Read Sangtam Naga ESTHER 2 Bible Online

ESTHER 2 - Sangtam Naga bible

ESTHER 2

¹Akhanglang, Yangthsaba zichüroba kyangpü mii, Vashtinü tu nguchicho ko abinü abükyü nyüm nguchicho shulüm lümdheng licho.

²Hütsünü Yangthsaba te dee shündhün trotarütinü hita yodhengcho, “Khütapü Yangthsaba nengdang atsah atsa amüthsengcheh lazarü khürü müyangchiro?

³Yanglih apüm la adirüti throchehng ko arüh khyang Susa yangdiba la Khingkurü atsah atsa lazarüti atümung nübülungsohng. Axangmicho Hegai, khingkurüti dhengyehba khehla arüh atsah tsanung xükümsohng.

⁴Hütsüpü nühnü mürucho lazarü khüdu throcheh Vashti mülih yangthsalatpü kangsohng.” Yangthsabanü hi tsalepü lümnü hütsüroh-i nguchicho.

⁵Susa la Jihudarü khüdu Jair tsurü Mordekai licho; abi Benjamin hung lanü ko Kish ko Shimei chahnü trahchocho licho.

⁶Babylon Yangthsaba Nebukadnezarnü Jerusalem lanü Juda Yangthsaba Jehoiakhin yangtsi lang arangyohrü mülung-o yola nowüde Mordekai tsü hütsüri yola zehcho.

⁷Abi te aphüli Esther Ibri nengnü Hadassah licho; abükyü adhengnung atsah atsa ko nyükheh atsa thsacho. Abükyü tpurü süpü Mordekainü atsulatpü kang müthsüm nümüsucho.

⁸Khode Yangthsabanü hiba yu sobhocho, lazarüti adrong Susa lang norocho ko Esthersü hütsüri yola zehcho. Abükyüsü khingkurüti kuh anüchiba Hegai khehla Yangthsaba kuhla tsü yohpücho.

⁹Esthernü abi künyangsoh Hegainü Esther müicho. Tunyah mülipü abinü abükyü fü münohjo ko tsuyongba pathsa jücho. Hütsüla abükyü khyang nohlüm atsau jo abükyü dikehnung khingkurü dhünyeh jücho.

¹⁰Ade, Mordekainü yocho khu, Esthernü abükyü Jihudalarüepü südesü müyocho.

¹¹Nyümong mükhu Mordekainü khingkurüti yohpüba kuh mükang abükyü tsü khüta liro ko tu tikehnung pü lüm wüli roli rachicho.

¹²Khingkurüti tsah tsanung müshoba tsü kang khüdu khyücho; axümlichi tujinü münohba tsü choo dhüroh ko balsam tujinü choo dhüroh. Hütsüpü, khüdu khüdunü Yangthsaba Ahaserus yang nowünung.

¹³Khingkurüti kuhla tsünü Yangthsaba pümji lang wüde tsü, palu khyünyücho khyünung.

¹⁴Abükyü tsü amalang nowünung ko nyangnyü khüu tsü khingkurü kuh apa khüdu Yangthsaba müyanglarü xükümji Sha-ashgaz yang nowü hütsüla yohpünung. Yangthsabanü khyünyo anengnü müdsilikhang abükyü thali müwünung.

¹⁵Yangthsaba yanglang wünung Abihail tsulatpü, Mordekai bhüli abinü müthsüm-müsutpü Esther chung ro chihcho; Esther tsü angurü atümungnü mükhyahcho. Khode abükyü chung leh ro chihcho, khingkurü kuh xükümba axangmicho Hegainü yocho du jengkicho.

¹⁶Hütsüta Ahaserus Yangthsaba kangpü kang dhünyeh, choo dhüre Tebeth Choo chah, Yangthsaba Ahaserus yang Esther tsü norocho.

¹⁷Yangthsabanü aparü lazarü tenü abi alaa müicho, ko aparü atümung tenü Yangthsaba khyang abükyü müisohcho. Abinü abükyü thah chah kuthri thrijücho ko Vashti mülih Yangthsalatpü kangsohcho.

¹⁸Hütsüpü yangthsabanü Esther nengla abi pohki adirüti atümung dsiyoh thsüti amüla jücho. Abinü yanglih apüm la akyahshang nyümong jo Yangthsaba aleng jiyü chahla jücho.

¹⁹Hütsüde yangthsabanü Mordekai tsü anüchirü jingkih la throchehcho.

²⁰Ade yingcheh Esthernü abükyü tsü Jihudarüepü sükhyangsü mümüdhesohcho. Mordekainü hi sütesü müyonung yocho ko abükyü zade abi te yocho nyicho roh-i du abi yu nyicho.

²¹Yangthsaba kuhla Mordekai anüchirü thsade, Bigthana e Teresh, Yangthsaba chongsah nyahba axangmicho anyüh tsünü Yangthsaba Ahaserus nyüm yacho ko abi süsohnung rah külüpcho.

²²Mordekainü hütsü rangcheh Esther te yocho ko Esthernü Mordekai nengla Yangthsaba te yocho.

²³Hütsü nengdang bhucho ko yusi tsü yuje-epü rangchehcho, achotsü anyüding hohseh süsohcho. Yangthsabanü hi nengdang yanglih yukheh la thrahyohnung yuzeng jücho.