh rah kohchehkopü nyichehcho. Achotsü ihrü atümung tbü külüpchilang tsü thalicho.

¹⁶Hütsütinü, I nyitsarü changshonü nguchicho ko changsholü jengki khyüpü, thsuh, tsung ko singthsalu bipü nyah yacho. Ko ihrü langnürütinü tbü külüpchirüti ajeng trocho.

¹⁷Kusing dhirü miinü kheh khüulangnü thsunohrü bi ko khüulangnü nguchicho,

¹⁸ko anguchirü atümung noh yohpü du nguchicho. Rühti mehba tsü I müshüm yacho.

¹⁹Ihnü adirüti, langnürüti ko müyurüti te yocho, “Nguchi hi amülah ko ashu shupishuza lile ko Ihsa papa zasho lile.

²⁰Nührünü rühti yuva yuchikhang, I yang shibülung. Ihsa Tsingrangnü Ihsa nengdang khatajünung.”

²¹Hütsüta nyümong müthe anyangnyünü chenghi chüro yingcheh changshonü thsunohrü bipü nyah yade changshonü nguchicho.

²²Ihrünü aromang yangdi tsü nyahnung ko anyümong nguchinungthsa, hiba shikhe anüchirü ko anguchirü atümung aromang Jerusalem la du linung Ihnü arüh te yocho.

²³Ih thsanye, I shangrüti thsanye mahkhang I dikehrüti ko I nyahrüti süsü aromang mii jengki mükhyüchehcho. Ihrü atümung thsunohrü palu khehla yohpücho.