Read Sangtam Naga NEHEMIA 9 Bible Online

NEHEMIA 9 - Sangtam Naga bible

NEHEMIA 9

¹Hütsüba choo mükyüpü müyü nyümong Israelrünü müyahshü müpipü arüh thah chah tavi kangkeh kongnung shimükhongcho. Arühnü arühbürü jangjangthsa shuparü atümung tenü zacho.

²Hütsüpü arühnü shemüsu arüh ko arüh jümürünü shitpahcho münyi nyengchocho.

³Rehtseh asangoshi arüh te arüh Tsingrang ABÜDONGBA Yuzeng khi yocho ko rehtseh asang arühnü arüh münyi nyengchocho ko arüh Tsingrang ABÜDONGBA mübücho.

⁴Hütsüla Levirü shulüm yuthungchah khüdu licho ko hütsü chah Jeshua, Bani Kadmiel, Shebania Buni, Sherebia, Bani ko Chenani yacho. Arühnü arüh Tsingrang ABÜDONGBA te züde dangkhidangnangcho.

⁵Levirü hirinü mübünung dsiyohcho: Jeshua, Kadmiel, Bani. Hashabneia, Sherebia, Hodia, Shebania ko Petahia. Arühnü yocho: “Shemüsung ko ABÜDONGBA nührü Tsingrang seing; Müchangkapü Abi seing! atümungnü Abi ahechi neng seing, nyitsarünü seba tsü adekheng müthsa nye.”

⁶Hütsüpü Israelrünü hita dangkhidangnangcho: “Nüh, ABÜDONGBA, Nüh du ABÜDONGBA, Nühnü ning ko ning chah chenghiti thricho. Nühnü alih, kih ko hütsüla liba lüpcho külüpcho; Nühnü apüm khyang akang jücho. Ninglang zii tinü mükhukeh nüh mübüre.

⁷Nüh, ABÜDONGBA Tsingrangnü Abram throchehcho ko Babylon la Ur lanü nüchehcho; Nühnü abi neng Abraham pü mülijücho.

⁸Nü te abi yuje chocho Nühnü müdhecho, ko abi te azengchotaba khüdu külüpcho. Nühnü abi khyang Kananrü lih, Hit-rü ko Amor-rü lih, Perezrü, Jebusrü ko Girgashrü lih, abi chahnü trahchochoti khyang jünung nyengchocho. Nühnü anyengchocho yohpücho, tunüo Nüh yuje chorü.

⁹Nühnü ihrü jümürü Ijip la khüta chongchacho ngucho; Amoh kihdi la arühnü züdecho Nühnü yuchicho

¹⁰Nühnü Farao, abi adirüti ko arüh nyitsarüti nyüm thsayahiya nguchicho, tunüo arühnü Nü müyurü khüta sehchicho Nühnü müdhecho. Chünye yingcheh liba nengse tsü hütsüde Nühnü ngucho.

¹¹Nü müyurü khyang kihdi khu Nühnü lang külüpjücho, ko akung lanü arüh nüchehcho. Arüh iirorü tsü rihlong chüro liba kihdi la longyohcho kyo kih asoh la thsangsehsohcho.

¹²Anyümong nyükhinü ko aromang michangnü Nühnü arüh langnücho.

¹³Sinai Zong la Nüh ninglangnü jürocho; Nühnü Nü müyurü te chotacho ko arüh khyang Yuzeng atsa ko adoba apisa jücho.

¹⁴Nühnü Nü Amüsa nyümong yohpünung docho, ko Nü dikehrü Mosa khu arüh khyang Nü Yuzeng jücho.

¹⁵Arüh yangde, Nühnü arüh khyang ninglangnü hümthse jücho, ko arüh xode lung lanü kih jücho. Nühnü arüh khyang jünung nyengchoba alih tsü khyünung mülacho.

¹⁶Ta ihrü jümürünü müthseh hongzicho ko Nü yuzeng mübichicho.

¹⁷Arühnü yocho münyicho; Nühnü nguchicho apüm arühnü nbüchücho; Nühnü nguchiba thsayahiyasü arühnü nbüchücho. Arühnü müthsehmüla Ijip lang ayurü suro yang nüli wüsohnung langnürü throcho. Ta mülang pehjüba Tsingrang; Nüh achomang ko amüi, Zii chüronung müthsüthsa. Nüh yanglilüm amülah; Nühnü arüh müthrüchahchübeh.

¹⁸Arühnü misüpung kyothri khüdu thricho ko Ijip lanü nüchehba tsingrang tsü hiepü yocho. Arühnü Nüh khüdoi müthsamünyücho, ABÜDONGBA!

¹⁹Ta Nühnü lipilih la arüh thrüchahchü müpehjü, tunüo Nüh yanglilüm amülah. Aromang ko anyümong arüh lang nüba nyükhi mahkhang michang tsü mükhyümüijü.

