Read Sangtam Naga ESTHER 3 Bible Online

ESTHER 3 - Sangtam Naga bible

ESTHER 3

¹Azachah lipü Yangthsaba Xerxesnü nyüh khüdu anengnü Haman Prime Minister kangsohcho. Haman tsü Agag chahnü trahchocho Hammedatha tsurü licho.

²Yangthsabanü abi pohki adirüti atümungnü Haman khyang mükhohthung mükhukehnung yuzeng jücho. Ko Mordekai chah khu aparü atümungnü mükhukehcho.

³Aparü adirütinü tuepü abinü Yangthsaba yuzeng münyiro pü tsingdhengcho;

⁴nyümong mükhu arühnü abi te mükhukehnung thsüchicho, ta abinü münyicho. Abinü yocho, “Ih Jihudarü khüdue, Ihnü Haman te mükhukehnung mükoh.” Achotsü arühnü Haman te Mordekai saying tsü rangchonung mah-o pü yocho.

⁵Khode Haman-nü Mordekainü abi chah mümükhukehnungepü yuchicho abi te khütang zichürocho.

⁶Ko khode Mordekai tsü Jihudarüepü müdhecho, Mordekai du mahpü aparüsü khingchinung dhrongchehcho. Abinü Persia yanglih apüm la Jihudarü apüm kyüsehnung lümchung külüpcho.

⁷Yangthsaba Ahaserus yangthsacho kang dhüre-anyüh, akhudiba choo, Nisan choo chah, Haman-nü abi lümchung nguchinung “Purim,” ko dsiba zii thsadhengnung yuzeng jücho. Choo dhüre anyüu, Ada choo la nyümong dhüre-asang tsü thsachehcho.

⁸Hütsüpü Haman-nü Yangthsaba te yocho, “Yucho khüdunü yanglih apümlang shupishuza licho ngure. Arüh lili yah tsü aparü sütesü mükyota. Hütsü du mahpü arühnü yanglih yuzeng mii münyire, hütsünü nühnü hiri rangchonunglü athsalang mah.

⁹Hi nüh Yangthsabanü lümkhang, arüh süsohnung yuzeng khüdu jüng. Nühnü hi nguchikhang, Yanglih yangthsathsanung la pehnung Ihnü taripi süreh lakh asangpü hajar sangre mihlang yohjünung.”

¹⁰Yangthsabanü abi imüshi akheh lanü khyücheh Jihudarü rorüh, Agag trah, Hammedatha tsurü Haman khyang jücho.

¹¹Yangthsabanü abi te yocho, “Nyitsarü ko arüh thsi nüyoe; arüh chah nü thsanyücho thsaang.”

¹²Hütsünü akhudiba choo la dhüre-asangu nyümong tsü Haman-nü yangthsaba athrahrüti dsibülung sobho khüdu thrahsohcho ko hütsü yu papa ko thrahtse papa la thrahpü yangthsarüti, governorti ko adirüti müipi khyang mühehnung yocho. Hütsü yangthsaba Ahaserus nengla apu imüshinü shingkehpü mühehcho.

¹³Yuhirünü yanglih apümlang hiba yu-sobho hiwücho. Hila nyümong khüdu Adar choo nyümong dhüre asangu la Jihudarü azarü azirü, khingkurü azarü atümung kyüsehnung yuzeng zehcho. Müchomangpü arüh kingthrümnung ko arüh kuthsi khyüjünung.

¹⁴Sobho vathrah tsü yanglih apüm la misha khinung hütsünü du nyümong ro chihde atümungnü rungnüm yingnung.

¹⁵Yangthsabanü yuzeng jücho roh-i, Yuzeng tsü yangdiba Susa la khicho ko yuhirünü yanglihti yang himüchicho. Yangdiba Susa nyitsarüti lümdhama lide, Yangthsaba ko Haman nyüh yongkha yong pümcho.