Read Sangtam Naga NEHEMIA 6 Bible Online

NEHEMIA 6 - Sangtam Naga bible

NEHEMIA 6

¹Sanbalat, Tobia, Geshem ko ihrü rorütinü ihrünü tbü tsü rungnümko ko tbükhümti la trahtri müyoh-e nye adelü akhi mütpeh pü yuchicho.

²Hütsünü Sanbalat e Geshem nyühnü Ono ngah yang khüdu la I te arüh shirüngpü yuva jücho. Hi Ih thsakehjünung arühnü rah külüpcho thsacho.

³Ihnü yuhirü khu arüh te yochücho, “Ih nguchi athsütah nguchire ko hütsülang mürochehnung. Ih nührü te shirütanung khyanglangnü nguchi zahnung mükoh.”

⁴Arühnü akyokyo yusi tsü müyüpili müthehcho ko Ihnüsü akyokyo du tsü lalingcho.

⁵Hütsüpü Sanbalatnü Ih yang akulirü khüdu müngapiu yusi hipü rosohcho, hilü vathrah tsü mükhangtipü mühecho.

⁶Hita thrah zehcho: “Nüh ko Jihudarünü nyüm shemüsunung nengdangnü tbü tsü külüpchire ko hiba yusi tsü mükangmüshü yuchoti apüm la chochilepü Geshemnü I te yoko.

⁷Ko adesü Juda la nüpu jangjang Yangthsaba kangnyüre ko hütsü Jerusalem la sobhosohnung nühnü azikehrü khürü rungnümkopü hi nengdangsü I te yoko. Hi Yangthsabanü yuchiriri, hütsüeko hiba khiyu nengdang Ihjü shirüta chotabaepü Ihnü lümre.”

⁸Ihnü alalingba hi müthehcho: “Nühnü yoba tsü khüdusü yuje mah, Hi nüpunü külüpcho due.”

⁹Ihrü nguchi nyehlisohnung arühnü ihrü drüsohrü due. “Ta ade, Tsingrangba, Ih rezehsohng pü Ihnü kihchire.”

¹⁰Hütsü shike Ihnü akuh mükoh pehjücheba Mehetabel shümtsurü, Delaia tsurü Shemaia shirünung wücho. Abinü I te yocho, “Ihjünü wü Amübükuh la Amüsa müdüm la tsü kukhang khangtipü rangpümnung, tunüo arühnü nüh kyüsehnung ronung. Arühnü adelü masü romang ro nüh kyüsehnung.”

¹¹Ihnü lalingcho, “Ih hütsüta rang tsiba nyitsarü khüdu mah, Amübükuh la wü I kang khümchonung rangnung-o? Ihnü hütsüta münguchinung.”

¹²Ihnü hütsü lümdhengde, Tsingrangbanü Shemaia te müchota, ta Ih nyüm choyohnung Tobia ko Sanbalat nyühnü pohsako pü Ihnü lümchehcho.

¹³I neng chühsohnung, müthsamünyüjüsohnung, ko drüsoh münyi shitpahsohnung nengdang arühnü abi mülihcho.

¹⁴Tsingrangba! “Tobia ko Sanbalat nyühnü tu nguchicho hütsü lümcheh arüh khingching pü Ihnü kihchire. Ih drüsohnung müküpba khingkutpü Nodia ko azikehrütisü lümchehng.”

¹⁵Nyümong dhünyangpü anyüh nguchide Elul choo mükyüpü müngau nyümong tbü apüm chungkacho.

¹⁶Khode mükangmüshü ihrü rorütinü hi yuchicho, arüh ashah khyükopü arühbürünü müdhecho, tunüo nguchi tsü Tsingrangba arüku khu nguchichoepü atümungnü müdhecho.

¹⁷Hiba bekhyah ayung Jihudarü langnürütinü Tobia te yuhimülata licho.

¹⁸Juda la nyitsarü adrongnü abi khümcho, tunüo abi Jihudarü Arah tsurü Shekania tsunyahrü thsacho. Hütsü chah lahkeh atsudhre Jehohananü Berekia tsurü Meshulla tsularü khyücho.

¹⁹I bete nyitsarütinü Tobianü atsa nguchicho chocho ko Ihnü chocho apüm wü abi te yocho. Ko abinü Ih drüsohnung mütozah vathrah müthehcho.