Read Sangtam Naga ESTHER 1 Bible Online

ESTHER 1 - Sangtam Naga bible

ESTHER 1

¹Persia yangdiba Susa Yangthsaba pümji lanü,

²Yangthsaba Ahaserus nü India lanü Ethiopia chii yanglih 127 michah yangthsacho.

³Abi yangthsapü kang asangu la abinü abi pohki adirüti ko thsazirüti atümung khyang thsüti khüdu jücho. Persia ko Mediarü rothsarü ko yanglihti la governorti ko anüchirüti zeh licho.

⁴Choo dhüroh ajeng abinü abi licho, ahechi ko adhichi ngusohcho.

⁵Hütsü khanglang, Yangthsabanü Susa yangdiba la lirü alirü ko ailümrü atümung khyang thsüti jücho. Hütsü Yangthsaba tbü la nyükhih khüdu ajeng mungcho.

⁶Kekhüm tsü khengkhehshü athru ko apuleh taripi imüshi chah meeyü mohba rangshünü marble kuhbi chah mükingpü müthsükecho. Kekhüm la tsü hon ko taripinü külüpcho pümji yohpücho. Ko hütsü Marble athru, amoh, bhürüm ariri ko apuleh münohcho.

⁷Ayongba tsü hon shing la dunü tihcho, shing anyüh miinü mükyota papa thsacho, ko Yangthsabanü yangthsarü yongkha thangchinü tihtacho.

⁸Ayongnung tsü müshapüjücho ko Yangthsabanü anguchirü te palu kohcho yongsohnung mülacho.

⁹Hütsüde, Yangthsaba kuh ayonglang yangthsalatpü Vashtinü khingkurüti khyang thsüti tüp licho.

¹⁰Thsüti dhünyeh nyümong Yangthsaba tsü tsuyongnü künyangcho, achotsü abinü abi dikehrü Mehuman, Biztha, Harbona, Bigtha Abagtha, Zethar ko Karkas axangmicho arüh dhünyeh dsicho.

¹¹Abinü arüh te yangthsalatpü Vashti Yangthsalarü jengki khyüpü noronung yuzeng jücho. Yangthsalatpü tsü atsah atsa thsacho ko Yangthsabanü adirüti ko shirü te abükyü tsah tsü ngusohnyücho.

¹²Ta dikehrütinü hütsü yangthsalatpü Vashti te yode, abükyünü mürocho. Hinü Yangthsaba zichürosohcho.

¹³Ade Yangthsaba yahnü tsuyuzeng nengdang abi pohki athsehthsarü te tsingdhengnung nanathsa licho, achotsü abinü tu nguchinung hütsü nengdang abi chitungrüti dsicho.

¹⁴Lümlong khyünung lede dsirüti tsü Karshena, Shethar, Admatha, Tarshish, Meres, Marsena, ko Memukan, hiri dhünyeh tsü Persia ko Media yanglih la amungthriba adirüti licho.

¹⁵Abinü arüh te yocho, “Ih, Yangthsaba Xerxesnü yangthsalatpü Vashti yang yuzeng khüdu dikehrüti khu müthehcho, ta abükyünü hütsü münyi. Abükyü chah tu nguchinung Yuzengnü yoro?”

¹⁶Hütsüde Memukan-nü Yangthsaba ko abi pohki adirüti te yocho. “Yangthsalatpü Vashtinü Yangthsaba du mah, ta abi pohki adirüti ko yanglih la adhrerü atümung mükhimünguko.

¹⁷Hi yuchiyeng yanglih la khingkurüti atümungnü arüh niirü mükhimüngunung. Arühnü yonung, ‘Yangthsaba Xerxesnü yangthsalatpü Vashti te ronung yuzeng jücho ta abükyünü müwücho.’

¹⁸Persia ko Media la adirüti nitpürünü yangthsalatpü saying tsü yuchiyeng hütsü nyümongnü arüh niirü te hütsü yomüsunung. Apümlang nitpürütinü hütsüta arüh niirü khyang jengreng müjünung ko niirütinü arüh te zichüronung.

¹⁹Nüh Yangthsabanü lümkhang, Vashtinü thali Yangthsaba khodesü müshirünung yuzeng jüng. Hi khodesü mümülichichehnungthsa Persia ko Mediarü Yuzeng la thrahyohsohng. Hütsüpü khingkurü atsau khüdu khyang yangthsalatpü pümji tsü jüng.

²⁰Khode nü yuzeng hinü yangdi amülah hi jengnang, azaubalanü adiuba chii khingkurü atümungnü arüh niirü jengreng jo bichinung.”

²¹Yangthsaba ko abi pohki thsazirütinü hi khyünyücho, ko Memukan-nü Yangthsaba te yocho kyo nguchicho.

²²Yanglih müipi khyang arühbürü yu ko palu yunü thrahpü kukhi la anii tsü abüdongba ko amichahba tase libaepü abinü yuzeng müthehcho.