²⁰Nüh tsachonü Nühnü arüh te tu nguchinungnang yocho; Nühnü arüh mannanü kangcho ko ayongnung kih jücho.

²¹Lihpi la kang yüre Nühnü arüh thsütah apüm chixicho; arüh jengki khodesü müthrehcho, ko arüh jing thsa mübümcho.

²²Nühnü arüh te rühtaba yuchoti ko yanglihti arüh khyang kohsohcho. Sihon-nü yangthsaba Heshbon lih, ko Ognü yangthsaba Bashan lih arüh khyang jücho.

²³Nühnü arüh khyang ning chah chenghiti roh-i tsuzarü jüko; ko Nühnü arüh jümürü te nyengchoba lih tsü kohsohpü hütsüla lisohcho.

²⁴Arühnü Kanan lih kohchehcho; Nühnü hütsüla liba nyitsarüti kohchehcho Nühnü Nü müyurü khyang Kanan la yangthsarü ko arüh nyitsarü chah thsanyücho thsasohnung tase jücho.

²⁵Nü nyitsarütinü lungnü tbüticho yangditi, asu lih, kuthsi zehba kuh, ajucho kihkong, olive sing, singsih dongti ko shükusiluh kohcheh khyüsohcho. Arühnü arüh tsunyücho tsu shukehcho; Nühnü jüba atsa apüm arühnü khyüko.

²⁶Ta Nü nyitsarünü Nüh nyüm Nü yocho münyicho; Arühnü Nü Yuzeng tenü za tsicho. Arühnü arüh te Nüh yang ximülanung yorü azikehrüti kyüsehcho.

²⁷Arühnü Shikhe mükhu Nüh müthsamünyücho, hütsünü Nühnü arüh rorüh khyang kohsoh arüh michah thsasohcho. Arüh chongchade arühnü Nü te züdecho, ko ninglangnü Nühnü arüh te lalingcho. Nü yanglilüm arangcheh khu Nühnü arüh yang langnürüti müthehcho ko arüh rorüh kheh lanü arüh khümchocho.

²⁸Khode yangtsa thalicho, arühnü thali amünyi shitpahcho, hütsüde Nühnü thali arüh rorüti khyang arüh kohsohcho. Ta khode arühnü lasih thsamüla Nü te kihchicho, Nühnü ninglangnü yuchicho ko bekhyah mükhu Nü yanglilüm amülah la Nühnü arüh khümchocho.

²⁹Nühnü Nü adoba bichinung arüh müzahsohcho, Nü Yuzeng bichiba tsü akang lang khüli, arühnü müthsehmüla Nü yuzeng mükhyüchocho. Arühnü lasih müküp ko hongzinü yu münyicho.

³⁰Kangnü kang Nühnü rangcho arüh müzahsohcho. Nühnü Nü azikehrüti thsüchi chosohcho, ta Nü müyurünü nangtbengcho, hütsünü yucho parü khyang kohsohcho.

³¹Ta Nü yanglilüm dirachonü, Nühnü arüh müthrüchahchübeh mahkhang müchangsoh. Nüh achomang ko yanglilüm Tsingrang lile!

³²O ihrü Tsingrang, Nüh khütoh-i arangcheh! Khüta adrünung, khütoh-i amülah! Nühnü yuje cho Nü azengtacho yohpücho. Assyriarü yangthsarütinü ihrü sehchiba nyümong lanü Chünye yingcheh ihrü khüdoi chongcharo! Ihrü yangthsarüti, langnürü, bebürü ko azikehrü, Ihrü jümürü ko ihrü müyurü apüm chongchako. Ihrü khüdoi chongchacho lümchehng!

³³Nühnü ihrü khingchiba tsü athsalang; ihrünü amünyi shitpah nye, Nüh yuje cho licho.

³⁴Ihrü jümürü, yangthsarü, langnürü ko bebürütinü Nü Yuzeng mübichi. Arühnü Nü yuzeng ko amüzahsohba münyi.

³⁵Nühnü arüh khyang jüba alimih amülah ko asu lih la lide, Nü amüwa la yangthsarünü Nü müyurü michah thsako; ta arühnü lasih thsamüla Nüh müdikeh.

³⁶Ta ade Nühnü ihrü khyang jüba, ihrü khyang tsuyongnung jüba asu lih hila ihrü ayurü lile.

³⁷Alih lanü achürochoti, Nühnü ihrü michah yohpüjüba yangthsarüti yang würe, tunüo ihrünü amünyi shitpahko. Arühnü ihrü ko ihrü kanglungrü michah arüh thsanyücho thsare, ko ihrü dee thsa lile!”

³⁸Hiri apüm tikehcho khu, Ihrü Israelrünü, hila athrahcho anyengchotaba khüdu külüpre, ko ihrü langnürüti, bebürüti ko Levirütinü hütsüla shingkehre.